يرعش بكلو تقول باش يسرق ، لو حد جاء وراه وقال كلمة هو ايلي قلبو باش يسكت ،جديدة عليه صنعة تهريب المرضى من السبيطارات ، استنى لين الكلوار فضى من الماشي والحاي ،هاذي فرصتو ولازم يستغلها باش يخرجها ، رجعلها لبيتها و عاونها باش تاقف وتنحي الخيوط ايلي مانجمتش تنحيهم وحدها .....هز معاه متاع الاكسجين لانو عارف باش تستحقها ، لمعت عينها بفرحة وضحكت "زيد كشخ...ياويلي ...شنوة ايلي باش يصير فيا وفيك اذا شلقو بينا "
شدها من يدها وسندها بيدو الاخرى وزرب ناحية الاصونصور...لازم يربح كل ثانية باش يوصلها لزكرياء ، هبط بيهم طول للراد شوساي ، عاونها باش تخرج ووجها يعاود يجري فيه الدم ....يلعن في روحو الف مرة ...هو هكا يكون يقتل فيها بيدو ...ركبها معاه في كرهبتو وعمللها السبتة وكمل حطلها الاكسجين اضمن لعل ماتنجمش تتنفس بلا بيه ، حتى من عينيها ضحكت و حكاتلو قداش هي ممنونة ليلي عملهولها ، طلع قدام الفولون وشد الطريق الطويل ...ماهمهوش شنوة الخطايا والا قداش باش يدفع ....المهم يوصل فيسع لوين زكرياء مفتس بكرهبتو على اخر فيتاس وطاير بيها طيران ...لين خطفو اكثر من رادار ، حب يطلبو و يقلو يعرضو ويربح الوقت معاه لكن هي منعتو ....كانت ا تتنفس نرمال وهو كل مرة تقريبا كل دقيقة يخزرلها ويثبت فيها ،يلقاها تتبسملو وبكامل نشاطها ، كان خايف ياقف قلبها في هاك اللحظة ...قبل ما تشوف زكرياء...قاعد يجري مع الوقت ويتعارك ع الوصول يا اما يوصلها للراجل ايلي تحبو والا الموت يوصللها قبل ....ضرب الفولون بغش ،مرة واثنين وتلاثة ،شدتلو يدو وهي تخزرلو بعين فيها لوم ، خزرة خلاتو يهدى و يحاول يكون طبيعي قدامها ....المسافة عملها في شطر الوقت ....طلبت منو يهزها لفلوكتهم ...البلاصة ايلي تحبها بارشا ..هذا اذا مازالت في بلاصتها ....وبالفعل ...لقاتها على حالها ...كيف ماخلتها ...ظاهر فيه من بعدها ما زارهاش ....هو مازال يحبها ...هكا طمنها قلبها المريض ....طالما هو مازال يدق ...فهو مازال يحبها ...وقت يقرر ينساها فقلبها يموت... موش عارف منين باش يجيب زكرياء ....ووين يلقاه ...معادش مركز وموش قادر يتصرف بالطريقة المناسبة حاول يخمم بالشوية ووحدة وحدة "هو ...توا ...يبدا في البرط ايلي باش يتبنى جديد....يعني قريب من هوني بارشا ..." شاورلها بصبعو " اهوكا ...تنجم تشوفو "
خزرت لوين شاورلها ...لببلاصة شانتي ماكانتش موجودة قبل " امشي جيبو وخليني هوني "
مفجوع "هو...ني ...ووحدك ....كيفاش باش نخليك في ها الحالة ...لا مستحيل تو نكلمو " جبد تاليفونو وقعد يطلب فيه ...لكن بالزهر ما يهزش " هز يا زكريااااء هز ...موش وقتو "
عاود طلبو على امل يتحصل عليه ،لكن مرة اخرى ما هزش" اسمع الكلام وامشيلو ...بالكرهبة باش تلقى روحك في دقيقة غادي.... مانتصورش كان مازالي دقيقة في حياتي " ضحكت ع النكتة الماسطة ايلي موش في بلاصتها
"كيفاش نخليك هوني ....نرمال في راسك "
"اسكندر ...ماتضيعش وقت ...امشي وجيبو ...هوني موش باش يجرالي شي"
قعد لحظات يخزرلها ومن بعد جرى للكرهبة وطار بيها للشانتي القريب .
❇✴❇✴❇✴❇
أنت تقرأ
🌸✴عشقي المشوه ✴🌸(كرونيك باللهجة التونسية : مكتملة )
Rastgele★الاسم " ♥عشقي المشوه ♥" ★ الكاتبة " N🅾D🅰 ★النوع " رومنسي ،عائلي ،اجتماعي ،تشويق ،اثارة .." ★عدد الفصول " 47 ★سنة الانتاج " 2019 " ★لمحة ع الكرونيك ⬇⬇: "عشقي ليك💛 ...حكاية حلمة 💛...غناية من جوارح القلب 💚....حبي ليك من ضلوعي ومن انفاسي 💜....ع...
