🌸✴عشقي المشوه ✴🌸(كرونيك باللهجة التونسية : مكتملة )

🌸part 23 🌸

مدت يدها للشمس ...وخزرت للخاتم ايلي يلمع ....ضحكت بفرحة...بعد بشهر....باش تكون مرتو ....هكا كان قرارهم ...هي عايلتو وهو عايلتها ...و الباقي معادش يهمهم ...زادت في ضحكها وهي تتفكر في كلام نسيم " قعدت بارشا باش صفرت ...لين نستخايلكم رقدتو والا غرقتو وانا واقف محمل شمروختين وانوس ع الحجر "
سمعت صوت اطبطيب ع الباب ...شكون زعمة ...؟! مستحيل يكون زكرياء والا نسيم... اسكندر ؟...وسط جمعة يعني باز يقرى ...جيرانهم بعاد...مالا شكون ايلي جاي في ها الوقت ...هبطت تزرب وحلت الباب ،شهقت برعب وهي تشوف في عماد واقف قدامها ، لمعت عينو وهو يراها بعد شهور ....بشرتها ولت سمراء زادتها زين على زين ...شعرها الشتان ايلي هابك امواج على رقبتها والنسمة هازة منو سبلات ...."انت ....شنوة مجيبك لهوني "
"توحشتك..." بلا مقدمات وبلا ما يمثل دور الراجل الكلاس ....
"ها الكلام عيب ...انت راجل معرس فيق على روحك "
"انا توا مطلق "
قعدت مصدومة ....هي سبب في فراقهم....كيفاش باش تسامح روحها " وعلاش جاي لهوني "
"نحب نراك ونحكي معاك "
" وانا ماعندي مانحكي معاك ...برا يرحم والديك " حبت تسكر الباب ...حط ساقو باش يمنعها ، جبدها من مرفقها ليه...تمنعت وهي تدزو " الزم حدك ...ياسيد...فاش تعمل ...ماتخلينيش نفزع عليك الناس هوني ...يلا امشي من هوني"
"تحبو "
"نموت عليه " ورتو يدها " وعلى قريب باش نكون ليه وملكو وهو ليا وملكي"
شعلت فيه النار "تحبو وهو فار حبوسات وكلوشار "
"حتى لو قتال ارواح ...نحبو "
كبس على مرفقها " اسمعني مالا مليح " بان الشر في عينو ...وتكبست عروقو لين ولت ظاهرة في وجهو "باش تجي معايا بلا حس وبلا مشاكل "
صاحت " ايييه..شنوة طينتك انت ...واحد خنت مرتك وطامع في نساء رجال اخرين... عيب ها الشي ...مانيش باش نجي حتى كان تشعل صوابعك شمع والا تشعل بكلك "
"باش تجي...وبالسيف عليك ....خاطرك تحبو باش اتبعني وتعمل ايلي نقلك عليه والا ....هو ..وايلي معاه ...باش ياكلهم البحر... وحط على غرقو "
"شنوة معناها...باش تقتلو ...باس تقتل خوك على جال مرا "
"هو قبل حب يقتلنا ....المسلفة مردودة ...خذاك مني بالقوة وانا باش نرجعك بالقوة ..."
"انا تبعتو بارادتي....نحبو هو ومستحيل نحبك انت ...افهمها "
" حبو قد ما تنجم...انا بسلطتي انجم نخليكم الزوز تخززو في الحبس ..بتهمة الزناء....اه مالا ...عايشين مع بعضكم بلا صداق.....وانجم نلفقلكم زادا  حويجات اخرين كيما تهريب المرجان والا ....مخدرات ...والا سلاح...."
قاعدة باهتة فيه " اما الاسهل هو انو ...يمشي مايرجعش...بالنسبة ليا ولامو ...مايفرق شي ....خمم...يا تجي معاياوتخليه يعيش يا تخسرو  وتقرا عليه الفاتحة في ااجبانة "
"انت حيوااان "
ضحك " خمم ...وانا نستنى فيك تجاوبني "
"اعمل ايلي تحب ...انا مستحيل نخليه ...اذا قتلتو نموت بعدو ..."
