عند حازم في المستشفى نجد حدوث هرج ومرج أمام غرفه الرعايه المركزه وركض الأطباء الي داخل الغرفه ويسأل العسكر ي المسئول عن حراسه الغرفه احد الممرضين
عسكري :هو فيه ايه
الممرض :المريض قلبه وقف
تقدم من العسكري شخص يرتدي بدله سوداء
الشخص :فيه ايه يا دفعه
العسكري :تقريبا الراجل اللي مضروب بالسكينه اللي جوه مات
الشخص :انت متأكد
العسكري :اه الممرضين بيقولوا كده
ابتسم الشخص وأخرج من جيبه بعض الأموال واعطاها للعسكري :تسلم يا دفعه خد دول عشانك
العسكري :كتر خيرك يا باشا
ابتعد الشخص عن العسكري وقام بالاتصال بمجدي
مجدي :الو
الشخص :مبروك يا باشا حازم تعيش انت
مجدي :انت متأكد
الشخص :طبعا يا باشا
مجدي :تمام اوي كده سلام
أغلق مجدي الهاتف ونظر الي كوثر زوجته
كوثر :ايه اللي في التليفون مفرحك اوي كده
مجدي :مبروك يا كوثر هانم حازم مات وبدر خلاص هيلبس الأحمر
كوثر :بجد انا مش مصدقه اخيرا هخلص من بدر احنا لازم نضرب ضربتنا التانيه وبسرعه لان بدر لو اتعدم ليالي وعز ولاد سراج وآثار هما اللي هيورثوا
مجدي :اهدي شويه لازم ما نلفتش الانتباه لينا مش عايزين حد يحس بينا او باللي بنعمله
كوثر :انت مش مالي ايدك من الراجل ده
مجدي :هو جاهز ينفذ في اي وقت بس نصبر لما بدر ياخد إعدام وانا سمعت انه هيطلق ليالي قبل الحكم
كوثر :ولو مطلقهاش
مجدي :الراجل بتاعنا اللي مراقبها عرف انها هترفع عليه خلع يبقى كده ليالي بره الورث
كوثر :وعز وأمه
مجدي :اللي خلانا نخلص من بدر نخلص منهم كمان وحلال علينا ثروه بدر كلها
ابتسمت كوثر :ياه امتى بس ده يحصل وابقى انتقمت من شهاب وابنه ومن آثار وابنها
في المستشفى عند حازم
خرج الأطباء من عنده
كان ساهر موجود في المستشفى
ساهر لاحد الأطباء :خير يا دكتور
الطبيب :الحمد لله قلبه وقف بس ربنا انقذه في آخر لحظه
ساهر :الحمد لله
الطبيب :بس هو لسه حالته صعبه وغير مستقره واحتمال ان اللي حصل ده يحصل تاني
ساهر :ان شاء الله خير وهيفوق ويقوم بالسلامه
كان الجميع في المستشفى مع آثار التي كانت في غيبوبه وكان عز يجلس بجوارها
دلف إليهم ساهر
عز :في ايه يا ساهر مالك
ساهر :حازم قلبه وقف ولحقوه في آخر لحظه
زين الدين :المهم هو لسه عايش
ساهر :الحمد لله بس احتمال اللي حصل ده يحصل تاني كبير وممكن
عز :ممكن ايه
ساهر :حازم حالته صعبه اوي وممكن ما يقدرش يقاوم ويموت
عز :لا انا عندي امل كبير في ربنا وحازم ان شاء الله هيفوق ويقول الحقيقه وبدر يخرج براءه
عند كوثر ومجدي
كوثر :يعني ايه لسه عايش امال ايه الاخبار اللي وصلت لينا دي
مجدي :الغبي فهم غلط هو قلبه وقف بس لحقوه وماماتش
كوثر :انا قلت لك من الاول ان وجود حازم لسه عايش خطر علينا لازم تنفذ اللي قلت لك عليه
مجدي :انت اتجننتي عايزانا نبعت المستشفى حد يخلص على حازم مهو كده بننفي التهمه عن بدر وبنقول ان فيه حد تاني خايف ان حازم يقوم ويقول الحقيقه وبعدين هنبعت له حد يخلص عليه ازاي وهو عليه حراسه كبيره
