بين الحاضر و الماضي ( روايات ليبية )

حلقة 32

رواية #بين_الحاضر_والماضي
( حقيقة ممزوجة بلخيال )
للكاتبة #رواية
الرواية بلهجة الليبية
حلقة 23

ليلي : تصيح حتي هي وتقوللها لو خلاته حياتهم بتنقلب خصوصا ان اسماء عندها دليل اللي هما التسجيلا
ساره كااانت تسوووق في سرعه جنونيه و هوووبااااا قص قدامهم واحد و طبعا لان ساره مش مركزه و تسوق بسرعه دارووو حادث و نقلبت بيهم السياره ....
....
جو ناس يتجارووو سعفو ليلي و ساره بسيف ما قدرو يطلعوها من السياره قعدو يدورو في موبايلاتهم او اي اتبات هويه ليهم شي ملقوش شي
وصلو لي المستشفي ....
دكتوره الاسعاف : دكتور المراء اللي تسوق نبضها ضعيف و عندها نزيف خارجي و احتمال يكون عندها حتي نزيف داخلي و عندها كسر في الحوض و رجل يمني و الايد اليسرا و احتمال رضوض في الضلووع
اما المراء تانيه عندها كسور و شويه خدوش و نزيف خارجي من جية الانف و الجبين
دكتور : حاله الاولي طول لي العنايه و اعطوها لازم يا دكاتره ... و الحاله تانيه خلوها تحت الملاحظه لو فاقت و تأكدو من سلامتها ...

