🌸✴عشقي المشوه ✴🌸(كرونيك باللهجة التونسية : مكتملة )

💚part 25 💚

رغم انو كان عارف انو على حق وانو امو غالطة طول وعرض لكن قلبو واجعو ميفاش تصرف معاها هكاكا... تسطع في ادم خوه وهو خارج " حل عينيك وانت ديما مدنكس راسك "
كز سنونو وتعداه عاود حكى معاه " ريتش امي وينهي"
"مانعرفش عليها " صوتو كان فيه بارشا نطرة وقلة صبر ،خلط عليه ودورو باش يقابلو " يافرخ ...من وقتاش تحكي مع خوك الكبير بالمزية...هذا اش علمك هاك ايلي مايسواش" يعني حتى من خوه قلبو كاسي كيف امو ،سيب منو ذراعو وخرج ،جاه صوت ادم من وراه " تو نتفاهمو فيها هاذي ...الا مانعاود نربيك من اول وجديد " مشى يتكرم وحدو ، صراحة الكل غالطين ولازمهم يعرفو غلطهم ...مل من الانانية متاعهم ولازمو يوريهم مكمن الداء ايلي في قلوبهم ويقنعهم برجوع خوه زكرياء، في حالات كيف هكا ، لازمو يمشيلو. ..اكتشف انو يلقى راحتو وهو معاه ...اول تران جاء خذاه وبدا يحسب في الوقت وقتاش يوصل ..كان ينجم ياخو كرهبة ويسوقها لكن اختار يمشي في التران ويبدل المحطات ،مع رابع محطة وقبل وصولو بتلاثة محطات ...شاف وكذب ايلي راه ...خوه عماد ومعاه رسيل...وساعت عينو وحاول يركز بكل قوتو ...هي ...الوحيدة ايلي شعرها يكون اموج وستيلها يختلف على اي مرا ...وبحكم في كل محطة لازم يحبس ويهبط ويطلع ركاب ،لقاها فرصة باش ينڨز يخرج ويلحق عليها...استغربش من جمعتهم الزوز خصوصي انو رسيل حكاتلو اكثر منمرة على صدمتها في عماد خوه ...و قاتلو انها من سابع مستحيل تتجمع معها حتى بالصدفة ...هبط و حاول يخلط عليهم ...على بعد خطوات منهم نجم يراهم بوضوح اكثر اما مانجمش يسمع فاس يقولو بالضبط بحكم الجوجمة ايلي في وسطها ، عماد كان يجبد في ذراع رسيل و هي كانت تتجبد وتنطرلو في يدو و ڨريماص وجها تقول انو كانت في قمة غشها ...هذا يعني انو هو حاببها تمشي معاه وهي رافضة ، ...قرر يتدخل و يشوف شنوة صاير بالضبط ...لكن كلمات قالهم خوه لرسيل خلوها اتبعو وتمشي وراه من غير ماتقاوم ...كانت عبارة ماشية للموت بيدها... الموفمة عطلتو وخلاتو يخلط كان من بعد ما خدم عماد الكرهبة وطار بيها ...قعد لحظات يستوعب و يخمم... زعمة وين ينجمو يكونو مشاو ...اكيد للفيلا ...صارت حاجة هذا شي واضح وهو لازم يعرف شنوة ...والا ماكانتش تمشي معاه وتخلي زكرياء ايلي تحبو وتتمنى تعدي عمرها معاه و زيد في الوقت هاكي من الليل.
طلبها على تاليفونها لقاه مسكر ، طلب نومرو خوه الثالث لقاه مسكر هو زادا ...طلب نسيم يصوني ومايهزش ...شنوة ايلي صار ...هكا زاد تقلق ...لا تكون صارتلهم حاجة ...لازم يفهم من عماد ، طلبو وقعد بارشا باش هز عليه " اه اسكندر ...مانيش لاهي ...عندي اجتماع مهم توا مع جماعة ...تو نحكاو من بعد " وعلق ...وزيد يكذب من فوق بعينو شافو مع رسيل ...حط يدو على راسو حاير وين يمشي وشنوة يعمل ...يحكم التران فاتو ولازمو يستنى للصباح باش يكمل ثنيتو لزكرياء....قرر يرجع للفيلا و هو يعرف مليح وين ينجم يلقى عماد في هاك الوقت .
**"""*******
قعد يدق في باب البرتمان وماهمهوش يقلق بقية السكان...اكيد خوه فمة...برتمانات تابعين الشركة متاع بوه ..للخدامة و رؤساء الاقسام وكل واحد من اخواتو عندو واحد فم بما فيهم هو ....اخيرا تحل الباب وبان خوه ...ايلي وجهو تقلب وبانت عليه الصدمة " اسكندر شنوة نحيبم توا "
حاول يدخل ويلوج بروحو " ويني رسيل "
منعو بيدو " رسيل !؟...شنوة باش تعمل في ها الوقت "
ظهرت وهي عينيها منفخة بالدموع وحمراء ، خزرتلو خزرة هبطت عليه كيف النار ، تعدى خوه ومشالها " شفمة...شتعمل هوني ...شنوة صار ...علاش خليت زكرياء وجيت لهوني "
عدت عينيها الدامعة لعماد ايلي نبهها بخزرة من انها تكشف اللعبة وهكاكا تعاود تكون حياة ايلي تحبو في خطر ،تدخل خوه وهو يحط يدو على اكتافو " احم...بما انك ريت كل شي ....فمعاد شي يتخبى....وايلي تقال بخصوص علاقتي انا ورسيل ....صحيح... احنا نحبو بعضنا ...ومضطرين ساعة ساعة نتقابلو هكا بالسرقة ...اما ...على قريب باش ي
نخلو الناس الكل تعرف حكايتنا "
عينيه مركزة فيها وتستنى منها تقلو لا موش صحيح ،لكن هي هبطت راسها ودموعها تغسل في وجها، رجها " صحيح!؟"
تجرعت المرارة وشاورت براسها ايه " و زكرياااء....علاش عملت هكا فيه ..علااااااش ...انت تعرف انو يحبك...يعشقك ...حياتو تاقف عليك انت ...ماعندو حد غيرك...علااااااه تعمل فيه هكا علاااااااه "
رعشت بكلها وبدات تنوح بالصوت ،لكن دموعها بالنسبة لاسكندر كذب في كذب مايعرفش انهم نابعين من القلب و جوارحو ، خزرلهم الزوز باحتقار " يا خسارة ....بالحق يا خسارة "
✴❇✴❇✴❇✴❇