🌸✴عشقي المشوه ✴🌸(كرونيك باللهجة التونسية : مكتملة )

💙✴part 26 ✴💙

قاعدة ع القاعة وماقعدش فيها حيل باش تزيد تبكي ، وجيعة محطمتلها قلبها ،حاسة انها ضايعة ومتمنية الموت يجيها ويخلصها من الهم والغم ايلي فيها ،كلاتها صوابعها الف مرة باش تطلبو وتسمع صوتو حتى من غير ما تتكلم ...عقلها كل مرة يتخيللها سيناريو ، زعمة عمل في روحو سبة ...زعمة وحدو وموش لاقي حد بجنبو ....تخيلت انو مطيش في بر يقاسي في الموت ولا حد لوج عليه .
دخل عماد لقاها ع القاعة ومتكية بظهرها ع الفرش ،غاضو حالها وهو يرا فيها تمسح دموعها وتلفت وجها عليه
"فماش علاش تقتل روحك بالبكاء...وانت تعرف مليح انو شي ماهو باش يتبدل ...حتى لو عديت بقية حياتك تبكي "
وقت ما سمع منها شي كمل " حكيت مع امي بخصوص العرس ...وهي ماهيش قابلة الحكاية...اما هذا مايمنعش انو انا وانت باش نعرسو "
باقي ما حكات شي" انت حبيت الشخص الغالط...زكرياء موش الانسان ايلي يصلح بيك...فمة حاجات انت ماتعرفهمش عليه وانا نعرفهم...لذا احمد ربي انك سلكتها وبعدت عليه وزيد شكون ايلي تنجم ترفض فرصة كيف ايلي جاتك....واحد من اعيان البلاد شاريك بالغالي ...ياخا نسيت روحك انت شنوة ...مانيش نهين فيك اما ...حياة كيف  ايلي باش نعطيهالك بالنسبة ليك حلمة تتمنى تحلمها مةش تعيشها "
نزلت دموعها مرة اخرى، فقرها وقلة حيلتها و غياب عايلتها هو السبب في كلام الاهانة والمذلة ايلي تسمع فيه " انت شفت قداش انا انجم نكون انسان باهي وناخو بخاطرك وندللك ونعيشك في عز وفرحة ....اما علاش مصرة اتبع الطريق الواعر "
هزت عينها المضببة بالدموع " انت بالنسبة ليا ....اكثر انسان مجرم ومايسواش"
شدها من شعرها وجبدها ليه ،تأوهت عندو خلاتو يرخف يدو عليها " ايلي تفاهمنا فيه يقول انو لازم تحكي معايا بتربية واخلاق وتتصرف كيف مايلزم اي مرا تتصرف مع راجلها ، والا نسيت "
سيبت شعرها من يدو وبعدت عليه ،ودموعها زادت على قدام ، في مخو لازم يكون قاسي ويفرض سيطرتو عليها وفي قلبو لازم يمشي ويعنقها عندو ويطلب السماح ،بين هذا وهذا قرر يخليها ويخرج فماش ماتعمل عقلها في غيابو وتراجع روحها مليح.
الايامات ايلي تعدت من بعد ماكانتش خير ملي فاتو ، ع العكس عاشت تقول انسانة في قبر ...مطيشة في البرتمان ...ماتاكل وتشرب كان اللازم ، طول النهار مطيشة تبكي وتمسح في دموعها ،قعادها وحدها زاد كمل على مرمتها لقات روحعا تتفكر كل شي عاشتو معاه...كل شي يتعاود عبارة فيلم قدام عينها ، تخيلت وجهو بارشا مرات وهو ياقف قدامها ...حنيتو ايلي ماتوفاش و قلبو الكبير ايلي يخبيها فيه ، تشوفو كيف الخيال يتبسم بجنبها لكن وقت تمد يدها باش تشدو تلقاه ذاب وتبخر ...تعاود كريز بكاء جديدة ...عماد مالقى معاها حتى حل قعد في كل مرة يقول تو استانس ...تو الوقت ينسيها...تو الكروح تبرا وهو يعوضلها غيابو ، لكن هي كل يوم تزيد تحبو اكثر من قبل ..والفراق مازدها كان وجيعة و تعلقت بيه اضعاف ...رغم هذاكا  ماتراجعش علي نوى عليه حتى امو وعرعورها ايلي مايوفاش ليل وصباح وين تراه تشعل فيه وتعملو عركة و تهددو انو لاهو ولدها ولا يعرفها ...موش هذا برك مام حتى اظم حاول يحكي معاه و يناقشو ويرجعو للطريق الصحيح... اما هو تقول حاجة وماصدق باش لقاها ...هو اصلا موش مصدق روحو انو مكبشة فيها بهاك الطريقة .
