في وقت كيف الوقت هاكي... وحالة كيف حالتها ...مالقاش حل غير انو يخليها معاه...ويهزها للدار ايلي هو فيها ...شنوة الناس باش تقول ...خلي يقولو ...حد مايتجرأ يحكي في وجهو....واذا حد تجرأ باش يقصلو لسانو ...تبعتو وهي طريق كامل تنوح وتبكي بالشهقة ....مالقاش كيفاش يسكتها ولا يصبرها ويخفف عليها ...طلعها لفوق وخلاها تقعد على كرسي ومدلها كاس ماء باش تشرب ،بعدتو بيدها وكملت تنوح بالصوت
"يزي ..." موش عارف في الحالات كيف هكا شنوة لازم ينصرف والا يقول ، حياتو تعدت ولا نهار تحط في موقف قدام مرا وهي تبكي ،كبش في كلمتين " يزي اسكت ....اسكت يزي ..."
صاحبو كان راقد في غطاوة نومو ...في احلامو فمة بارشا بنات مزيانات تتعارك عليك وهذا عكس الواقع متاعو ...تنطر من بلاصتو مفجوع وهو يسمع في صوت النواح ...فرك عينيه ...الصوت جاي من الدار موش عند الجيران ...نسى روحو ايلي لابس حوايج نوم. ..و غير هذا سروالو طايح ...جرى يشوف اش فمة دخل يلقاها تبكي بالصوت و قدامها زكرياء ...في حالة ماتخيلش روحو يراه فيها ...في العادة يدزها ...يغطسلها راسها في الماء ...يشدها من شعرها ويسطعها ع الحيط ....اما هو قاعد لوطة على ركايبو ويمدلها تمسح دموعها ...فاق بحثلتو خزرلو . .عقد حواجبو وهو يهز فيه من فوق لوطة ولسروالو الطايح ...ڨحرلو ڨحرة خلاه يدور بالوقت ويجبد الباب وراه و مايعاودش يظهرة مرة اخرى .
قام الصباح يترهوج ...بالسيف باش عاود جاه النوم...صوت المنوحة ماسكت كان وجوه الصباح ....لازم يفهم شنوة صار ...وشكون ها الطفلة ايلي خلات زكرياء في حالة غريبة ، دخل يثاوب للكوجينة ...بنفس السروال المحنون ،لقاه سبقو ولاول مرة في التاريخ...وساعت عينو موش مصدق "تحرك مد يدك واعمل حاجة ...تقعدش باهت "
"زكرياء ...انت والا بدلوك "
تهدد عليه بذراعو " تحرك ويزي بلا ريق "
خزر للسروال المحنون ..."هذا تمشي تنحيه وتحرقو ...معادش نحبك تلبسو "
خزر لسروالو وهو يتفقد فيه بصوابعو "عندي خمسة سنين نلبس فيه علاه كان ليوم ظهرلك خايب "
نبهو " نسييييم "
شاورلو بيدو " صفا صفا. ..هاني ماشي ...اما...نحب ...نعرف...فاش اطيب بالضبط ...لانو ...الريحة تقول املات اما المنظر عبارة عجة بالمخ "
عاود تهدد بذراعو عليه ،تسلهب نسيم ومشى يبدل في حوايجو ،خزر زكرياء للاملات ،....بالحق عاطية ع العجة ،طيشها في البوبال ...وحضر باش يعاود وحدة جديدة .
حلت عينها بالشوية ....دورت عينها في البلاصة . بدات ترجع في ذاكرتها ...نفخت وهي تتفكر انها في دار زكرياء...يعني ماقعد كان هو ما خرجهاش ...شكون يعرف بالكي في الايامات الجاية يقلها حنك الباب ...ايامات جاية صار هي ناوية تقعد فم...رمات روحها مرة اخرى ع الفرش...ملا عيشة كلبة عايشتها ....وين تمشي لازم يخرجوها كيف الذليل ...دق الباب "رسيل "
نڨزت من بلاصتها ، و مشطت شعرها ، وريڨلتو بصوابعها ،نفخت تتفقد اذا فمها فيه ريحة والا لا ، استوت البيجامة الشهيرة ايلي خرجت بيها من دار عماد..."ادخل "
من غير مايدخل تكلم من وراء الباب " التوالات اول ماتخرج ع اليمين ...و من بعد اهبط لوطة للكوجينة باش تفطر"
"باهي"
حطت يدها على خدودها. ...شنوة ها السخانة ايلي فيهم. ..صوتو الصباح يقتل. ....كشبرت وعي تعاود تتفكر كلام راوية ايلي جرحتو بيها ...زعمة لو مشاتلها مرة اخرى وفهمتها و حكاتلها الحقيقة ...تقبلها منها .
⭐✴⭐✴⭐✴⭐✴⭐
أنت تقرأ
🌸✴عشقي المشوه ✴🌸(كرونيك باللهجة التونسية : مكتملة )
Random★الاسم " ♥عشقي المشوه ♥" ★ الكاتبة " N🅾D🅰 ★النوع " رومنسي ،عائلي ،اجتماعي ،تشويق ،اثارة .." ★عدد الفصول " 47 ★سنة الانتاج " 2019 " ★لمحة ع الكرونيك ⬇⬇: "عشقي ليك💛 ...حكاية حلمة 💛...غناية من جوارح القلب 💚....حبي ليك من ضلوعي ومن انفاسي 💜....ع...
