السيرة النبوية باللهجة العامية

16

16
يلا صلوا على النبي 💜

وقفنا المرة اللي فاتت ان المشركين طلعوا شبهات واساسها كانت قضية البعث بعد الموت، والرسالة والتوحيد ، خلصنا اول اتنين فاضل قضية التوحيد وحقيقي القضية دي كانت هي رأس القضايا وأصل الخلاف..

المشركين كانوا مؤمنين ومعترفين بصفات الله وأفعاله وأنه الخالق المُدبر الرازق الذي يحيي ويميت وجنب اقرارهم دا كانوا بيقولوا : إن ربنا أعطى قدرة لبعض عباده زي الأنبياء والأولياء والصالحين أنهم يتصرفوا في الكون ويعلموا الغيب وأنهم عندهم القدرة في قضاء حوائج الناس وشفاء المرضى وغيره وإن ربنا اعطاهم القدرة دي لأنهم قريبين منه سبحانه وكمان ان بواسطتهم الناس بتتقرب لربنا وانهم بيشفعوا لهم ، وعلى أساس اعتقادهم الباطل دا كانوا بيخترعوا اعمال يظنوا انها بتقربهم لله وبدل ما يستغيثوا بالله في الشدائد كانوا بيستغيثوا ويدعوا بالأولياء والصالحين والأنبياء..

ومن ضمن الأعمال دي انهم نحتوا تماثيل ووضعوها عند قبور زعموا انها قبور لصالحين فكانوا بيتمسحوا وبيتبركوا بيها ويطوفوا حولها وينذروا لهم ويقدموا لهم الزرع والطعام والشراب والأنعام والذهب والفضة والأموال..

كانوا بيقدموها ازاي؟!
الاكل والشرب والزرع والذهب والاموال كانوا بيقدموها عن طريق سدنة وحُجاب ناس زي خدام للآلهة بتاعتهم عايشين جمب التماثيل ( طبعاً السدنة دول أصلا هما اللي اخترعوا فكرة تقديم القربات للتماثيل عشان ياخدوا الحجات دي لنفسهم نصابين يعني )..

اما الانعام والدواب فكانوا بيطلقوها تمشي في الارض تسرح لوحدها ومحدش يتعرضلها ولا يأذيها او يدبحوها على القبور ويذكروا اسم الإله بدل اسم الله (طبعا كل دا السدنة بياخدوه)..

وكانوا بيحتفلوا بالتماثيل دي ويعملولها عيد وكل دا معتقدين انهم بيتقربوا لله ، ودا ملخص شركهم بالله واتخاذهم آلهة من دونه..

لما النبيﷺ جاء بالتوحيد وابطل كل إله من دون الله المشركين صعب عليهم الكلام دا و انكروا وقالوا اكيد بيعمل كده مؤامرة علينا ، ولما بقا خدتهم الحمية وقرروا يدافعوا عن اعتقادهم الباطل ، جاتلهم الحجج والأسئلة اللي بتبطل كلامهم من كل جانب..

ازاي عرفتوا ان ربنا اعطى لعبادة المقربين قدرة هل عرفتوا الغيب؟!
ام شفتوا الكلام دا في كتاب من كتب الأنبياء أو أهل العلم؟!
(طبعا الحجج دي كانت عبارة عن آيات وفي اكثر من موضع من القرآن)..

المهم أخيرا اعترفوا انهم لم يطلعوا على الغيب ولا شافوه في كتب الأنبياء وبكده اعترفوا بعجزهم وجهلهم..
وأنزل الله الآيات التي تبين عجزهم وان الله يعلم وانتم لا تعلمون..

بعدين بالعقل كده طالما الآلهة دي عاجزة فهي لا تستحق العبادة ولا التوجه لها بالدعاء وسؤالهم كلام فاضي ملوش فايدة والأمثلة في القرآن مثل
{ وَالَّذِينَ يَدْعُونَ مِن دُونِهِ لَا يَسْتَجِيبُونَ لَهُم بِشَيْءٍ إِلَّا كَبَاسِطِ كَفَّيْهِ إِلَى الْمَاءِ لِيَبْلُغَ فَاهُ وَمَا هُوَ بِبَالِغِهِ وَمَا دُعَاءُ الْكَافِرِينَ إِلَّا فِي ضَلَالٍ } ..

بعدين ربنا دعى المشركين انهم يفكروا شويه طالما هما معترفين بأن الله الخالق وان آلهتهم لم يخلقوا شيئاً فازاي يتساوى الخالق القادر بالمخلوقين العجزة ؟! ازاي جمعتم العبادة والدعاء لله ولهؤلاء..؟!

طبعاً لما النبيﷺ وجه لهم السؤال دا بهتوا وبلعوا لسانهم ومعرفوش يردوا وندموا ... لكن زي ما قلنا المرة اللي فاتت المتكبر متكبر والعنيد عنيد..

قالوا آباؤنا وأجدادنا كانوا من أعقل البشر وهم كانوا بيعبدوا زينا وكانوا على نفس ديننا وكمان اجدادك يا محمد ﷺ كانوا كده فكيف يكون دا ضلال وباطل!!

فقالهمﷺ انهم كانوا ضالين لا يعرفوا الحق ولم يبحثوا عنه ودا معناه انهم لا يعقلون ولا يهتدون..

راح المشركين خوفوا النبيﷺ من الآلهة بتاعتهم وانه لو أساء الأدب للآلهة وقال كلام يبين عجزهم هيغضبوا عليه وهتهلكهم وتأذيكم..
فرد النبي ﷺ انهم هما أصلاً شاهدين ليل نهار ان الآلهة لا تستطيع ان تتحرك او تتقدم وتتأخر وحتى عاجزين يدافعوا عن نفسهم فكيف هتضر المسلمين؟!

ولما وصلوا للنقطة دي المشركين هاجوا وزعقوا ( طبعاً دا بيحصل لما اللي قدامك مبيلاقيش رد مش بيعمل حاجه غير انه يزعق وخلاص ) وفضلوا يسبوا في المسلمين ويشتموهم حتى وصل والعياذ بالله انهم سبوا الله ، وربنا سبحانه وتعالى نهى المسلمين انهم يردوا بالسب
{ وَلَا تَسُبُّوا الَّذِينَ يَدْعُونَ مِن دُونِ اللَّهِ فَيَسُبُّوا اللَّهَ عَدْوًا بِغَيْرِ عِلْمٍ }

واما المشركين فقرروا انهم يحبطوا الدعوة ويصدوا عن سبيل الله بالعنف والقوة والضغط..
فكان كل كبير من كل قبيلة يعذب من آمن من قبيلته.. وراحوا لأبي طالب يطلبوا منه انه يوقف هو رسول اللهﷺ عن الدعوة..

والمرة الجايه ان شاء الله هنشوف من صور تعذيبهم للمسلمين...!

#السيرة النبوية باللهجة العامية
#خدمة حفيدات النبي ﷺ 😍💙
#بنات وبس👑💜
_____________

للإنضمام:
إرسال رسالة صوتية بإسمك لـ:
+201210204190