❇✴❇✴❇✴
واقف  ع الحجر وشارد في الموج تحتو ...في عالم اخر... على بعد امتار منو وقف اسكندر و نسيم والزوز يخزرولو متأسفين "ماانجمش نصدق انو رسيل تنجم تعمل فيه هذا ...انا متأكد انو تحبو وتموت عليه بالضبط كيف ماهو يحبها ....انا كنت شاهد على حكايتها من اولها ...وكان كل شي على عيني ...مخي ما يستوعبش انو هي تخونو مع خوه وتمشي وتخليه هكا من غير مقدمات " خزر لاسكندر " وغير هذا ....لو جات في نيتها تخليه كانت ترفض انها تعرس بيه ...موش تقبل و تقرر معاه الميعاد "
الخبر كان جديد ،استغرب " كيفاش قتلي !؟...عرس وقررو الميعاد !؟ "
رمش عينو موش فاهم ، مط نسيم  شفايفو  وتنهد متأسف " ايه وي...يظهرلي حد ماقالك ...اما من ايامات قليلة حكاو في ها الموضوع وانا كنت شاهد...كانو الزوز فرخانين فرحة ماتتصورهاش" تقول تفكر حاجة والا جات لبالو وقتها ،تلفتلو " زعمة ماصار شي في غيابو....ما هددها حد...ماخوفهاش شكون ...." ضرب كفوفو " اكيد هذا ايلي صار "
اسكندر وهو يخزر لخوه " لا...مانتصورش ...انا بيدي سألتها وهي مانكرتش ...لو جات فمة حاجة راهي قتلي ..."
فخ نسيم " لكن ....هي ماهيش من هاك النوع ...عقلي مايقبلهاش ...ماانجمش نستوعب انو خلاتو وتخلت عليه بها السهولة "
"لازم نلقاو حل ...خلينا نحكاو معاه ...نفهموه ..لعل بالحديث يرتاح و يخرج ايلي في قلبو " هم باش يمشيلو لكن يد نسيم منعتو " انا نعرف زكرياء من اعوام...في حالات كيف هكا هو يقعد وحدو ...مايحكيش حتى كلمة ...يدفن وجيعتو في صدرو ومايخرجهاش مايقسمش مصيبتو يقعد يعاني ويتعذب من بعد يقوم اقوى واقوى"
سكت لحظات " نسيم ....احكيلي عليه...ميفاش عدى ها السنين وحدو...من غيرنا ومن غير بابا وامي ...انت كنت قريب منو ...تعرفو اكثر منا "
"راجل باتم معنى الكلمة... قلبو ذهب وعقلو يوزن جبال ...ماتسمعش ايلي يقول كلوشار وقار حبوسات ...هو هكا باش يحمي روحو ...لا نهار ظلم ولا خطف ولا سرق ...رزق الحرام مادخلش لكرشو...." خزرلو " صدقني لو تدور العالم بكلو مستحيل تلقى واحد كيفو ...رسيل خسرتو ...ومهما يكون ايلي خيرتو عليه فمستحيل يجي حتى في صبعو "
كلام نسيم خلاه يحس براحة ...بفخر ...قلبو مطمان انو خوه ايلي خيرو وقرر يختارو على عايلتو وبقية خواتو يكون في المستوى ايلي تمناه وحب عليه .
تعدات الايامات من بعد رزينة ...لا كلام ولا حتى اشارة صغيرة على رسيل وايلي صار ...رجع يخدم عادي ...صحيح اغلبية الوقت ساكت ومايحكيش ...مهموم مغموم ...اغلبية وقتو يعديه يا على الحجر راقد يا مدفون في الرمل والا في الفلوكة سارح في النجوم والڨمرة ...وفي هاذم الكل نسيم واسكندر كانو معاه ...حتى موش بجنبو اما من بعيد عينيهم ماتغفلش عليه .