صرفڨت الباب في وجهو وهي ترعش بكلها ...
✴❇✴❇✴❇✴❇

موش عارفة منين جابت هاك القوة ولا كيفاش نجمت تجاوبو وتتحداه...خايفة وميتة بالرعب منو ومن حضورو وخاصة من الكلام ايلي قالهولها...عرفتو وانسان باهي وسيس لكن تقلب ولى عبد بروح اجرامية هددها بحياة خوه ....قعدت لوطة لافة يديها على ركايبها ...ماتعرفش قداش تعدى وقت على حالها وهي سارحة ...لقات كان زكرياء ...يلف ذراعاتو عليها ويشم شعرها " اووووخ ....هكا رجعلي النفس "
دارت بلهفة وعنقتو بقوة " علاش قعدت لتوا ..."
ضحك " بالشوية ...بدني راهو محروق من الملح"
بعدت عليه وهي تخزرلو بعين فيها الف حكاية " كان لازم تروح بكري ليوم بالذات "
عقد حواجبو " ليوم بالذات لواه ...شفمة "
فاقت على روحها ...هي مالازمش تحكي ايلي صار ...موش لازم تكبر القلوب بين الاخوة ...لازم تلقى حل بينها وبين روحها وتحل ها المصيبة ايلي جات على راسها ...حاولت تخلق تبسيمة ترجعها لطبيعتها " لقيت روحي نتوحشك اكثر هاكي علاه "
ضحك لين مال راسو لتالي ، جبدها ليه وحاول يقومها " انت تعرف انو وقت يتحل الباب نحب نلقاك اول حاجة قدامي... وليوم انت خليتني مانراكش ..تعرف شنوة حسيت ماهو "
خزرتلو تتستنى فيه يكمل " انو الدنيا بلا بيك ظلام ..."
دفنت راسها عندو " ودنيتي بلا بيك ماتسواش "
في كل مرة تشوف وجهو ...كانت تتفكر كلام عماد....كل مايبطى عليها يطيح قلبها من بلاصتو وتقول هذا صارتلو حاجة...كل ماتسمع دقان ع الباب تقول هذي مصيبة جات باش تبعدنا على بعضنا ...تعدات جمعة وهي على هاك الحال ...كان قاري القلق في عينيها ...وحاسس بخوفها في رعشتها عندو....عارف انو بالها مشغول وقت يلقاها شاردة ....فمة في داخلها اسرار ماهيش حابة تقولهملو ....رغم انو حاول مانجمش يخليها تفضفض ولا تحكي ايلي بيها ....مضطر يخليها على راحتها كيف ما مستانس ...هي بالوقت تو تجي لعندو وتحكيلو .
الدنيا وجهين ...اما ابيض والا اسود...فرحة والا وجيعة ...شافت معاه ايامات كيف الخيال وعاشت معاه احساس بالدنيا ...جاء الوقت ايلي باش يتقلب الابيض ويولي اسود...نهارتها زكرياء روح غير عادتو بكري ....يزرب ومخو موش فوقو ،جراتلو بلهفة وهي تسأل " شفمة "
"الفلوكة تعبات بالماء وسط البحر ...وشوية لغرقنا ...."
"ونسيم ....نسيم وينو "
بحسرة " هزاتو الحماية ...."
شهقت " و...لاباس"
"شرب بارشا ماء ...ومانعرفش حالتو ...جيت باش نبدل حوايجي ونرجعلو "
"خليني نمشي معاك "
"باهي فيسع بدل حوايجك ...ماتبطاش"
ومية ولبست وقلبها يدق في المائة....زعمة ايلي صار صدفة والا  عماد عندو يد فيها ....اذا صارت حاجة لنسيم والا لزكرياء فهي المسؤولة الاولى ...هو نبهها لكن هي تحدتو ،رغم انها تعرف انو بفلوسو ينجم يعمل اي حاجة ...حتى لو لخوه ...بالاخير ...هو ما يحبوش علاش تستنى منو يحن ويروف عليه .
