انتهي ساهر ورائد من القهوه وعزم ساهر علي الصعود لغرفه ليالي
ساهر :انا هطلع اطمن علي ليالي
رائد :اه طبعا اتفضل
امسك رائد بهاتفه وقام بإرسال رساله لبدر لكي يخرج من الغرفه
وصلت الرساله لبدر فقبل يد ليالي وخرج من الغرفه وخرج من المستشفي كلها
مرت الليله علي أبطالنا واشرقت شمس الصباح لتعلن عن ميلاد يوم جديد
فتحت ليالي عيونها ووجدت ساهر بجوارها
ساهر :كده يا ليالي عايزه تحرقي قلبنا علينا
تنظر ليالي لساهر وعيونها تبكي في صمت
ساهر :اتكلمي يا حبيبتي قولي ايه اللي حصل قولي عمل فيكي ايه وانا مش هسيبه وهعرف اخد حقك منه
نظرت له ليالي :انا عايزه امشي من هنا
ساهر :عشان خاطري يا ليالي اتكلمي
ليالي :انا عايزه امشي من هنا
ساهر :ماشي يا ليالي بس انت مش هينفع تمشي النهارده
اغمضت ليالي عيونها :انا عايزه انام
ساهر :نامي وارتاحي يا ليالي
ساهر لنفسه :براحتك يا ليالي بس برده هعرف هو عمل ايه وساعتها محدش هيرحمه من ايدي
في منزل زين الدين
سهر :يلا يا ماما هنتأخر علي ليالي
صافيه :حاضر انا خلاص خلصت اهه انا مش عارفه ليه ساهر خلاني اروح امبارح وماقعدش معاها
سهر :هي مكانتش هتحس بينا جمبها ولازم ترتاحي عشان تقدري تراعيها
سمعوا صوت جرس الباب
صافيه :يا تري مين اللي جاي بدري كده
سهر :ده اكيد رائد كان قالي انه هيعدي علينا عشان ييجي معانا
قامت سعاد بفتح الباب ثم توجهت الي صافيه
صافيه :مين يا سعاد
سعاد :في واحده عايزه حضرتك تحت ومعاها واحد
صافيه :واحده مين نعرفها
سعاد :لا يا هانم اول مره اشوفها
صافيه :طيب قدمي لهم حاجه وانا نازله
سهر :ياتري مين دي
صافيه :يلا ننزل نشوف
نزلت صافيه وسهر الي الأسفل فصدمت صافيه
صافيه :آثار
آثار :وحشتيني يا صافيه
توجهت صافيه الي آثار وارتمت في حضنها
صافيه :مش معقول انا مش مصدقه عيوني انت آثار انت عايشه انت قدامي
آثار :ايوه يا صافيه انا قدامك
صافيه :وحشتني يا آثار ياه سنين كتير اوي عدت
آثار :وبعد السنين دي كلها اتقابلنا تاني
صافيه تنظر لعز
آثار :ده عز الدين ابني اخو بدر واخو ليالي
صافيه :ايه اخو ليالي ده يبقي ابن سراج الدين
آثار :ايوه يا صافيه هحكي لك كل حاجه بس الاول فين بدر عايزه اشوفه نفسي اخده في حضني
صافيه بوجه حزين :محدش يعرف هو فين يا آثار
آثار :ازاي احنا عرفنا ان بدر اتجوز ليالي
صافيه :اه هما فعلا اتجوزوا من شهرين وسافروا مرسي مطروح وبعدين ليالي بس اللي رجعت وهو مانعرفش عنه حاجه ولا نعرف ايه اللي حصل بينهم
عز :طيب ما سألتوش ليالي ليه
صافيه :حاولنا نعرف منها اللي حصل ما قالتش حاجه ليالي اتبدلت خرجت من هنا عروسه مع بدر زي الورده المفتحه ورجعت واحده تانيه خالص
عز :فين ليالي يا طنط