❇✴❇✴❇✴❇✴⭐
تمشي وتجي ،بلاصة مانجمتش تشدها ، وادم يتبع فيها لين نطق من جنابو " يا أمي شد بلاصتك يهديك ...راك باش تدوخ "
وقفت و هي مازالت تغزل " راهو باش يعرس بيها ..ماسمعنيش  ..ولدي يكسرلي كلمتي ويعمل ايلي في راسو ...هاذي بعمرها لا صارتلي "
"انت مشكلة شنوة ...الطفلة والا العرس"
قعدت بجنبو " وحدة قليلة حياء الله اعلم منين جاية تلعب بيه كيف الخاتم بصبعو ...اكيد طامعة فيه... وين تلقاها بربي ...اكيد كيف قريبتها " شدت راسها " ياربي ....الاولى كلات على قلبي وشربت والثانية هاي داخلة بقوتها وخذات مني ولدي "
شدلها يدها ومسد عليها " انا مانيش عارف لواه الغش هذا الكل ...توا هي باش تعرس بيه وهو قال منها نخلق ...خليهم "
وساعت عينها من كلامو ايلي صدمها ،لكن هو وضحلها " من بعد انت بطريقتك تعرف كيفاش تخليها تهرب من هوني و ترجع ولدك  العزيز والغالي "
الفكرة عجبتها ، خفت حدة خزرتها واتكت بظهرها على الكاناباي وعينيها مازالت مرشوقة في ولدها الكبير ...كلامو معقول ...لازمها اتبع السارق لباب الدار وكيف تجي الفرصة تضرب ضربتها تخليها ماتقومش من بعدها.
★***★***★
شهرين بعدها ....تعداو رزان ع الاخير ...والصبر يجيبو ربي ...كيف صباحو كيف ليلو ...روتين ولى يقتل والدار تضيق بيه اكثر واكثر ....قام كيف كل يوم بكري باش يخرج للبحر يلوج رزقو ...لقى نسيم واقف وجريدة في يدو اول ما سمع حثلتو خباها بين الماعون المكدس وعمل روحو يحضرلو في قهوتو وباش يحطها ع الطاولة " ياسر فايق روتار ...كان عطى ربي رانا في وسط البحر توا ...اما الله غالب شنعمل لعمري ...لازم نفطرك ونتهنى عليك "
جبد الكرسي وقعد عادي ، ترشف قهوتو من غير ماياكل شي معاها " نحضرلك ترتينة والا نقشرلك عظمة ...عربي راو وصيت عليها شكون "
"لا صفا مانيش جيعان "
حب يقلو راك عورتلها بالماكلة القليلة متاعو لكن عارف انو اذا جبد الحكاية باش يتجبد معاه موضوع رسيل هاكي علاه من المستحسن يقعد ساكت ، كمل فنجانو وقام للماعون وجبد منو الجريدة ، عارف انو  فمة حاجة تخصها والا ماكانش يخبيها عليه ، حل الصفحة لولة ولقى خبر صغير مكتوب "الزوجة الثانية لوريث عيسى ***** من هي ؟" تحطت تصويرة رسيل بجنب الخبر ، مانجمش مايقراش اش كاتبين " بعد طلاقه ا منذ اشهر ،قرر عماد **** الابن الثاني و وريث عيسى **** الزواج للمرة الثانية  ، ومن المنتظر الاعلان عن موعد الزفاف قريبا وسط تكتكم كبير من طرف العائلة . الزوجة المنتظرة هي قريبة زوجته الاولى وتدعى رسيل ويبدو ان علاقتهما كانت السبب في انفصاله عن طليقته راوية ***** " بلع نسيم ريقو بصعوبة وندم انو شراها من اصلو ، شاف وجهو يتبدل الوان و يكحال تقول سمع جنازة حد ، طواها كيف ما لقاها ورجعها لبلاصتها ، دار ناحية صاحبو عبارة ماصار شي" خلينا نقصدو ربي"
عارف انو هروب وبرا ...وفي قلبو وجيعة مايعلم كان ربي بيها ، لوقتاش يازكرياء باش تقعد تخبي وتكتم علتك ...عمال تمرض دخلاني و تعبي في صدرك لكن يجي نهار ويفيض الكاس.