عند كنان .....
كنان مقعمز قدام البحر و يلوح في رشاده في جرت رشاده و تفكيره و قلبه و عقله عند ليندا .... كيف ندير تي عششة في راسي واااااك ياربي شن هلبنت ياربي ياريت ما رجعت ياريت ما شفتها ياريت ماحبيت قبل مش عارف نمشي و نقوللها اني نحبها ان اني نموت فيها ان اني من اول ما شفتها خشت قلبي ولا نقعد هكي كل يوم نتعدب ياااااربي ساعدني
كنان قعد علي الحال هدا لي الفجر و هو مدرس و مقعمز قداب البحر روح للحوش خدي دوش و مشي للعياده لقي مزال محد جي حتي اسماء مجتش
خش لي مكتب ليندا ملقاش حد قعد يتلمس في كمبيوتر متاعها يشم في ريحتها تخنق اضايق طلع يجري ....
ليندا و ليث وصلو مع بعض للعياده فرحانين
ليندا : بنمشي نوصي علي فطور و نجي نوصيلك معاي ولا
ليث : ياريت جيعان بنموت
ليندا : بعيييد شررر معاش تقول هكي ربي يخليك ليا العمر كله
ليث : حاضر و يخليك ليا يادنتي ❤❤
مشت ليندا جابت الفطور ووتاته علي طاولت مكتبها و نادت علي ليث و بدو يفطرو خش عليهم كنان
كنان : صباح الخير بكل جفاف
ليث : صباح النور
ليندا : استغربت في نبرة صوته و مش من عوايده يخش من غير ما يشبحلها و يتبرد عليها ... صباح الخير
كنان : ساره جت ؟ طبعا و هو متلفت يكلم في ليث
و يحاول يتجاهل ليندا
ليث : لالا
كنان : وليلي مجتش و عندنا هلبا خدمه اليوم امس روحت ومكملتش خدمتها
ليندا : تبي تحاول تتصرف زي ما هو يتبرد عليها ... هلبا عليها البنت
كنان : شبحلها و ضحكلها ضحكه صفره
ليندا : زادت تجاكر فيه ... تعالا افطر معانا
ليث : اكيد في طريق جيين مرات زحمه هو صح ساره مش من عوايدها تتاخر بس بالك المانع خير ... تعالا افطر معنا اكيد شويه و يجو
ليندا : نمشي نجيبلك طاسه شاهي و لا تبي حاجه تانيه ؟
كنان : لالا شكرا منبي شي و طلع
ليث : هههه تي ولله شكله يحب البروو
ليندا : مستغربه في كنان ... اه مش عارفه
كنان : و هو طالع سمعهم ... اوووف ياقلبي علاش كل ما نسمع صوتها قلبي قريب يطلع من مكانه اوووف
جت اسماء صبحت علي ليث و ليندا
اسماء : اووو فطوركم يشهي
ليندا : تعالا قعمزي نمشي نجيبلك طاسه شاهي و نجي
ليث : صحه صحه
اسماء بدت تفطر و ليندا مشت جابت الشاهي
اسماء : ليث ليندا بصوت متوتر
ليث : نعم
ليندا : اها نعم !!!
اسماء : امس صارت حاجه و لازم نحكيهالكم
ليث : شن هي ان شاء الله خير ؟؟؟
اسماء : اني نعرف علاش ساره و ليلي مجوش اليوم و اصلا معاش بيجو
ليندا : علاش ؟؟
كنان : خش يجري و قاااطع عليهم ... لييييييث
ليث : خيرك شن فيه ؟؟؟،
اسماء و ليندا يشبحو لي كنان يستنو فيه شن بيقول
كنان : ساره و ليلي دارو حادث توه كيف اتصلو و قالولي
ليث : قاعد يشبحله .. تي كيف صار هدا و امتي ؟؟
كنان : تي هييي نوووض خيرك متنح فيا و قاعد تسئل
ليث : هي هي اهو نايض اسماء اجليلي مواعيدي
ليندا : استنوني بنمشي معاكم
كنان : شبحلها و طلع مشي لي سيارته و ليث و ليندا طلعو وراه ركب كل واحد و سيارته و مشي للمستشفي اول ما خشو سئلو لانهم مجهوليش الهويه خلو ليندا تخش تشوفهم
ممرضه : تفضلي خشي هدي اللي كانت مقعمزه جنب اللي تسوق حالتها مستقره عندها كسورات بس
ليندا : اول ما شفتها زبطتها ليلي
ليلي : ليندا كيف حال اختي طمنيني عليها ونبي ؟؟
ليندا : سلامتك غير ارتاحي توه مزال مشفتهاش ساره
ليلي : من جي معاك اني عطيتهم اسم العياده
ليندا : الدكتور كنان و دكتور ليث
ليلي : اه كنان جي به كويس ... طبعا تتاكد ان اسماء مقالت شي لي كنان
ليندا : ارتاحي انتي توه و الف حمدلله علي سلامتك
ليلي : ليندا لو سمحتي من فضلك شوفي ساره و طمنيني عليها
ليندا : حاضر
ليندا مشت شافت ساره في العنايه و كانت حالتها حرجه هلبااااا
كمال: الووو ليندا
ليندا : ايوه كمال كيف الحال
كمال : الحمد لله اسماء قتلي مشيتو للمستشفي ؟
ليندا : اي يا كمال كان تشوف هديكه ساره و ليلي اللي يشتغلو معانا دارو حادت هلبا قوي
كمال : به و كيف حالهم توه ؟
ليندا : ليلي كويسه و ساره في العناية حالتها حرجه هلبا
كمال : لا حول و لا قوه الا بالله .. به اسمعي شويه و جاي بنروح بيك
ليندا : به عادي
صكر كمال من ليندا و هو كان عند محمود
محمود : مني خير شن صار
كمال : هدم 2 بنات يخدمو مع ليندا دارو حادت و ال 2 خوات
محمود : و شن صار فيهم ؟؟
كمال : هدي اللي اسمها سارة مره تلاقيت معاها هي اللي حالتها خطيره اما اختها خير منها
محمود : تلكمس و خش بعضه و بينوض و يبي يروح و قعد يسال في اي مشتشفي ( عابي بيمشيلها )
كمال : وعلاش تسئل ؟
محمود : لا شي مش بتمشي تروح بي ليندا قلت نسايرك
كمال : اه به شويه تاني نطلعو

