🌸✴عشقي المشوه ✴🌸(كرونيك باللهجة التونسية : مكتملة )

✴💚part 20 💚✴

و اخيرا جاء ايلي حاجتها بيه ،
سألها "هي ...اش عملت ليوم "
تقول كانت تستنى فيه يسألها " كان نحكيلك ...ليوم فمة راجل ...قول بغل ...جاء لمرا زوالية وطيشلها حوتها وقلها اقلب عليا منظرك من هوني ،ريحة حوتك جيفة " غلظت صوتها تقلد عليه " والمرا تسخف "
زكرياء" هي ...وشنوة عملت المرا"
"دزها بلا شفقة وبلا رحمة وهي مسكينة سكتت...تمنيت نعطيه طريحة وقتها نشعفو ...اما الله غالب "
قعد ساكت " اما انا ماسكتش ...قتلو موش رجولية تعامل مرا اكاكا وزيد في مقام امك ....تعرف اش عملي ...دزني ...لا لا ...ضربني هكا " ضربت نسيم بمرفقها على كرشو " ماجاتش في كرشي ...اما جات في كتفي "
ورتو زدنها " شوف احمر ..."
خزرتلو تشوف في ردة فعلو ،اما هو عادي جدا ، رجتو " نحكي معاك...ياخا موش باندي انت ...وتضرب وتعمل اك الفازات ...وريني مالا ...نحبك تضربو "
مط شفايفو " ياخا موش قتلي مالازمش نعمل عركة ...موش نبهت عليا نشد ببوشتي ونكون انسان عاقل "
"اما قتلك للضرورة تضرب "
"وقتاش قلتها هاذي"
تمتمت " قلتها في قلبي هاكي علاه ماسمعتهاش"
قامت وڨحرتلو " محسوب ... مانستحق حد راهو ...تو نتصرف معاه وحدي " عفست نسيم قاصدة و طلعت في الدروج الحديد وهي تعفص بقوة باش تعمل صوت ....دارت ناحيتهم " متغششة وغدوة مانيش باش نحكي مع حتى واحد فيكم "
كانت جدية في كلامها ...الصباح صبحت هازة عليهم خشمها حتى صباح الخير ما ردتهاش ، لبست مظلة البحارة و شدت طريق السوق ، حالتها تضحك ...صافنة على ذراعاتها تحب تخوف ...رغم انو طلعت كيف البهلول ...لوجت ع المرا الزوالية وتعبت لين لقاتها ....رجعت لبلاصة لبارح اما بعدت شوية على نصبة الراجل الغدنفر "بقداش السردينة "
هزت المرا راسها وكي لقاتها هي تبسمت وضحك وجها ووقفتلها "صار هو ...انت "
ضحكت بكل نشاط " ايه انا ...واسمي رسيل "كي شافتها مستغربة من الاسم ، مسدت على كتفها " تي عيطلي باي اسم يعجبك ...هيا بقداش السردينة "
"ليك انت بلاش ....خير الكعبات ايلي تحبهم "
حست بسهم يضرب قلبها ....رغم انو هاكي كل ماعندها... ورزق اولادها ...ايلي اضطرت تخدم عليهم وهي في ها العمر الا انها عطاتها بلا حساب ...بدات تخيرلها في الكعبات الباهين وتحط...
