💚💙
ترشف قهوتو وهو يخزرلها ، طبيعية ع الاخير... ماجبدتلوش الموضوع وماقالتلوش لواه تعمل هكا ...وكيفاش يعطيك قلبك وتحب غيري ...مقابلتو ع الطاولة كيف كل صباح "رسيل خرجت الصباح بكري ....و ...من بعد انا وهي باش نتلاقو ...نمشاو نعملو شوبينغ صغير ...عندي بارشا ماخرجتش"
"ايه ...فكرة بدل الجو عزيزتي"
ماتعرفش اذا كلمة عزيزتي ...مجاملة ينسي بيها فيلي عملو والا عادة استانس يقولها ،تبسمتلو بحنية كيف ما مستانسة ...نوقز تاليفونو ...لقاه اظم خوه " صباح الخير ادم...بابا لاباس"
"بوك لاباس ..ليوم اجتماع مجلس الادارة وانت لازم تكون موجود ...."
"ان شاء الله خير ...مافيباليش فمة اجتماع لمجلس الادارة. شنوة صار "
"توكي تجي ...نقلك ..."
علق ورجع للتاليفون لبلاصتو " ادم يقول فمة اجتماع مهم ليوم...لازم نحضرلو "
"على اساس ليوم باش ترتاح "
"الله غالب ...هاك ترى...بروفيتي مليح كي تخرج " عمل اخر رشفة من قهوتو وقام ومشى. ....هاذي المرةالاولى ايلي ينسى فيها بوستها ...مستانس اول حاجة يعملها كي يقوم يبوسها من راسها. ...مازالت بارشا حاجات باش تتبدل وتخسرها .
★****★*****
حب يوصلها شوية برك ...اما لقى روحو يمشي معاها اكثر ملي كان متوقع ، استحلى الوقت معاه ولقاتها من الجنة والناس " شنوة اول خاجة تحبنا نعملوها واحنا مع بعضنا "
"امممممم....مانعرفش...قبل كنت نحلم ببارشا حاجات وتخيلهم.."
"مثلا "
"اممممم...مثلا ...كيما في الافلام ...ناخذو فلوكة و نسرحو في البحر.... والا تجري ورايا ع الشط....مثلا تربطلي خيوط صباطي والناس تخزر ...وانا نبدا هازة اكتافي ونتفوخر ونقلهم هذا حبي ....مثلا ...امممم...تهزني على ظهرك والا تحملني ...وتمشي بيا مسافة ...مثلا نلقاك تحت شباكي عقاب الليل وتقلي توحشتك ومانجمتش نرقد وانت بعيدة عليا "
ضحك على هبالها " اما انا صعيبة عليا حاجات كي هكا....انا انجم نعمل حاجة وحدة وايلي هي هاذي "
دورها ليه وقرب منها ...مال عليها ...وخافت انو يبوسها مرة اخرى ...تبسم بحنية " ماتخافش...مستحيل نبوسك الا ماانت تكون راغبة ...انا كنت باش نعمل هكا " خذا صوابعها بين كفوفو وخزر لعينيها من قريب قلبها يضرب بقوة والنفس قريب يتسد عليها ..."هذا يكفي والا لازمني نتعلم اكثر "
رمشت عينها متوترة " يـ....يـ...يـكفي"
⭐✴⭐✴⭐✴⭐✴
دخل ادم ...وهو الولد الكبير لعيسى ....وارث الضخامة والريشة من امو ...شعرو نوار فاتح فيه لمعة سبسيال ...بشرتو بيضاء صافية تحكي قداش هو ولد عز ...حواجبو ورموشو غامقين يبينو قداش هو جدي ....حط الدوسي قدامو وجبد كرسي وقعد....شد عماد بلاصتو معضو في مجلس الادارة واستنى يسمع شنوة سبب ها الاجتماع فجأة .
"بون...ليلي مايعرفنيش ..انا ادم ...الولد البكر لسي عيسى ...كنت شاد الفرع متاعنا ايلي في بلجيكيا ...و توا رجعت بعد مابابا تعب ومعادش قادر يترأس الشركة ...وانا ليوم هوني بصيفتي ...الرئيس المدير العام الجديد ...لانو هو وبذاتو عملي توكيل وعطاني فيه الصلاحيات الكاملة باش نتصرف ونكون المسؤول الاول عليها "
مد اوراق للسكريتيرة وزعتهم ع الحاضرين " وهذا التوكيل تنجمو تشوفوه وتتأكدو انو كل شي قانوني "
بلع ريقو بصعوبة ...وهو موش مصدق ايلي سمعو... هو ايلي ضحى ...و عمل كل شي باش يكون المدير ... ومن بعد ما امو هنتو و وعدتو تقنع بوه يخليه يشد في بلاصتو لين هو يبرا ويقوم لاباس ... لقى كل شي يتبخر كيف المنامة ...جاتو توشويشة من الحاضرين ...الكل موافقين و لقاووها حل باهي وفي وقتو باش ماتضيعش مصالح الشركة ...قعدو يناقشو في بارشا مواضيع اهمها وضعهم وشنية الاضافة ايلي ينجم يقدمها و خبرتو و برغرامو في الايامات الجاية ...وقت وفى الاجتماع وايلي هذا هز دوسيه وخرج ، خزر ادم لعماد " اقعد حاجتي بيك "
رجع جبد الكرسي وقعد "شنوة فمة "
"انا ماسمعتش موافقتك "
"وشنوة تفرق موافقتي ...هام الاغلبية موافقين "