بعد شويه ...
مشو كمال و ليث بيروحو بي ليندا
كمال : الووو انتي وين ؟
ليندا : تلقانا جيهة العناية
كمال : اي اي اوكي هي جايك
ليندا : قربت بصوت واطي من ليث ... ليث كمال جاي توه
ليث : به عادي
كنان : يشبح لي ليندا من تحت لي تحت و قلبه يوجع فيه ينخص فيه نخص
كمال : السلام عليكم
ليث : اووو كمال كيف الحال و عليكم السلام
كمال : الحمد لله و مد ايده سلم علي كنان طبعا ميعرفاش
ليث : عرفهم بي بعض
كمال : هدا محمود صاحبي
محمود : مساء الخير ... يسلم و هو خاش بعضه
طبعا محد لاحظ

بعدها كل حد روح لي حوشه
ليث و ليندا يهدرزو
كنان غارق في تفكيره
اسماء و كمال يحبو في بعض
ليلي تبي تشوف اختها و تبكي و حاطه دنب عليها هي
ساره راقده متندري علي شي

تاني يوم ....
كنان و ليث تكفلو بكل شي و حولو ساره لي عياده و ليلي بدي حالها احسن

بعد سبوعين.....

ساره بدت تفيق من الغيبوبه و تسال علي اختها طمنوها عليها و جتها ليلي و قعدو من الاول يبكوا و بعدين هدرزو ساره ولا حالها كويس و روحت للحوش

ليندا : اسماء اليوم ساره طلعوها من المستشفي شن رايك نمشو نهوو عليها ؟؟
اسماء : فنصت فيها ... تعرفي تمشي من قدامي ؟؟؟
ليندا : ههههههههه خيرك اللطف تحولتي فجأه ؟
اسماء : ماهو انتي كان تعرفي وقسم بالله لما تمشي تقتليها
كنان : قتل شنو اعوذ بالله ... طبعا كنان مغير معاملته مع ليندا هلبااااا لين هي بدت مستغربه منه حتي صباح الخير يقوللها فيها بسيف
اسماء : تي نحكو علي المسلسل
ليندا : كانت سارحه في كنان .... صباح الخير دكتور كنان
كنان : كأنه كان في غيبوبه و فاق ... بلا مبالاة صباح الخير اسماء بالله شوفيلي مواعيدي و قوليلي عليهم قعدت من غير مساعدتي متبهدل
ليندا : تشبحله و مصدومه كيف يدوي هكي و كيف يعامل فيها هكي
اسماء : حاضر هي

بعد شويه جي كمال للعياده
ليندا : كيموهي ترفعنا نشوفوا ساره و ليلي حرام بروحهم معندهم حد ؟
كمال : تي من بنرفعكم ؟؟؟
ليندا : اني و اسماء ؟
كمال : ابتسم ابتسامه لين ضرس العقل بان 🤣🤣🤣
ليندا : تشبحله و تشبح لي اسماء معناها بتوصلنا ... هي اسماء خفي روحك
اسماء : واااك منك غير كان تعرفي المصايب اللي صايره بس
ليندا : اص مش وقتك خشت ليندا لي ليث قالتله انها بتمشي لي ساره و ليلي و كانت هلبا مستعجله و طلعت

بعد شويه وصلو لي حوش ساره .....
اسماء : اهيه العماره اللي علي يسار
ليندا : كمال مش هدا محمود ؟ تي حتي سيارته ؟؟،
كمال : الي صح ولله هو بشحمه و لحمه
كمال كيف جاي بيكلمه و اسماء شداته مخلتاش يكلمه

#يتبع في حلقه 24 ......
#نهايه_قريب
إذا عجبتك القصة لا تنسي الإعجاب و الإضافة ليصلك كل جديد مشاركة القصة مع الأخريين
و لا تنسوا أيضا تعليقكم و اقتراحاتكم لنقدم ما تريدونه

MBC LIBYA تابعوا صفحة