بين الحاضر و الماضي ( روايات ليبية )

حلقة 14

رواية #بين_الحاضر_والماضي
( حقيقة ممزوجة بلخيال )
للكاتبة #رواية
الرواية بلهجة الليبية
حلقة 14

نسرعوا في الاحداث ....
بعد اسبوعين....
استاده خديجه : صباح الخير
ليندا : صباح الخير
استاده خديجه : كيف حالك اليوم شن كيف امتحاناتك ؟
ليندا : الحمد لله مشو علي خير اليوم اخر يوم وربي يستر
استاده خديجه : صافيه بادن الله متخافيش توكلي علي ربي
ليندا : يارب .. سلام توه استاده قريب يبدا الامتحان
استاده خديجه : ربي معاك بنتي
عند ليث ....
ليث : الووو
ليندا : صباح خير
ليث : صباح النور ... كويس انك اتصلت ليث
ليث : علاش شن فيه صايرلك حاجه ؟؟
ليندا : لالا كيف بنخش لاخر امتحان بناخد جرعه حب منك
ليث : اووو خوفتيني ... وخيرك متصلتيش انتي ؟؟
ليندا : امممم صح بس معاش فيه وقت بنخش للامتحان بدي الوقت
ليث : به موفقك حبيبتي جاوبي بشويه عليك و اني معاك
ليندا : حاضر
ليث : امتي يتم الامتحان
ليندا ساعتين من توه
ليث : اوكي هي بري معاش وقت نحبك اني
ليندا : حتي اني هي سلام
ليث : سلام
ليلي : ( البنت اللي اضايق في ليندا ديما في جامعه ) جت وقفت قدام ليندا ..صبح مزال بكري علي الحب
ليندا : لو سمحتي ترا شويه
ليلي : و كان محولتش ؟
ليندا : حولتها غصب و خشت للقاعه
ليلي : استني عليا شويه توه نوريك
خشو لي قاعه الامتحان و بدي الامتحان و هكي فات شويه وقت و جت ليلي مقعمزه وراء ليندا و كانت مدايره (حجيب )لوحاته علي الارض ودفاته برجلها لي جيهة ليندا وهي مش فايقه بي شي قاعده تحل و تشوف للوقت بعد 10 دقايق ...
المراقب : جي جبهت ليندا لقي الورقه طبس قامها و لقي فيها رزق متاع الامتحان كله ... هدا شن يا طالبه ؟؟
ليندا : نعم ؟؟؟
المراقب : هدا الحجيب واللي مكتوب ليك لقيته تحتك
ليندا : بس مش متاعي استاد واني كيف كملت بنسلم
مراقب : هاتي ورقتك ... ودبس فيها الحجيب و قاللها ماله متاع مني متاعي اني و لا نتبلا عليك امتحانك ملغي يا طالبه و انتي محوله لي المجلس التأديبي باش تعرفي كيف تردي عليا مره تانيه
ليندا : مصدومه لا عارفه تتكلم و لا عارفه تبكي و لا عارفه ادير حاجه ... اني اسف...
المراقب : اطلعي برا متشوشيش علي زملائك و زميلاتك
القاعه كلها تشبح لي ليندا .... خدت شنطتها و طلعت
بتموت من اللي صار
ليلي شبحت للمراقف و ابتسمتله
ليندا : طالعه مصدومه و مش عارفه شن ادير ...
تاليفونها يشرين
ليث : حبيبتي وينك ؟؟؟
ليندا : تبكي
ليث : خيرك شن فيه ؟؟؟
ليندا : لزوني من الامتحان ياليث
ليث : علاش شن صار ؟
ليندا : محاولو غش
ليث : ههههههه تتسهوكي انتي ؟؟
ليندا : لا لا ياليث اني ضعو نحس في دنيا جايا عليا
ليث : به خليك اهو جايك متتحركيش من مكانك
ليندا : ياريت تعالا لان مش قادره نتحرك
ليث : به به حبيبتي اهو طالع قعمزي في اقرب مكان هي
ليندا : شعورها في اللحظه هديكه محد يتمناه قعدت تبكي بصمت دموعها و قلبها من داخل بيطربق
استاده خديجه : شن فيه يا استاد ؟؟
استاد مختار : محاولة غش يا استاده مش عارف اني ولله وصلو لي مره هدي و مزال عقولهم تافهه و صغيره
استاده خديجه : ربي يهديهم الولاد قاعدين طايشين
استاد مختار : لا ولله هدي بنت و الكارثه انها طلعت بنت متحشمتش من اي حد
استاده خديجه : لا حول ولا قوه الا بالله و شن اسمه طالبه هدي ؟
استاد مختار : لحظه بس مش عارفه جبالي مراقب ورقتها مدبسها ... اها اسمها ليندا سالم
