طبطب الباب ...ضحكت بهستيريا تقول جنت وطار عقلها ....كزت سنونها بغل ولمعت عينها بكره...هذا اكيد عماد...كيف الكلب ...جاء باش يعض الساق المريضة ...ضربت القاعة بساقها بغل وهبطت الدروج ودمها يغلي غليان ...حلت الباب وهي تصرفڨ في الفردة متاعو ع الحيط...كيف ماتوقعت هو...تبسم بخباثة زاد علي بيها ...نڨزت عليه وهي تشدو من خناقو وترجو بقوة " يا حيوان...انت شنوة اه ..شنوة ...كنت باش تقتل خوك "
ضحك وهو يستحلى في يدها عليه،عاجبتو الحكاية تقول تبنن بيه ...دزتو بعد ماعرفت انو جهدها مايكفيش باش تربيه وترجعلو شاهد العقل ، خزرتلو باحتقار " برافو ...هاك طلعت انت الرابح ...وانا باش نمشي" صاحت بقوة لين ڨراجمها قريب تبح " باش نخليييه " ضربتو بيديها على صدرو " انت لازم تبعد عليه ...ماتخاولش تضرو مرة اخرى ...ايلي عاناه مكفيه. ..يزي بلا انانية " شدها من يدها "اذا انت كنت عند كلمتك انا باش نكون عند وعدك"
"وعدك؟...خنت مرتك بعد عشرة وطيشتها على طول يدك...وجاي بقلة اصل وواقف وتحكي ع الوعد "
بدات اعصابو تتكبس" رسيل ...قاعدة تتعدى في الخطوط الحمراء رد بالك "
"شنوة باش تعملي ...اه....باش تغرقني ...باش تقتلني " ضربت صدرها " ديجا قتلتني ...يا حيواااااان ...ذبحتني وقطعت عليا النفس"
رق قلبو لحالها وهو يشوف دموعها وشفايفها ترعش "رسيل " حب يشدلها يدها الاخرى ..بعدت عليه " ايجا معايا ..."
نطرتلو مرفقو " لاااااا...موش بها الطريقة باش نمشي ....مستكثر عليا حتى باش نودعو....خليني ع الاقل نحكي معاه ...ويكون عندي ذرة ضمير و نقلو علاش باش نخليه "
"انت ماكش باش تقلو حتى شي ...والا ايلي متفاهمين عليه باش يمشي في الريح ...."
بغل" انا اصلا نحشم باش نقلو السبب الاصلي. .شي يقززني ...الخو باش يقتل خوه ..وتوا امشي ...ابعد...."
"باش نستناك العشية ....لازم تجي "
زمت شفايفها وڨحرتلو ...عاودت صرفڨت الفردة متاع الباب وسكرتها. ..سمع صياحها وضرب الباب ....نفخ بقوة ....بعمرو ماتخيل روحو يكون بها القسوة ...شنوة ايلي تبدل فيه باش يكون هكا ....هي السبب ...ملي دخلت حياتو وكل شي عمال يضيع منو....ع الاقل يكسبها هي ويضيع خسارتو ...
مدت ساقيها ع القاعة وقعدت تبكي وتنوح بالصوت ...فرغت هم قلبها لين معادش عندها دموع تبكيها ...بدنها الكل تخدر ...وعينيها ولت جمرة ...موش منجمة تهز روحها وتاقف ...رزنت وموش قادرة تعمل شي ....مجبورة تقدم ها الخطوة وتمشي بيها لموتها ....باش تقتلو و تغدرو بسكينة حافية ...هي ايلي وعدتو وخلفتلو جامي تخليه ...لقات روحها تذبح قلبو بيديها ....باش يكونلو جرح ينزف حتى للموت ....سبق وتخلو عليه. ..وهي باش تعمل كيفهم ....تحاملت على روحها وقامت ...حاولت تغطي ايلي في وجهو من اثار الدموع ...و استوت حالتها .....هزت اوراقها في صاك يد صغير ...و قررت تخلي الباقي وراها... دبشها....اكسسواراتها ايلي صنعتهم وحضرت منهم بارشا على اساس باش تبدا تبيع فيهم ....لكن باش ترمي كل شي توا ...قلبها وحبها وحلمتها وعايلتها الصغيرة ....باش تمشي من غير ماتتلفت وراها ...خزرت اخر خزرة بعين مكسورة لتراكن الدار ...غمضت عينها تتحسس في ريحة البحر الداخلة ...ملات كيانها بحس ذكرياتها معاه ...بضحكهم و بلعبهم....خرجت وجبدت الباب وراها ....رغم انها في خرجت من الدار ...وباش تمشي في شوارع واسعة ...وكياسات مليانة ...الا انو احساسها كان عبارة دخلت لزنزانة ..مربوط وخلى الحرية وراه ...
❇✴❇✴❇✴❇
أنت تقرأ
🌸✴عشقي المشوه ✴🌸(كرونيك باللهجة التونسية : مكتملة )
Random★الاسم " ♥عشقي المشوه ♥" ★ الكاتبة " N🅾D🅰 ★النوع " رومنسي ،عائلي ،اجتماعي ،تشويق ،اثارة .." ★عدد الفصول " 47 ★سنة الانتاج " 2019 " ★لمحة ع الكرونيك ⬇⬇: "عشقي ليك💛 ...حكاية حلمة 💛...غناية من جوارح القلب 💚....حبي ليك من ضلوعي ومن انفاسي 💜....ع...
