جزء من الفصول المتقدمه
في مكتب احد الضباط داخل مكان حجز بدر نري بدر يدخل الي المكتب وقد تبدلت ملامحه حيث نبتت لحيته وملامحه يكسوها الحزن
بدر :ليالي
الضابط انا هسيبكم مع بعض شويه
خرج الضابط وأغلق الباب ووقفت ليالي تنظر لبدر وعلي وجهها ابتسامه
ليالي :ازيك يا بدر
بدر :لما شفتك بقيت احسن انا كنت عارف انك هتيجي تشوفيني
ليالي بابتسامه سخريه :مين اللي قالك اني جايه ازورك او اشوفك
بدر بدهشه :امال جايه ليه
ليالي :جايه عشان اشمت فيك
بدر :تشمتي فيا
ليالي :اه اشمت فيك جايه اشوفك وانت مكسور ومسجون فاكر يا بدر باشا لما خليت حسن يتهمني بالسرقه ودخلوني الحجز فاكر لما لفقت القضيه لساهر وخلتني ابوس رجلك عشان تطلعه فاكر انت عملت ايه الليله دي اكيد فاكر لان اللي بيدبح حد عمره ما بينسي هو دبحه ازاي علي فكره انا شهدت عليك انك قتلت حازم وقريب اوي حبل المشنقه هيتلف حوالين رقبتك
بدر بابتسامه سخريه :لو موتي هيشفعلي عندك ويخليكي تسامحيني يبقي انا مش خايف من الموت
ليالي :انا مش هحسامحك حتي لو مت الف مره انا عمري ما هسامحك بحق كل مره ذلتني فيها بحق كل مره اخدتني غصب بحق كل ليله عشتها في عذاب مش هسامحك اه بالمناسبه انا رفعت عليك قضيه خلع وهخلعك قبل الحكم عليك مع انهم نصحوني اني ما اخلعكش عشان لما تتعدم اورثك بس لا فلوس الدنيا كلها ما تساويش اللحظه اللي اشوفك فيها مذلول كده
بدر :انا مش زعلان من كلامك انت حقك تقولي اكتر من كده
ليالي :وانا مايهمنيش زعلك سلام يا بدر باشا