استاده خديجه : لاااااا مستحيل مستحيل وينها البنت هدي ؟؟
استاد مختار : منعرفش لزوها من قاعه
استاده خديجه : مستحيل يا استاد مختار بنت هدي اني نضمنها مستحيل اكيد فيه غلط اكيد استاد لو سمحت متلغيلهاش امتحانها لو سمحت
استاد مختار : استاده خديجه مستحيل طلبه كلهم شافوها و المراقب شن بيتبلا عليها ؟؟؟
استاده خديجه : لو سمحت اعطيني شويه وقت نتبتلك لو سمحت مضيعلهاش مستقبلها
استاد مختار : هي اللي ضيعت روحها و تغش
استاده خديجه : لو سمحت يا استاد ديرها زي بنتك و اني ح نتبتلك
................
استاده خديجه : طلعت ادور علي ليندا و تتصل بيها متردش
بعد شويه ....
ليث : ليندا هي اركبي
ليندا : ركبت و لوحت روحي علي كرسي و تبكيييي بحرقه
ليث : طلع يجري بسياره ... ليندا خلاص اسس توه نلقوا حل
ليندا : بصوت عالي حل شن ؟ حل شن ياليث حلمي اللي حلمته وعد اللي وعدت بيه امي و بابا و كمال فشلت فيه اخر امتحان ليا كنت بنروح و اني نفكر في مشروعي و المكان اللي بنشتغل فيه احلامي كلها ضاعت علاش ياربي علاااااش
ليث : ليندا خلاص اهدي كل شي وليه حل شدها من ايدها و يسوق و هو عين في طريق و عين فيها قلبه يوجع فيه لانها في حاله هدي و مش قادر يديرلها شي
عند كمال ....
كمال : الوووو محمود كيف الحال ياراجل ؟؟
محمود : اهلين بروو الحمد لله تمام و انت ؟؟
كمال : الحمد لله وينك
محمود : في المحل تبي حاجه !!
كمال : ولله قبل نبيك تسايرني بناخد هديه لي ليندا
محمود : شن نقولو مبارك نجحت ؟
كمال : لا مزال بس اليوم اخر امتحان ووعارفها ناجها بادن الله بس قلت نفرحها انت عارف واضعها لما مرضت و بعدها علي طول قرايا ولله قاتله روحها في القرايا المهم قلت نديرلها حاجه
محمود : به به كويس علي خير شن حاط في بالك حاجه معينه ؟؟
كمال : ولله كدا حاجه بس مش عارف
محمود : اني نقولك اعطيها فلوس و هي تشري شن في خاطرها هما بنات و يعرفوا اكتر منا
كمال : زعما انت تقول هكي ؟؟
محمود : اي اكيد وانت زيد فكر
كمال : به به ان شاء الله خير هي سلام توه
محمود : سلام
عند ليث و ليندا .....
ليث درس قدام البحر تلفت لقي ليندا حاجه راسها علي المرش و تشهق من البكي .... ليندا ..حبيبتي خلاص
ليندا : تلفتتله و هي عيونها منفوخات و حمر صح خلاص ضاع كل شي و ضعت حتي اني
ليث : علاش تقولي هكي تفايلي خير و خلي عندك امل في ربي انتي مظلومه مدرتي شي و بادن الله ربي يوضح الحقيقه
ليندا : اليوم اخر يوم ياليث في الامتحان يعني كلها اسبوعين و تطلع نتيجه و بي عمله اليوم اللي صارت ح يلغولي 3 مواد معناها نعاود سمستر علاش ضلم هدا علاش .....
ليث : وراس حبيبتي لما يتصلح كل شي ياعمري انتي شدها من ايدها و خداها عنده في حضنه
ليندا : وهي تبكي خليك معاي ليث اوعدني مش ح تخليني
ليث : نوعدك ياروح ليث غير اهدي بس علي خاطري
ليندا : خلاص ضاع كل شي
ليث : اصصص خليك عندي و اهدي
و شويه و مشو بسياره وقف علي محل نزل خدالها عصائر و شكلاطات
ليث : اشربي و كولي شكلاطه نعرفهم تحبيها
ليندا : مش خاطري منبيش
ليث : منخدش في رايك هي كولي
ليندا : به ... وين بنمشو توه
ليث : للعياده
ليندا : لاااا منبيش
ليث : علاش ؟؟؟
ليندا : شوف منظري كيف و بعدين مش خاطري نبي نروح نرتاح
ليث : لا مش ح نخليك تروحي بروحك في حوش تبكي هلبا و تمرضي لااا انسي و نقعد مشغول عليك لااا
