🌸✴عشقي المشوه ✴🌸(كرونيك باللهجة التونسية : مكتملة )

part 3

وساعت عينها موش مصدقة ايلي تسمع فيه " بالرسمي... علاش مسمامة معاك هكا "
رسيل طول فرغتلها قلبها و مانجمتش تخلي حاجة من غير ماتفضفض عليها ، مستحقة حد يسمعها و يواسيها ، تحب تحكي لشكون وهاي لقات راوية
"الله غالب ...هي هكا ..تعرف انا مانلومش عليها ولا على خويا ...نلوم على روحي ...قعدت كيف القضاء معاهم ...كارني شفت حل لحياتي ولوجت خدمة تساعدني وعملت على روحي من قبل "
"لا سامحني خوك ...غلط في حقك..بربي شكون بقالو ...انت اكاهاو ...مانحبش نكبرلك قلبك عليه...اما هو ماكارهوش يتصرف هكا معاك وخلي مرتو تسمعك الكلام ..عيب والله "
"انا كيت لهوني باش نرتاح شوية ...ونلوج خدمة و نبني حياتي من اول وجديد و نعيش من غير مانستحقلو "
"انت توا ارتاح بلڨدا هاك معايا ...واذا تحب تخدم تو نكلم عماد يشوفلك حاجة تساعدك "
"يعيشك... مغرقتني بفضايلك "
تبسمت " معادش تحكي هكا ...انت اختي توا ...وتحت مسؤوليتي ...ومن اليوم ...ايلي يوجعك يوجعني وايلي يفرحك يفرحني "
دخل عماد " مازلتو تحكو لتوا ...يارواية وخرنا على بابا راهو "
"ايه والله نسيت ..." خزرت لرسيل " شقولك تمشي معانا ..."
"لااااا سامحني ....انتي ماشية مع راجلك لدار حموك انا شماشية نعمل "
عماد " هيا قوم باش تجي معانا ...عيب علينا نخلوك وحدك وانت مازلت كي جيتنا ...."
"بربي سامحوني ...ان شاء الله مرة اخرى"
راوية " ميسالش يا عماد خليها على راحتها تاعبة تلقاها...اما تو غدوة تمشي معانا ...حمويا تاعب بارشا ها المدة ...لازمنا نطلو عليه كل يوم "
"ان شاء ماعندو سو ...وربي يقومو لاباس"
عماد "يعيشك... .اذا بدلت رايك قلي مادام راوية لبست "
تبسمت حاشمة وهي تخزرلو لاول مرة في عينيه " يعيشك...اما تو غدوة ناخو بخاطرك "
قامت راوية باش تحضر روحها وخلاتهم راس راس ، قعد عماد وريحتو تفحفح ، طيبة و بنينة ، موش كيف البوذروح ايلي مفشفشة منها ، قعد يثبت فيها وهي مهبطة راسها ،خشامة ،عاقلة ومتربية ...مااستغربش من محبة مرتو ليها.

