السيرة النبوية باللهجة العامية

15

15
يلا صلوا على النبي 💜

ثالث حاجه قريش عملتها انهم اثاروا شبهات ودعايات كاذبة كتير وتفننوا في الكذب ، فقالوا ۤۤۤعلى القرآن أنه أحلام كاذبة يراها محمد ﷺ بالليل ويقولها بالنهار

، وأحياناً يقولوا دا افتراء من عنده ، او دا فيه بشر بيعلمه ، او هو وصحابه اشتركوا وألفوه من عندهم..

وأحيانا يقولوا دا عنده جن او شيطان بينزل عليه القرآن زي الجن والشيطان بينزلوا على الكُهان ، لكن ربنا سبحانه وتعالى أنزل رد عليهم  { هَلْ أُنَبِّئُكُمْ عَلَى مَن تَنَزَّلُ الشَّيَاطِينُ * تَنَزَّلُ عَلَى كُلِّ أَفَّاكٍ أَثِيمٍ } يعني الشياطين بتنزل على الكذاب الفاجر المليان ذنوب ، والنبي ﷺ عمرهم ما شافوا منه فسق ولا كذب.. فإزاي تقولوا كده؟!

وأحيانا تاني يقولوا أنه أصابه جنون ، فهو بيتخيل المعاني ويصيغها بكلمات بديعة رائعة زي الشعراء فكلامه شعر وهو شاعر فربنا نزل الرد عليهم
{ وَالشُّعَرَاءُ يَتَّبِعُهُمُ الْغَاوُونَ * أَلَمْ تَرَ أَنَّهُمْ فِي كُلِّ وَادٍ يَهِيمُونَ * وَأَنَّهُمْ يَقُولُونَ مَا لَا يَفْعَلُونَ } يعني دي حاجات في الشعراء ومفيش حاجه فيها في النبيﷺ فالناس اللي اتبعته صالحين أتقياء ومفيش فيهم أي نقطة غواية ، وهو مش بيهيم بيهم في كل وادي شويه زي الشعراء بل يدعو إلى رب واحد ، ودين واحد ، وكمان مش بيقول إلا ما يفعل ومش بيفعل إلا اللي بيقوله ، فهو فين من الشعر والشعراء ؟ والشعر والشعراء فين منه؟!

رابع حاجه عملوها النقاش والجدال ..
كانت في اساسيات حصل خلاف بينهم وبين المسلمين وعملوها قضية وهم :
التوحيد ، والرسالة ، والبعث بعد الموت ، وكانوا بيجادلوا فيهم..

أول ما عرفوا ان فيه بعث بعد الموت اتعجبوا واستغربوا ويقولوا لو متنا وبقينا تراب هنُبعث!! والآيات اللي بتحكي عن إنكارهم دا كتيرة.. وربنا سبحانه وتعالى أنزل آيات ترد عليهم..

وبالعقل ازاي مفيش حساب ، يعني الظالم يموت وميتعاقبش على ظلمه، والمظلوم مياخدش حقه ، والصالح المُحسن يموت ومايخدش جزاء إحسانه ، والمُسئ يموت ولا يتعاقب على سيئاته ، فلو مكنش فيه بعث وحساب هيتاخد ازاي من الظالم للمظلوم !! وكده الاتنين هيستويان ببعض ومفيش فرق ، بل في الدنيا الظالم والمُسئ هيكون سعيد أكتر من المُحسن والتقي لأنه هيعمل اللي عايزه براحته ومحدش هيحاسبه ... ودا طبعاً مش معقول خالص!! ومش من العدل ، ولا يُتصور ان ربنا سبحانه وتعالى يبني الكون على الظلم بل من صفاته العدل قال تعالى { أَفَنَجْعَلُ الْمُسْلِمِينَ كَالْمُجْرِمِينَ } ..
أما من ناحية انهم مستبعدين دا عقلياً وان ازاي هيحصل كده!!؟ ربنا رد عليهم انه خلقهم وخلق السماء والأرض هل يعجز ان يحييهم بعد الموت حاشاه سبحانه { أَأَنتُمْ أَشَدُّ خَلْقًا أَمِ السَّمَاءُ بَنَاهَا } وآيات تانية كتير..

ولما خلصوا من قضية البعث بعد الموت وملقوش فايدة من الجدال ومش عايزين يخضعوا للحق دخلوا في قضية تانية وهي الرسالة وشبهات حول صدق النبيﷺ وانهم كانوا معتقدين ان النبوة والرسالة أعظم من ان تنزل على بشر ، وان البشر مينفعش يبقوا رُسل زي ما هما بيعتقدوا وبقوا يقولوا ازاي رسول ياكل ويشرب زينا ؟! فربنا رد عليهم ان الرسول لازم يبقا من جنس البشر زيهم عشان يقتدوا به ، ولو الارض عليها ملائكة هينزل عليهم رسول ملك زيهم ..
وأبطل الله عقيدتهم بقصص الأنبياء قبل النبيﷺ وحوارت كل نبي مع قومه وأن كل رسول قومه أنكروا زي ما هم أنكروا كده ولما استكبروا ربنا انزل عليهم العذاب.. وطبعاً هم كانوا مُعترفين بسيدنا إبراهيم وإسماعيل وموسى وعارفين انهم بشر ، فسكتوا وملقوش مجال يصروا على كلامهم

، لكن العنيد عنيد جابوا شبهة تانيه..
انه ازاي الرسالة للنبي وهو يتيم وفقير مفروض تبقى لحد من العظماء والأشراف الكبار .. وأيضاً ربنا رد عليهم أن الرسالة والنبوة من رحمه الله ، وربنا بيقسم رحمته على عباده ويعلم كيف وأين يضعها ؟ ومن يُعطيه ومن يحرمه !

وبعد كده انتقلوا لشبهة تانية أن مفروض النبيﷺ يبقا ملك وعنده خدم وحشم وقصور ، ميروحش السوق زيهم ويدفع عشان ياكل..
ربنا رد عليهم ان النبيﷺ رسول لجميع البشر الغني والفقير ، الضعيف والقوي ، الأحرار والعبيد ، فلو كان غني وصاحب مال وخدم و حشم كان الفقراء والضعفاء مش هيستفيدوا حاجه وكده غير مصلحة الرسالة ومش هيبقى لها فايدة..
ويكفي انه رسول واللي طلبتوه له من المال وغيره هيخليه مش عارف يبلغ عامة الناس..

فلما ربنا رد عليهم عاندوا أكتر وقعدوا يطلبوا آيات تانيه ويناقشوا برده..!
مفيش فايدة فيهم ، عارفين الحق لكن مُستكبرين..!

نكمل المرة الجاية إن شاء الله..

#السيرة النبوية باللهجة العامية
#خدمة حفيدات النبي ﷺ 😍💙
#بنات وبس👑💜
_____________

للإنضمام:
إرسال رسالة صوتية بإسمك لـ:
+201210204190