ليندا : ياليث قداش ليا ممشيتش و يوم اللي نمشي بمنضري هدا ؟؟
ليث : وخيرها منضرك هدا ؟؟ نشبح فيك احلي وحده في دنيا كلها و بعدين شن دخلك في ناس المهم اني عندك
ليندا : به ياليث
ليث : اي هكي نبيك
المهم مشو للعياده اول ما وصلو اسماء رحبة بي ليندا و قعدت تبوس فيها و فرحت هلبا و جي مروان
مراون : اووو مزال ممتيش قصدك
اسماء : بعيد شرر
ليندا : مروان كيف حالك
مروان : ميه ميه من غير اكشن متاعك
اسماء : مروان اهفت مش متعوده علي بسالتك البنت
ليندا : خليه يا اسماء مروان زي وخي
مروان : بعد الكلمه هدي تطلبي عيوني نعطيهملك
ليندا : تسلم
ليث : بطل دوه دوه
اسماء : شن كيف كانو امتحاناتك ؟؟
ليندا : شبحت لي ليث و عيونها دمعوا
ليث : قالت كويسات
اسماء : الحمد لله موفقه لولو عرفاتك شطوره
مروان : معناها نخاف علي مكاني من توه
ليث : ليندا هي تعالي عندنا هلبا خدمه
ليندا : نستادن منكم
.............
ليندا : ليث مش خاطري نخدم اليوم خليني نروح نرتاح
ليث : لااا قلنا مستحيل نخليك في حاله هدي
ليندا : خلاص اللي صار صار الامتحان و لغوه و احتمال كبير يلغولي 3 مواد اني اللي واجعني جهدي و تعبي و كمال خوي مش عارفه شن نقوله بنهبل من تفكير
....
في لحظه هدي كانت ساره تسمع فيهم و متشمته طبعا
طلعت تاليفونها واتصلت
ساره : الووو صار درتيها ؟؟
ليلي : ماله شن شن تحسبيني نلعب
ساره : سلم وخيتي ياربي اللي بردتلي علي قلبي
ليلي : الله يسلمك المهم نبي منك هديه كبيره راه
ساره : عيوني ليك
ليلي : ايوه احني ... بالله كيف عرفتي ؟
ساره : جت توه و سمعتها تهدرز مع ليث واضح انها انهارت
ليلي : و هدا اللي نبوه .... شوف سبحان الله البنت اللي نكرها طلعتي تكرهيها حتي انتي
ساره : هههههه مش خوات
ليلي : مزال توه نوريك فيها
ساره : هدي توه لعب خلي نشوفوا شن بيصير
ليلي : حاضر اختي الكبيره هههههههه
عند ليندا ....
ليندا : كمال يتصل حي حي
ليث : ردي عليه
ليندا : به ... الوو كمال
كمال : اهلا ليندا كيف حالك ؟
ليندا : الحمد لله و انت !
كمال : الحمد لله ... شن صار في امتحانك ؟؟
ليندا : بصوت متقطع و مرتبك و متوتر .... باه تمام
كمال : الحمد لله و اخيرا كملتي و ارتحتي توه و ريحتيني و اكيده نتيجه مضمونه ولا ؟
ليندا : اي ان شاء الله
كمال : اكيد ... انتي وين ؟
ليندا : في العياده
كمال : تشتغلي اليوم ؟
ليندا : اي خلاص تمت عطلتي
كمال : به توه اني نجي نروح بيك اوكي ؟
ليندا : ان شاء الله هي سلام
كمال : سلام
صكرت ليندا و شبحت لي ليث و قعدت تبكي ... زياده كدبت عليه عمري ما كدبت علي كمال و اليوم درت مصيبه و زياده كدبت
ليث : انتي مدرتي شي و روحي للحوش و احكيله كل شي
ليندا : مش ح نقدر
ليث : تقدري توه امسحي دموعك و معاش تبكي منبيش نشوفك هكي هي هي ...
ليندا : حاضر
ليث : شاطره خلي نخش لي مكتبي عندي شويه حاجات نكملهم اوكي تبي حاجه تعاليلي
ليندا : به خلي نمشي حمام نغسل وجهي
ليث : به
مشت ليندا للحمام خشت زادت بكت و عيونها تنفخوا اكتر و حمر اكتر غسلت وجهي و هي طالعه ضربت في كنان ....
ليندا : اسفه اسفه سامحني
كنان : قعد يشبحلها و مصدوم ....
#يتبع في الحلقه 15

شكرا هلبا علي كلامكم ولله فرحتوني هلبا ❤❤

إذا عجبتك القصة لا تنسي الإعجاب و الإضافة ليصلك كل جديد مشاركة القصة مع الأخريين
و لا تنسوا أيضا تعليقكم و اقتراحاتكم لنقدم ما تريدونه

MBC LIBYA تابعوا صفحة