قاعد هو والمحامي في الجنينة وقت جاء اسكندر وقعد بحذاه " اه ...علاش طلبت تشوفني..." خزر للمحامي" شفمة "
تلفتلو زكرياء ومدلو دوسي كان ع الطاولة " هذايا ليك انت "
عقد حواجبو وحلو يشوف اش فيه ،قرى الورقة موش مصدق ،ثبت في خوه ومن بعد في نور الدين ايلي يتبسم " مانيش ...فاهم شي "
ضحك على ربثتو وبهتو " شنوة مكتوب في الورقة "
"المركز البريطاني الخاص لتكوين ......."
موش مصدق ايلي قراه ، كمل في بلاصتو خوه " تكوين كابيتانات البحرية ...موش هاذي حلمتك "
عاود خزر للورقة ، ومن بعدها طول نڨز على خوه وحملو" يااا باش تقطع علينا النفس " كبس عليه بكل قوتو " احلى زكريااااااء"
بعدو عليه بالسيف " بالشوية ...مازلت ماقلتش شروطي راو ..."
" موافق ...موافق...."
" اسمع ع الاقل ايلي باش نقولو "
"باهي ....هاني نسمع فيك "
"قبل كل شي لازمك تكمل العام ايلي مازالك في الفاك "
"حااااااضر "
"تمشي لبريطانيا كان للقرايا والتكوين اكاهاو "
"باااااهي "
"اياك ثم اياك تصرف الفلوس ايلي صبيتهملك في البانكة في حاجات تافهة "
"حااضر "
" تفاهمنا !؟"
" اكاهاو هاذم هوما الشروط "
" وي " ،
" انجم توا " حل يديه يستنى فيه يقبل التعنيقة متاعو ، حط يدو في الواجهة كم كوا شاد ڨارد باش مايكسرلوش عظامو بالتعنيق متاعو ، ترمى عليه تقول باش ياكلو ، صوت ضحكهم معبي الجنينة الكل ، والمحامي هو بدورو يضحك ع المشهد ايلي قدامو ، محمحت وهي تاقف وراهم بالضبط ،فيقتهم على وضعهم ،قام اسكندر من على خوه ايلي وجهو ولى احمر من الضحك ، عندها بارشا على ضحكتو ،رفرف قلبها لوجهو وهو يتبسم ،وايلي اول ماراها كشبر وقعد يريڨل في هندامو ويحاول يرجع جدي ، نڨز خوه الصغير لجنبها وهو يلعب في الورقة قدام عينها " قبطاااان قبطاااان "
ضحكت عليه وعلى طريقتو في الفرحة ، تبسم نور الدين على حالتو ،وقت شافو يشاورلو بيدو وراء رسيل باش يقوم ويخليهم وحدهم ،لمد اوراقو وحطهم في صاكو "انا لازم نمشي سي زكرياء "
"سي نور الدين مازلت حاجتي بيك ...ديجا المدام ماهيش باش تقعد بارشا"
وضحتلو " في الواقع ممكن ياسر نبطى وانا نحكي معاك "
زم شفايفو لبعضهم ماعجبوش كلامها ،قام المحامي ومدلو يدو " كلمني وقت تكمل تلقاني على ذمتك " تبسم بتربية لرسيل وهو يبعد عليهم ويخليهم راس راس ، جات في بلاصتو وقعدت ،من غير مايخزرلها "لخص كل شي في كلمتين ماعنديش وقت نضيعو "
حطت ساق على ساق دليل انو باش تاخو باااارشا وقت " ايلي باش نقولو ...ما يتحكاش في كلمتين "
كز سنونو "نسمع فيك "
"بما انو الوصية تقول انو اذا حد من العايلة استحق حاجة لازمو يجيك ليك انت ويطلبها ...وانا كفرد من ها للعايلة ...جيت باش نطلب منك طلب "
لسانها الطويل ولعبها بالكلمات وذكاها في التبهنيس مايغلبها فيه حد "وانا فاش انجم نعاونك مدام "
عدتها كلمة مدام وحاول تكون طبيعية " عندي فكرة متاع مشروع باش نصنع اكسسورات ونبيع ...ومستحقة لتمويل "
"تحب تقول انا باش نكون الممول متاعك "
"وي ...اعتبرو قرض والا شريك معايا...انت وشنوة تحب الصيفة "
"وشنوة يضمنلي نجاح مشروعك ....بالاخير انا موش باش نطيش فلوسي "
"انا نضمنلك "
"انت موش ضمانة " حب يقلها كنت مضمن عندك قلبي ومااستحفضتش عليه كيفاه باش نضمن فلوسي !؟" لازمك ع الاقل تكون عندك خبرة والا شهادة تثبت الكفاءة متاعك "
"لا ماعنديش"
وقف باش يحط اخر نقطة في حديثهم " معناها ...انا نرفض اقتراحك "
عطاها بالظهر ماشي " يظهرلي فيك بديت تخلط في الحاجات الشخصية في الخدمة .....وزيد....الشهادة والخبرة موش شرط باش تنجح وتكون صاحب مشروع...ديجا انت مالك لشركات ومصانع بلا ما تكون عندك حتى ادنى فكرة عليها "
ضغط سنونو وكمل طريقو وخلاها تفرك وحدها من وراه .
❇✴❇✴❇✴❇✴❇✴
أنت تقرأ
🌸✴عشقي المشوه ✴🌸(كرونيك باللهجة التونسية : مكتملة )
Random★الاسم " ♥عشقي المشوه ♥" ★ الكاتبة " N🅾D🅰 ★النوع " رومنسي ،عائلي ،اجتماعي ،تشويق ،اثارة .." ★عدد الفصول " 47 ★سنة الانتاج " 2019 " ★لمحة ع الكرونيك ⬇⬇: "عشقي ليك💛 ...حكاية حلمة 💛...غناية من جوارح القلب 💚....حبي ليك من ضلوعي ومن انفاسي 💜....ع...