كوثر :معرفش يا مجدي اتصرف حازم لو فاق واتكلم هنروح في داهيه وبدر لازم يتعدم
هنا دلف إليهم محمد مدير مكتب مجدي
محمد :كنت عايزك يا مجدي باشا
مجدي :عايز ايه تاني يا محمد مش كفايه الزفت اللي بعته لحازم معرفش يخلص عليه
محمد :معلش يا باشا لسه له عمر
مجدي:وانت جاي دلوقت ليه عندك أخبار جديده ولا عندك حل المصيبه اللي وقعتنا فيها
محمد :كل حاجه وليها حل عندي يا باشا بس نتفق الأول
مجدي :نتفق على ايه ما احنا متفقين من الاول
محمد :لا يا باشا اللي حصل غير اللي اتفقنا عليه ولازم اتفاقنا كمان يتغير عشان اعرف اخلصكم من حازم وبدر للأبد
كوثر :هات من الاخر يا محمد عايز ايه
محمد :طول عمرك يا هانم بتحبي الخلاصه انا عايز زينه
مجدي :ايه
هز محمد راسه وابتسم :وفوقهم ٢٠ مليون دولار من ثروه بدر باشا
كوثر :انت اكيد اتجننت
محمد :لا يا كوثر هانم انا ما اتجننتش دلوقت حازم لسه عايش وممكن يفوق ويتكلم على كل حاجه او ممكن يموت وانتم في الحالتين لازم تضمنوا سكوتي واني اجيب اللي يشيل عنكم الليله كلها
مجدي :احنا اتفقنا كان ٥ مليون جنيه ممكن نخليهم ١٠ مليون
محمد :انا كلمتي واحده ٢٠ مليون دولار وفوقهم زينه يا إما
كوثر :يا إما ايه يا محمد بيه
محمد يا اما كل اتفاقنا مع بعض هيكون عند زينه علم بيه وبعدها هيكون عند البوليس
كوثر :ومين هيصدق اي كلام هتقوله
ابتسم محمد :اه انا اسف اصلي نسيت اقولكم ان كل اتفاقاتنا كانت متصوره صوت وصوره من اول اتفاقكم معايا اني اسافر ارجع حازم من بره لحد اتفاقنا بقتل حازم وتلبيس بدر القضيه
كوثر :اه يا سافل
محمد :سافل وحقير ومجرم وكل اللي عايزين تقولوه
بس انا اللي عندي قلته
لم يكونوا يعلموا ان هناك من تستمع لحديثهم ودلفت الغرفه
زينه :معقول اللي سمعته ده
فزع كوثر ومجدي عند دخول زينه
كوثر :زينه
زينه :معقول يا مامي انتم اللي قتلتوا حازم
كوثر :انت فاهمه غلط يا حبيبتي
زينه :ايه الغلط اللي فهمته انا سمعتكم بوداني انتم قتلتوا حازم واتهمتوا فيها بدر اللي المفروض انه ابن اخوكي
مجدي :انت لسه صغيره ومش فاهمه حاجه
زينه :القتل مفيش فيه صغيره وكبير ه انتم قتلتوا ومش هيبقى واحد بس انتم قتلتوا حازم وبدر هيتعدم وانهارت زينه في البكاء
كوثر :انت ما تعرفش حاجه ماتعرفش اللي انا شفته من اخويا ده ما تعرفش اللي عشته بعد وفاه امي وابويا اخويا ده اكل ورثي وخلاني خدامه لمراته وكل اللي اتمنيته وكان نفسي فيه اخذوه مني أثار وسراج وشهاب كان لازم يدفعوا الثمن هما وعيالهم والثروه اللي بيتمتع بيها بدر دي فلوسي انا ومن حقي انا
زينه :مفيش اي حاجه تبرر اللي انتم عملتوه
محمد :كفايه يا جماعه انا اعصابي مش بتستحمل المشاعر العائليه دي انا عايز رد دلوقت على طلبي
زينه :انت بتحلم انا عمري ما هوافق اتجوز واحد مجرم زيك وان كان على الفلوس هتاخدها وتغور بيها