"لا تفرق ...ع الاقل نعرف شكون صاحبي وشكون عدويا "
"تحب تقول انو اذا ماكنتش انا موافق باش تعتبرني عدوك "
اتكي ع الكرسي و بدا يدور فيه " طبيعي ...انا نعرف انو انت كان ماذبيك تكون في بلاصتي ...وكنت متمني راك قعدت في ها الكرسي في عوضي "
"بما انو القرار كان قرار بابا ...فهو متأكد انو انت احق مني ...وبما انو مجلس الادارة وافق انك تقعد على هاك الكرسي ...فمعناها. .انت تستاهلو اكثر مني ...لذا مافماش علاش مانوافقش ...وابراي تو ...وقبل مانكونو في ها الشركة ...نحن اخوة ...و كلمة عدو عيب كبير " قام وهز اوراقو " نخليك توا ...انا باش نروح ...تعرف ايلي ليوم نهار راحتي ...راوية تستنى فيا ..مالازمش نبطى
ضحك ادم " باهي بارشا ......سمعت انك عندك ضيفة ...و هي تكون من مرتك....ياخا تبنتوها في عوض الصغار ايلي مانابش بيهم ربي "
نزل ع الدوسي قريب يكمشو بين يديه ، فاهمو انو حابب يفكرو بايلي مازال بلا صغار بعد اربعة سنين عرس "ايه ....قريبة راوية ..." حب يردلو الصاع صاعين " وبخصوص الصغار ...فكرة التبني موش خايبة ع الاقل بعد منام عيني نلقى شكون يورثني في عوض ثروتي تمشي للبراني" حب يوصلو انو ...مستعد يخلي كل شي من فلوس وجاه لحد مايكونش منو بالدم على انو يعطيهملو بالساهل .
✴⭐✴⭐✴⭐✴
حالة الشرود....تبدا سارحة والتبسيمة على فمها ...عندها تفسير واحد....انها تكون تحب حد وهو يكون مسيطر عليها وعلى تفكيرها ...معقول يكون ايلي في بالها هو راجلها ...معقول تكافيها انها تاخذ منها حب حياتها
"رسيل "
خزرتلها " نعم "
ماعرفتش اش تقول ..كانت حابة تسألها اذا قلبها يدق لحد...لذا نجمت تحب ...اذا في حياتها فمة شخص ...اذا ...عي تحب عماد ويعجبها كيف ماهو يعجبها ، اما لقات روحها تتبسم وتسألها حاجة اخرى " شنوة تحب تلبس ....فمة مودلات هابطين جدد ...نتصور يوالموك ...ايكا نشوفوهم "
"لا ...انا ...مانحبش نشري حاجات جدد..." خزرت لوطة للقاعة " انا ماذبيا نشد خدمة... وقيت باش ...نخمم في روحي شوية ...انت قتلي عماد ينجم يعاوني ويلقالي بلاصة "
" ريت مني حاجة خايبة ...علاه تخمم في الخدمة هاك معايا "
"انت يعطيك الصحة ...حليتلي باب دارك وعاملتني تقول اختك...اما زادا انا لازمني نعمل على روحي و نلقى حل ...ندبر خدمة ونشوف حياتي "
"انا تو ...نقول لعماد...ربما يلقالك حاجة تساعدك "
"يعيشك...انت غرقتني بمزاياك ...ان شاء الله يجي نهار وانجم نرجعلك حتى شوية "
في قلبها تقول يكفي انك ما تاخوش عماد مني ..."المهم انك تكون انت لاباس وبخير "
خذات يدها عندها و كملو يتفرجو في المودلات متاع اللبسة ....قعدو بارشا وقت وهو يدورو هام طلعو هام هبطو هام قاسو ...لين تعبو و دخلو للكافيتيريا باش يشربو وياكلو حاجة ، اختارو طاولة صغيرة فيها زوز كراسي ، مع دخولهم ...فمة وحدة كانت من الموجودين باهتة فيهم وخاصة رسيل ...ماتصورتش انو بعد تلاثة شهور باش تكون حالتها هكا لاباس عليها وتدور في البازارات المضخمة ، خزرت اختها وايلي قاعدة معاها فرد طاولة لوين مركزة وهي بيدها حلت فمها مستغربة " موش هاكي اخت راجلك....شنوة تعمل هوني "
"والله هي ...شوف المرا ايلي معاها ...شكوني باينة في سراها "
"هاكي ...مرت عماد ولد عيسى متاع الالكترونيات ...ايلي وروه الايامات الاخيرة ...ياخا ماتفرجتش"
"اه....وانا نقول موش غريبة عليا ...وين ريتها ...اما....شنوة علاقتها بوحدة منتفة كيف رسيل "
"تخافش ...تو اختك تسألك وتبتبتلك وتجيبلك الاخبار "
أنت تقرأ
🌸✴عشقي المشوه ✴🌸(كرونيك باللهجة التونسية : مكتملة )
عشوائي★الاسم " ♥عشقي المشوه ♥" ★ الكاتبة " N🅾D🅰 ★النوع " رومنسي ،عائلي ،اجتماعي ،تشويق ،اثارة .." ★عدد الفصول " 47 ★سنة الانتاج " 2019 " ★لمحة ع الكرونيك ⬇⬇: "عشقي ليك💛 ...حكاية حلمة 💛...غناية من جوارح القلب 💚....حبي ليك من ضلوعي ومن انفاسي 💜....ع...
