🌸✴عشقي المشوه ✴🌸(كرونيك باللهجة التونسية : مكتملة )

🌼part 30 🌼

قاعد ع الحجر وشارد في البحر ، ساطعة زروقيتو مع السماء ، صوت البابورات و الموج عاملو سمفونية في راسو ، عقلو فارغ ...يخمم في اللاشيء...خمسة ايام تعدو على عرسها. ...وهو موش منجم يسمع اي خبر عليها....رافض اي حاجة تخصها وعندها صيلة بيها ...قرر انو ينساها ...يمحيها ....كان لزم يعفس على قلبو ويطعلو عروقو بيدو ، صوت حثلة ساقين وراه ...رغم سمعها ماكلفش روحو يشوف شكون ، ماهمهوش ....اذا موش نسيم اكيد واحد من الصيادة يتفقد فيه كيف العادة ...معادش هاك الكلوشار ايلي يخوف ...هي حلتلهم قلوبهم ليه ....ومشات ...محات صورة الباندي والكلوشار ...و رحلت ...خزر على جنب للخيال الواقف بحذاه ، تربث بكلو وهو يشوف في بوه واقف ،من الاول حس روحو في حلمة والا يتخيل ،لكن وجه عيسى وتبسيمتو خلاتو يتأكد انو حقيقة ،قام بالوقت وهو يخزرلو بصدمة ، خزر لاسكندر موش فاهم ،مسد بوه على كتفو بحنية ...فقدها من سنين ،رعش بدنو الكل"بااا...با ...شنوة ...تعمل هوني "
"جيت نطل عليك "
"كنت تقلي وانا نجيك "
تنهد " ياخا الولد يستنى بوه باش يقلو ايجا طل عليا "
هبط راسو " في حالتي انا ايه "
"زكرياء"
عاود خزرلو ،مدلو بوه يدو باش يعاونو يقعد ع الحجر "ها البحر يرتح شي عجب ...صحة ليك في ها  القعدة"
خزر للموج ، كيف ها  الشط كان يبكي و يصيح باش بوه وامو يسمعوه ويرجعو يهزوه " انا ليوم جيت باش نراك ....لحاجتين "
خزرلو مستفسر " ان شاء الله خير " سكت لحظات " اذا جاي تقلي معادش نرجع للفيلا فانا قررت وساياي ...معادش واحد من هاك العيلة وفي حالة ما غلطت وخانتني ساقيا ...اطلب البوليسية وقول انو ....كلوشار صادم عليكم و يهدد فيكم...و اطلب منهم يعاقبوني باقسى ماينجمو "
كلامو كان كيف الجمر على بوه ،زادو وجيعة على وجيعة ،تنهد بصوت مسموع "موش تسمعني قبل خير "
"عندك حق....تفضل هاني نسمع فيك "
"اول سبب خلاني نجي هو اني نحب نراك ونقعد معاك " بلع  زكرياء ريقو وقلبو عمال يزيد في ضرباتو "ماتخزرليش هكا....نعرف ...انا بعمري لا قتلك ولدي ...ولا حنيت عليك كيف خواتك....وبعدتك عليا مسافات ....اما قلبي كان معاك....ماكنتش تعرف انو في كل شهر كنت نطل عليك ونبعثلك مصروفك و نوفرلك مايلزم ، صحيح مانقابلكش ومانخليكش تراني ،اما انا كنت نشوفك من بعيد ....نتهنى عليك انك لاباس وصحتك سالامات ...صحيح كنت تاعب ....وكنت تعاني ...وكنت وحيد بلا سند....اما هذاكا كان اهون من قعدتك معانا في الدار... لو قعدت كنت تذوق المراراة اضعاف ...وتشوف قسوة امك اكثر...وتكرها اكثر وتحقد على خواتك ...ويكبر الشي بيك وتولي ...بالحق كلوشار وتخوف ....وتموت فيك حنية قلبك...ايلي ماتملكها كان انت....انت قلبك مصنوع من ذهب ...حبيتك تقعد صافي ...ايلي صار فيك ...وجروح وجهك ...كانت جروح في قلبي ...هوني " حط يدو على صدرو " هاكي علاه ربي عاقبني وبلاني بها المرض.....نعترف انو كنت عاجز ....مانجمتش نعملك شي نعاونك بيه ...لكن هاكي ايلي نجمت نعملو وقدرت عليه باش نحميك ونحمي خواتك..."
"انا مانيش نلوم فيك...فماش علاش تبررلي "
حب يقلو لعل الموت يمنعني من اني نقلك ها الكلام ...لكن مستحيل يقلو ها ااهدرة "
❇✴⭐❇✴⭐❇✴⭐