صافيه :ليالي في المستشفى
عز :ليه مالها ياطنط
صافيه :هي تعبت شويه فاحنا نقلناها المستشفي
سمعوا صوت جرس الباب
صافيه :شوفي مين يا سعاد
سهر :ده اكيد رائد خليكي يا سعاد انا هفتح
ذهبت سهر وقامت بفتح الباب وجدت رائد
رائد :انت لسه ما جهزتيش
ليالي :ادخل يا رائد
رائد :ايه ده انتم عندكم ضيوف
سهر :مش هتصدق مين اللي هنا
رائد :مين بدر
سهر :لا ام بدر
رائد :ايه ام بدر دي شتيمه يعني
سهر :لا مامت بدر هنا ومعاها واحد بتقول انه اخو بدر واخو ليالي
رائد :ايه ازاي يعني
سهر :انا مش فاهمه حاجه بس هما جايين يدورا على بدر وليالي
طب ايه مش هتروحوا المستشفى
سمعت سهر والدتها تهتف باسمها
صافيه :مين يا سهر
دلفت إليهم سهر ورائد
صافيه :تعالي يا رائد ثم نظرت الي آثار :ده رائد صاحب بدر
اقترب منه عز :انا عز الدين سراج اخو بدر واخو ليالي بدر فين يا استاذ رائد
رائد :اهلا بحضرتك بس انا بجد ماعرفش بدر فين هو مش بيرد على التليفون
صافيه :تعالوا نروح عند ليالي يمكن لما نشوفكم وتعرف انتم مين تحكي لنا عن اللي حصل ونعرف منها بدر فين
نهضوا جميعا واتجهوا الي الباب للخروج ولكن ظل رائد
سهر :ايه يا رائد واقف ليه مش هتيجي معانا
رائد :اه اسبقيني انت وانا هعمل مكالمه دقيقه وهحصلك
سهر :اوك هستناك عند العربيه
رائد :تمام
خرجت سهر وقام رائد بالاتصال ببدر
بدر :رائد خير ليالي حصل لها حاجه
رائد :لا يا بدر ليالي كويسه بس
بدر :في ايه
رائد :والدتك جت هنا يا بدر
بدر :انت بتخرف بتقول ايه
رائد:انا مش بخرف في واحده جت هنا عند عمك وبتقول انها والدتك ومعاها واحد كمان بيقولوا انه اخوك واخو ليالي
بدر :انا مش فاهم حاجه
رائد :ولا انا احنا رايحين عند ليالي دلوقت وهحاول افهم اي حاجه
بدر :انا جاي يا رائد
رائد :هتيجي ازاي يا بدر
بدر :هاجي عشان افهم
رائد :ماينفعش يا بدر تيجي هتقولهم ايه وكنت فين وايه اللي حصل
بدر :مهو انا لازم افهم مين دول وازاي اخو ليالي يبقى اخويا
رائد :استنى بس يا بدر انا هحاول افهم وافهمك بس انت تسمع كلامي وما تظهرش دلوقت
بدر :ماشي يا رائد
رائد :انا هقفل دلوقت عشان اروح معاهم
أغلق رائد الهاتف وذهب الي خارج الفيلا واستقلوا جميعهم السيارات وتوجهوا الي المستشفى
وصلوا الي المستشفى وتوجهوا الي مكتب ساهر
كان ساهر يجلس في مكتبه يفكر
ساهر لنفسه :اه لو تقع في أيدي يا بدر هخليك تندم على اللي عملته ووصلت ليالي للحاله دي بس ليه ليالي مش عايزه تحكي وتقول اللي حصل معقول يكون مهددها ثم قطع تفكيره دلوف والدته وسهر وأثار وعز ورائد
صافيه :صباح الخير يا ساهر ليالي عامله ايه
ساهر :صباح الخير يا ماما الحمد لله هي فاقت من شويه بس حالتها النفسيه ثم نظر الي والده بدر وعز