"اييييه ...شنوة ها الحالة هاذي"
تلفتو الزوز للراجل صاحب الوشم " انتوما الزوز عاملين بلعاني "
واجهتو بلا خوف" وانت شكون سيادتك باش تخرج الناس وتمنعهم انهم يسترزقو اه "  حاولت تخلي صوتها قوي وفيه نبرة تخوف ...الناس ايلي فم باهتين....منين ها الطفلة وكيفاش تحكي مع هذاكا بالذات من غير ما تخاف ....رغم انو بينعم وبين رواحهم اعترفو  انها مرا قوية وقالت ايلي مانجموش هوما يقولوه
❇❇❇✴

كلامها قدام الرجال الحاضرين شعل نارو ...وشاف روحو صغير ...دزها بقوة وهبط على ڨاجو المرا ايلي ترعبت وهربت وخلتهولو ...المهم تمنع بجلدها ...كان معمل يطيش ايلي فيه على طول يدو " وقت الصيد يقول كلمة يعني يوفى من بعدها الكلام " (الصيد هو الكنية متاعو في السوق فم "
عفس بساقو ع الڨاجو " من وقتاش وليت صيد ولازم نسمعو كلمتك "
هز راسو لقاه زكرياء ...من الربثة وخر خطوتين ، وساعت عينو وهو يرى في عينيه تلمع غش، المرا وقفت وشدت في رسيل ...هي بيدها خايفة منو ...تدعي ربي يسلكها على خير لا تولي ضارب ومضروب ..وشوشتلها " ماتخافش....جاء ايلي باش ياخولك حقك "
حب يظهر روحو فحل ، خاصة انو الرجال تلمو عليهم ، كبس بونيتو وحب يضربو اما زكرياء لوالو  يدو وضربو بساقو طوالو  ركبتو جابو راسو لوطة " الثعالب ماتوليش صيودة "
جبدو من شعرو لتالي وخلاه يشوف المرا الكبيرة " شفتها هاذيكا ...رد بالك تجي نهار على ساحتها...وهي تنصب بحوتها وين تحب ...ان شاء الله حتى ريحتو منتنة وقتال "
دزو وقام ناحية الناس الملمومة " كلامي للناس الكل ...حد مايقرب ناحية المرا هاكي...هي على ضمانتي من اليوم  "
تبسمت رسيل وهزت اكتافها بكل فخر ، وشوشت مرة اخرى " هذاكا حبي " ...وساعت عينين المرا وهي تثبت فيها ،غمزتها وابضحكة مالية فمها " شفت قداش رجولي ...بكلو رجولية "
عاونت المرا تلم دنيتها المفرتة وهي ساعة ساعة تخزرلو وهو يبعد ، يخليهملو ملا وهرة عليه ...اذا فمة صيد راهو هو ...اخ كليت على قلبي وشربت ...كملت معاها و خلطت عليه ...حطت يدها على قلبها وهي تلهث من الجري ..." نهار باش تقتلني ...اع ع ع ....ملا جبدة جريتها " شدت في المرفق متاعو وهي تدحنس عليه " الثعالب ماتوليش صيودة " قلدت صوتو وتكشبيرة وجهو 
ضحك وجبدها عندو " تحبني باندي مالا ...اه " قرص خدودها وماحبش يسيبهم ....وايلي هذا حال فمو وباهت ...لا اله الا الله ....هذا زكرياء؟...
"علاه ماقتليش انت جاي "
"وعلاه نقلك "
"باش نزيد نسبو اكثر ونفرغ قلبي فيه اكثر "
"صار انت خايفة منو ...وانا ايلي في بالي رمبو "
"تي ميتة بالخوف ...دوب مادزني هكا بصبعو حسيت عظامي تفتفتت "
وقف وتفقدها " وجعك "
ضحكت " باااارشا ...اي ..." كل مرة تحط يدها على بلاصة ،كتفها ،مرفقها راسها ...كرشها " اي في حالة ...موش منجمة نتحرك " لمعت عينها بخباثة " هزني على ظهرك"
عض على لسانو وهو شالق بتبهنيسها ، ضربها على خشمها ودزها قدامو وهو شادد اكتافها " لازم انحيلك الدلال هذا "
طريق كامل للدار وهو يضحكو وهي تسيب في الدلال متاعها وتحبو يحملها و الا يهزها على ظهرو وهو يتهرب منها ، وصلو قدام لباب ...لقاو اخر شخص توقعوه يجي لفم .