مشى في بالها هي تتهرب من المشي اكاهاو ،اما كانت تاعبة بارشا ،اول ماحطت راسها ع المخدة تعدت في نوم طويل ولسوايع ...وقت فاقت كانت نص النهار ضربت ،قامت مربوثة اول مرة ترقد لها الوقت ، عملت دوش خفيف وشيحت شعرها وبدل حوايجها من بعد هبطت ،لقات راوية قاعدة في الصالة وفي يدها مجلة تورق فيها ،وقت شافتها قامت " صحة النوم يا عروسة "
"يعيشك يظهرلي دخلت في غيبوبة موش نوم "
ضحكت " هيا تعدى اشرب قهوتك راك متت بالجوع "
الفطور كان متاع ملوك ، حارت منين تبدا ، كل خاحة تحب تذوق منها ،كلات لين ملات كرشها ومعادتش منجمة تزيد بعدها حاجة ،من بعد خرجت مع راوية للجنينة وين قعدو يحكاو ويهرو ، بارشا حديث تقول يعرفو بعضهم من سنين ، لقاو رواحهم في العشية "اوووو. ....اول مرة نفلت الغداء هكا ...ههه يساعدني في الريجيم ههه "
"انت تعمل في ريجيم "
وبداو موضوع جديد اخر ،يهرو لين غابت الشمس وبدا الليل باش يطيح ، فاقو على وضعهم كان كي جاهم عماد ،باس مرتو من خدها ومد يدو لرسيل "هيا قومو ...جيت باش نهزكم " وجه كلامو لضيفتو " وانت رد بالك تقلي لا خلي نهار اخر "
تبسمتلو موافقة ، تبداش تتجبد وتتعزز عاد تكثرلها ،حاولت تلبس احلى واغلى ماعندها ،مالقاتش حاجة تصلح ، فرتت دبشها لعل تنسق لبسة مزيانة ، دخلت راوية وفي يدها روب في النيد "شو ...هاذي كانت تجي قدي من بعد ولات تجيني مكبوسة بالسيف نتنفس ، نتصور تجيك. .."
الحق الروب كانت جديدة ع الاخير ،ملبوسة مرة والا موش ملبوسة جملة "يااااا مااحلاها "
"قيسها ...وغدوة تو نهبط انا وانت نعملو شوبينغ هايل ...والله شاهيتو عندي بارشا وانت جيت من السماء "
"يعيشك يارواية والله الروب تقتل "
تبسمتلها بحنية " اكبس روحك والبس عماد راهو مايستناش ههه"
"باهي دريجين ونكون حاضرة"
تقول مخيطة ليها هي ، روب للركبة ،هي كاجويل اما مضخمة وعطاتها ريشة ،حست روحها للحظة بنت اكابر ،عملت شوية ماكياج ماحبتش تلكز بارشا ، كانت سامبل ، وزيد لبست تالون صغير حكاية تلاثة صانتي ، شراتو الصيف ايلي تعدى وماحطتهوش في ساقها ، زربت باش تهبط ، تحبش توخر وتخليههم يستنو فيها ، وقت دخلت للصالة لقات فيها كان عماد ،ابارامون راوية مازالت ماخضرتش ، هز راسو يشوف فيلي داخل ، اما عينو تحلت على كبرها ، و لقى روحو ياقف من غير مايشعر ، حركة لا ارادية عملها ،بلع ريقو وحاول يكنترولي روحو "ر...رسيل....ماااحلاك "
حمارو خدودها " يعيشك...الروب اكيد تعرفها ...متاع راوية ...عطاتهالي باش نحضر بيها...انا لبستي موش متاع البلاصة ايلي باش نمشيلها "
مازال باهت فيها وموش مسيطر على روحو ،ياسر طلعت مزيانة والروب واتتها اكثر من راوية ، حس ببدنو يعرق و سخانة تمكنو من غير مقدمات ، ايلي انقذ الموقف هو دخول راوية بالكومبينيزون النوار متاعها ، كانت زادا هي مضخمة ماتستحق كان كلمة "مزياانة ".
عماد هو ولد من اربعة اولاد ، لمالك اكبر شركات توريد وتصدير للالكترونيات، عيسى هو رجل الاعمال رقم واحد والمعروف حتى عالميا ،عماد هو ثاني اخواتو بعد خوه الكبير ادم من بعد يجي خوه زكرياء واخيرا خوه الصغير اسكندر ، بحكم بوه في للايامات ايلي تعدو مرض بارشا ولزم عليه الطبيب الرقاد في الفرش ، كان ضروري يزورو كل يوم ويطمن عليه .
واذا دار عماد كانت مضخمة ع الاخير ،فدار عيسى عبارة قصر ، تحل البحر و دايرة بيها جنينة اكبر من جنينة راوية ، تبعتهم وهوما يدخلو لصالة كبيرة ، تكلمت وحدة من الخدام " سي عماد تحبو تشىربو حاجة "
خزر لرسيل " جيب للمدموازال حاجة بنينة،انا وراوية باش نطلعو نشوفو بابا ،اتلهى بيها "
الحمد الله ماقالهاش زادا هيا اطلع سلم عليه ،قعدت وهي موش مصدقة انها في صالة كيف هكاكا ، بربي اش تتسمى العيشة ايلي كانت عايشتها قدام ها الشي ، هي ماكانتش تعرف شكون عيسى بالضبط ، ولا قداش ثروتو ، اما كانت على علم انو راوية معرسة براجل لاباس بيه ومن عايلة لاباس بيها ....وهي قاعدة دخل اسكندر ،استغرب وهو يراها اول مرة ، هو طفل في اول العشرينات ، لابس سروال مقطع على ركايبو و تريكو في النوار كيف النايك ار ايلي في ساقو ، شعرو قصير ع الاجناب ومخلي شعرات من فوق "شكون انت "
وقفت ووجها ولى احمر من الحشمة هذا ايلي كانت خايفة منو " انا ...من طرف مدام رواية "
"م
اختي راوية ماعندهاش اخت ....تقربلها مالا ..."
"انا قريبتها من بعيد "
تبسملها "،مرحبا " شافتو يكمل طريقها ويتعدى من غير ما يقعد.يبتبت ويعاود .
💚💜💙