صافيه :اعرفك يا ساهر دي آثار والده بدر وده عز الدين سراج اخو ليالي ويبقى اخو بدر في نفس الوقت
ساهر :ايه مين انا مش فاهم حاجه
صافيه :اقعد يا ساهر واحنا هنفهمك
عز :قبل أي حاجه انا عايز اشوف ليالي
ساهر :ليالي حالتها النفسيه سيئه جدا ومش عارف اعصابها هتستحمل ولا لا انا كلمت دكتور رمزي دكتور الأمراض النفسيه عشان يتابع حالتها
عز :ليه هو ايه اللي حصل
ساهر :ليالي اتجوزت بدر وسافرت معاه ورجعت واحده تانيه وحاولت تنتحر امبارح واكتشفنا انها حاولت تنتحر قبل كده وهي معاه ومش قادرين نعرف ايه اللي حصل مش كده يا استاذ رائد
نظر رائد الي الاسفل وصمت
صافيه :مش وقته الكلام ده يا ساهر
سهر :ايوه احنا عايزين نفهم ازاي حضرتك والده بدر وكنت فين السنين اللي فاتت دي وازاي الاستاذ عز يبقى اخو بدر واخو ليالي
آثار انا هحكي لكم اللي حصل وقبل ان تسرد آثار حكايتها تفاجأوا ببدر يقوم بفتح الباب والدخول الي المكتب
رائد :الله يخرب بيتك يا بدر ايه اللي جابك
اقترب منه ساهر وقام بلكمه في وجهه لكمه قويه جعلته يرتد الي الخلف
ساهر :عملت ايه في ليالي ثم امسكه من مقدمه ملابسه :انطق رد عليا عملت فيها ايه انا مش هرحمك يا بدر
قام رائد وحاول ان يفصل بينهم
صافيه :خلاص يا ساهر سيبه
ساهر :مش قبل ما اعرف عمل فيها ايه
نجح رائد في الفصل بينهم
صافيه بصوت مرتفع :خلاص يا ساهر انا قلت سيبه
تركه ساهر :حاضر يا ماما
نظر بدر الي آثار التي تقف تنظر له بنظرات الحب والاشتياق ثم هتفت :بدر ابني
بدر :انت ايه اللي رجعك انت بالنسبه لي ميته من سنين
صافيه :ما يصحش يا بدر دي امك
بدر :انا مليش ام دي مش امي انا امي ماتت من زمان من يوم ما خانت ابويا ودخلته السجن وسابتني وهربت مع عشيقها
آثار :لا يا بدر انا مظلومه ابوك ظلمني
بدر :ما تجيش سيره ابويا على لسانك
آثار :لا يا ابني اسمعني ابوك سمع كلام عمتك كوثر وظلمني معاه انا ما خنتهوش ولا هربت مع عشيقي
بدر :والمفروض اني أصدق كلامك ده عمتي هي اللي فضلت معايا بعد ما رميتوا بابا في السجن
آثار :كوثر هي اللي عملت كل ده وهي السبب في دخول ابوك السجن
بدر :انت فاكره اني عيل صغير هصدق كلامك ده بعد كل السنين دي
عز :صدقها يا بدر
نظر له بدر :ومين بقى حضرتك اه انت المفروض اخويا واخو ليالي يعني انت ابن سراج الدين
عز :ايوه
بدر :لا انت مش اخويا انت عدوى وابن عدوى وانا هعرف اخذ حق ابويا منكم كلكم
ساهر :يعني ايه ابن عدوك يعني عمي سراج يبقى عدوك تبقى ليالي كمان عدوتك ثم اقترب منه وامسكه من مقدمه ملابسه :انا دلوقت عرفت ايه اللي وصل ليالي للحالة دي انت انتقمت منها عشان ابوها عدوك
رائد :ارجوك يا بدر امشي دلوقت ارجوك يا ساهر سيبه