❇❇❇❇❇❇❇❇

الحقيقة ماكانتش متوقع حاجة كيف هكا ...لكن صدمتها كانت اخف من زكرياء..ايلي قعد ثابت ويخزر لاسكندر...حاجتين ينجمو يكونو جابوه ...يا اما امو بعثتو باش يكمل يحطملو حياتو اكثر ملي حطمتها هي ...يا حاجة صارت بوه
سالو " بابا لاباس"
طمنو " لاباس "
بحكم واقف قدام دارو فمضطر يدخلو ، قامت رسيل بالواجب وجابتلو قهوة ...اول ماذاقها لقاها بنينة غير ايلي مستانس بيها في الفيلا ، لقاهم الكل يخزرولو بعين مليانة شك ولهفة
تبسم " أمي ...ماتعرفش انو انا هوني "
هذا يعني انو مابعثتهوش ...حاجة تفرح ع الاقل "حد من الدار مايعرف انو انا هوني زادا"
استغرب " وعلاش هذا الكل "
"حبيت نعدي ايامات في البحر ...ولقيت هاذي اكثر بلاصة نكون فيها مرتاح "
باين يكذب لانو الغنية ايلي كيفو مايتلفتوش لبلاصة كيف هاكي " وعلاش اخترت الدار هاذي بالذات "
"لانو وقت سألت نعتوني ...قالولي اذا مالقيتش بلاصة تبات فيها ...تنجم تعدي ليلتك فم "
هاذي كذبة اخرى ...اذا سال فمستحيل ينعتوه على دارو بالنسبة ليهم ...خط احمر ما يتجرأ حد يحكي عليه .
"اذا امك عرفت انك هوني باش تصير بارشا مشاكل ...وانا وعدت بابا انو نبعد ....ونبقى بعيد "
هز اكتافو " وانا ماجيتش ع المشاكل ...خليني نقول انو ...جيت باش نتعلم البحر... انت تعرف انو انا كانت حلمتي نكون قبطان ...نسوق بابور ونسرح بيه في البحورات "
بكل براءة سالتو " وعلاش ماحققتش حلمتك وانت عندك كل شي ماتستحقش "
خزرلها "غالطة.... انا مانملك شي ...وتوا لقيت روحي حتى شي." خزر لزكرياء" ماكانتش فمة فرصة نحكاو فيها ولا نقعدو راس راس ولا حتى نخرجو مع بعضنا كيف زوز خوات ...جيت لهوني على امل نبناو حياتنا من اول وجديد..."
تلفتتلو  بفرحة لقات عينو تلمع غير العادة.... وجهو جرى فيه الدم والاكيد انو دخلاني قلبو باش يفرفط 
كمل اسكندر كلامو " اذا مايقلقكش ...حاب نعدي ايامات معاك هوني ...منها نكون قريب منك ومنها نحكاو ومنها انا ع الاقل نعيش الحلمة ايلي تمنيتها "
كاينو في حلم...والا عقلو صنعلو خيال باش يصدقو....ياما تمنى واحد من خواتو يكون معاه . .وبجنبو ...يعطيه المحبة متاع الخوه ويوفرلو الاحساس متاع العايلة ...سرحتو خلات رسيل تاخو القرار في عوضو. ... .وقدام بهتتهم جاوبتو " بالطبيعة مرحبا بيك....اما على شرط "
عقد حواجبو " وشنوة الشرط "
شاورت لفوق للبيت ايلي في العلي " هاكي بيتي انا رد بالك تطمع فيها "
"مشات معاك "
ضحكت ولقات روحها كان هي تضحك...لكن مايهمش بعد ايامات تو كل شي يتبدل ....يقل التوتر هذاكا  ....وتتحل بارشا ثنايا بين الاخوة ....توا لازك تضرب الحديد وهو سخون ....وتستغل الفرصة ايلي جاتها ليدها باش تقرب بيناتهم....فرصة باش تداويلو جروح قلبو وتعطيه امل يعيش على جالو ...بما انو اسكندر جاء ومد يدو للصلح....فهي باش تعمل المستحيل باش تحط فيها يد  زكرياء المترددة.