دقايق وكانو في السبيطار يسألو على نسيم ...لقاوه في بيت والطبيب يعاين فيه كاجراء روتيني ،
✴✴✴✴✴✴✴✴✴✴✴

جراتلو وهي ملهوفة وخايفة لا تكون صارتلو حاجة ، طمنهم الطبيب " مافماش حاجة تخوف الحمد الله عملتولو الاسعافات اللازمة ...هو توا باش يقعد معانا الليلة ...ومن غدوة تنجمو تروحو بيه "
حاول يقوم " يا دكتور راني ولد بحر ...لاباس عليا "
نزلت على اكتافو " لازم تقعد وتشد بلاصتك  "
خزرلها ومن بعد خزر لزكرياء ايلي قدم منو " مرة في حياتك اسمع كلامنا ..."
سلم امرو واتكى وهو يخزر لزكرياء " الفلوكة كانت لاباس البارح ..انا بيدي تفقدتها ....شنوة صار ...اكيد واحد من اولاد الحرام ...حب يردز بونتو علينا و نقبها "
تنهد وهو يمسد على كتفو " انت توا ارتاح ...ومن بعد يعمل الله...كان حد نقبها قاصد...انا نتصرف معاه "
معادش تستحق  دليل اخر ...باش تتاكد انو عماد كان صادق في كل شي قالو ...رعشت ساقيها ومعادش حاملينها ...خافت تتفضح خصوصي انو عينيها تعبات بالدموع وحست روحها باش تنهار وتقلهم كل شي ....وقتها ...نهاية نسيم ونهاية زكرياء....وباش تعيش حياتها حاملة ذنبهم في رقبتها ...خرجت بتعلة باش تاخو دبوزة ماء ...خذات هواء ملي رواريها وهي تحاول تتحكم في اعصابها ....شنوة ايلي باش تعملو ...الحل والربط في يديها هي ...قعدت على كرسي  حاطة يدها على صدرها ....شافتو جاي من اخر الكلوار و وجهو باين عليه التعب و الهم وزيد القلق عليها ،جاء جنبها وقعد وهو يشوف في وجها ملخلخ " شبيك....لاباس...كان حاسة بحاجة خلي الطبيب يشوفك ...امان ما تخوفنيش عليك "
نحات يدو من كتفها وهي تبعد في شعرها من على وجها ،نفخت وهي تحب تبان عادية " شي....مابيا شي ....جو السبيطارات ما يوالمنيش"
مرة اخرى هي تكذب وتخبي " رسيل ...شنوة مخبية...شبيك متبدلة...قلي  قلقك حد."
"مابيا شي قتلك " قالتها بقلة صبر ....لازم تكون اقسى من هكا ...هاذي فرصتها باش تعمل مشكلة و تقطع علاقتها بيه ....لكن موش منجمة ...خزر عينو ايلي مليانة محبة ...وجهو ايلي مبين قداش هو خايف عليها...عقدلها لسانها ومانجمتش تعمل شي ،رجع صوتها لين " ارجع بحذا نسيم...انا باش نروح...وتو في الليب نرجع نجيبلكم عشاكم "
قامت و زربت في الخروج...عارف هي قاعدة تهرب ...وماتحبش تحكي ...مضطر مرة اخرى يخليها على راحتها ..لكن صبرو عليها وعلى سكوتها يجي نهار ويوفى .
روحت وهي ترعش بكلها. ...سخانة ماكنة بدنها كامل ...دخلت حطت راسها تحت السبالة وخلات الماء البارد يهبط عليها ...خزرت لروحها في المرايا...شافت ابشع منظر تنجم تراه...هي وحدة بلا قلب ....منحوسة ...وين تحط ساقها حذا عبد تقلبلو حياتو ...من الاول امها وبوها وخوها ...من بعد عماد ومرتو ...وتوا زكرياء و صاحبو.... باما ذنب يصير فيهم هذا...يلعن بوه الحب والقلب اذا باش يكون سبب في موت بنادم ....باش تعفس عليه وتتعدى ....باش تشق قلبها بيدها ....المهم هو يعيش ....وجيعة الفقدان تو ينساها كيما نسى امو وتعود بغيابها ...اذا نجم ينسى المرا ايلي حابتو فهو قادر ينساها وبمحيها من حياتو .