كوثر :انا هكتب لك شيك بالمبلغ اللي انت عايزه بس زينه لا نجوم السما أقرب لك
محمد :اه بس اللي انتم مش عارفينه ان انا وزينه اصلا متجوزين عرفي
زينه :ايه انت كداب محصلش
مجدي :انت بتخرف بتقول ايه
اخرج محمد ورقه من جيب بدلته ووضعها أمامهم
محمد وهو ينظر لزينه :امضتك دي ولا لا يا حبيبتي
أمسكت زينه الورقه ونظرت لها ايوه امضتي بس لا انا مش ماضيه على حاجه زي دي
محمد :اه مهو انت نسيتي انك كنت بتمضي على ورق الصفقات وانت مش واخده بالك من الورق
اقتربت منه زينه وصفعته على وجهه
محمد ببرود وضع يده علي وجهه مكان الصفعه :انا مش هزعل منك على اللي عملتيه بس انا لآخر مره بقول قدامكم ٢٤ ساعه تفكروا نكتب الكتاب واخد ٢٠ مليون دولار وفي نفس الليله هيصلوا الجنازه على حازم وبدر يلبس البدله الحمرا يا اما انتم ادري بقى سلام
خرج محمد من المكتب ووقف مجدي وكوثر ينظرون لبعض في صمت
عند بدر في مكان محبسه حيث كانت له زياره
كان بدر يجلس بجوار زين الدين وعز الدين وساهر ورائد والمحامي
رائد :عامل ايه يا بدر
بدر :الحمد لله كل شيء خير من عند ربنا
عز :انت طبعا وصلت لك الاخبار
بدر :اه اخبار حازم وان قلبه وقف انا خلاص يا عز سلمت أمري لله وعارف انه مش هيظلمني حتى لو اتعدمت ده هيبقى قدر ربنا وتكفير عن كل اللي عملته انا بس ليا طلب عندكم
زين :ايه يا بني
بدر :سامحوني كلكم وقولوا لليالي تحاول تسامحني انا عارف انها صعب تسامحني بس انا عايز اقابل ربنا ومفيش حد زعلان مني
عز :بلاش الكلام ده يا بدر ان شاء الله ربنا هيظهر الحق وهتطلع براءه
بدر :مبقاش يفرق معايا غير انكم تسامحوني هي ماما مجاتش معاك ليه كان نفسي اشوفها
نظر عز الي زين ورائد وصمت
بدر :ايه يا عز ماما جري لها حاجه
زين :لا يا حبيبي آثار كويسه هي بس مش قادره تشوفك وانت هنا أن شاء الله تطلع قريب وتشوفها وتشوفك وتشبعوا من بعض
بدر :انا مش هكتب وصيه ومش هطلق ليالي عشان تورث مع ماما وعز يمكن اكون كده عوضتها عن اللي عملته فيها
نزلت دموع الجميع على حديث بدر وقام عز باحتضانه :لا يا بدر انت مش هتموت انت هتطلع براءه
وضع بدر يده على رأس عز :اللي عايزه ربنا هيكون يا عز
جاء العسكري وهتف فيهم :الزياره انتهت
وقف الجميع وقاموا بتوديع بدر وانصرفوا
عند كوثر ومجدي وزينه ساد الصمت بينهم فتره طويله حتى كسر صمتهم زينه
زينه :هنعمل ايه يا ماما
كوثر :مش عارفه مفيش غير حل واحد
مجدي :ايه هو
كوثر :نخلص من محمد
زينه :انت بتقولي ايه يا ماما عايزه تغطي على جريمه بجريمه تانيه هو خلاص مبقاش قدامكم غير القتل
كوثر :امال عايزانا نعمل ايه نسلم رقبتنا لمحمد ولا لحبل المشنقه
زينه :احنا لازم نبلغ عن محمد انه هو اللي قتل حازم
مجدي :ازاي يا زينه احنا كمان هنروح في داهيه انت ناسيه انه قال انه مسجل لنا اتفاقنا مع بعض
زينه :خلاص يا بابا انا موافقه اني اتجوزه عشان نأمن شره