صافيه بصوت عالي :خلاص يا ساهر سيبه
تركه ساهر ونظر له في عيونه :انا مش هسيبك يا بدر وهاخد حق ليالي منك
نظر لهم بدر جميعا ثم ترك الغرفه
نظرت سهر لرائد :اتفضل مع صاحبك ومش عايزه اشوفك تاني ثم أخرجت الدبله من اصبعها ووضعتها في يد رائد
رائد في زهول :ايه ده يا سهر
سهر :انت كداب ومخادع واتفقت انت وصاحبك على ليالي واذيتوها ووصلتوها للحاله اللي هي فيها دي
رائد :ارجوكي يا سهر اسمعيني
سهر :مش عايزه اسمع منك حاجه انا قلت لك لو طلعت عارف حاجه ومخبي عليا هيكون ده اخر حاجه بينا
رائد :ماشي يا سهر انا همشي ثم خرج رائد
ساهر :ليه ياماما خلتيني اسيبه انا لازم انتقم منه واخد حق ليالي
آثار :بدر مظلوم ومخدوع كوثر دبرت كل حاجه وفرقت بينا عشان تاخد كل حاجه وكرهت بدر وابوه فيا وفي سراج ووهمتهم اننا خاينين
صافيه :لازم نكلم زين ييجي دلوقت عشان نعرف نفكر ازاي نوصل الحقيقه لبدر
عند بدر توجه الي غرفه ليالي فدلف إليها وجدها شارده تنظر إلى الفراغ ودموعها تنساب في صمت
بدر :ليالي
فزعت ليالي من صوت بدر واغمضت عيونها وتمنت ان يكون الصوت الذي تسمعه ليس صوته
بدر :سامحيني
فتحت ليالي عيونها ونظرت له :ايه اللي جابك هنا
بدر :سامحيني يا ليالي
ليالي :انا مش عايزه اشوفك ولا اسمع صوتك ارجوك ابعد عني
بدر :هبعد عنك يا ليالي بس انا جاي اقولك حاجه واحده انت حياتك غاليه اوي وانا ما استاهلش انك تضيعها بسببي انسى اللي فات وانسيني كمان وانا اوعدك اني هخرج من حياتك للأبد
ليالي :للأسف يا بدر باشا اللي بيموت حياته بتخلص وانا مت خلاص وانا بطمنك انت قدرت فعلا تنتقم مني وتأخذ حقك مني وحتى لو حاولت تكمل انتقامك خلاص مبقاش يفرق معايا معقول فيه حد مات هتقدر تجرحه
نزلت دموع بدر من عيونه وغادر الغرفه والمستشفى كلها
كان ده كان
كان اسمه حبيبي
كان ده كان
كان يوم من نصيبي
ضحيت بعمري معاه مشوار
مشوار اسمه الحياة
و كان
أنا
أنا اللي بينكم هنا
رضيت بالعذاب لحد ما قلبي داب
ولا ذوقت يوم هنا
و أنا يا ما اتحملت أنا
قاسيت ولا اشتكيت
ولا جيت في يوم بكيت
منه لكم هنا أنا
لا عتاب حيشفي جراح ولا حيجيب إلي راح
دي حكايتي مع الزمان
الزمان الزمان حكايتي مع الزمان
رسم لي علي السما جنه فيها الهنا
و قال حنعيش هنا
قلت أحلوت سنيني
و بنالي في الخيال
قصور من الآمال و قال ما فيش محال
نمت و غمضت عيني
و مرت الأيام و صحيت من الأحلام
ما لقيتش غير آلام و عذابي مستنيني
و أنا
أنا إلي بينكم هنا مش عارفه رايحه فين
ولا فاكره جيا منين
جابني الطريق هنا أنا
و أنا
ياما تحملت أنا
دموع ما تنتهيش و آلام ما تتنسيش
لو فات مليون سنه
أنا
لا عتاب حيشفي جراح ولا حيعيد إلي راح
دي حكايتي مع الزمان
الزمان
الزمان
