أبو بكر الصديق رضي الله عنه نشط للدعوة إلى الله وبقا هو الساعد الأيمن للنبي ﷺ ، وكان أبو بكر رجل عفيف ، محبوب ، مألوف ، سهل وكريم ، الناس بتحترمه جدآ ، وكان أعلم الناس بأنساب العرب وأخبارها ، رجال قومه كانوا بيروحوله عشان معروف بأخلاقه العالية وعلمه وفضله وتجارته وكرمه وحُسن معاملته..
فدعا للإسلام اللي شايف فيهم الخير وواثق فيه من قومه ، فأسلم على يده كتير من فضلاء الناس أولهم عثمان بن عفان ، والزبير بن العوام ، وسعد بن أبي وقاص ، وعبدالرحمن بن عوف ، وطلحة بن عُبيد الله ، بين لهم الإسلام وجابهم للنبيﷺ واسلموا كلهم.. بعد كده اسلم أبو عبيدة بن الجراح وأبو سلمة وامرأته أم سلمة وغيرهم كتير .. هبعت صورة باسمائهم ..
كل دول كانوا السابقين إلى الإسلام وكان عددهم تقريباً ١٣٠ صحابي وصحابية لكن مش عارفين هل كلهم قبل الجهر بالدعوة او بعد ..!
الوحي بقا تتابع بعد ما نزلت سورة المدثر ويُِقال ان اول ما نزل بعدها سورة الفاتحة ، والنبيﷺ ربنا امره اول حاجه بالصلاة ركعتين الصبح وركعتين بالليل ( ودا ان يدل على شئ فيدل على اهمية الصلاة وان الاسلام مينفعش من غير صلاة ) وجبريل نزل علم النبيﷺ الوضوء والصلاة ، طبعاً كانوا بيصلوا بعيد عن الناس عشان محدش يشوفهم ، ومكنش لسه في عبادات تانيه غير كده.. الوحي اول حاجه كان بيرسخ لهم العقيدة ويبين التوحيد ويرغبهم في تزكية نفوسهم ، ويشجعهم على مكارم الأخلاق ويصف الجنة والنار ، وكان فيه مواعظ تشرح صدورهم وتغذي ارواحهم ..
والنبيﷺ كان بيربيهم على نقاء القلوب والأخلاق وعفة النفس ، والصدق ، يعني كان بيخرجهم واحدة واحدة من الظلمات إلى النور.. وعدت ٣ سنين ع الحال دا وكل الدعوة في السر ، لكن بعض من قريش عرفوا وكانوا بيضايقوا المؤمنين ، بس بصفة عامة كانوا مش مهتمين لأن النبي ﷺ مكلمهمش ولا اتكلم في دينهم ولا آلهتهم..
المرة الجاية نعرف ازاي بدأ النبي ﷺ الجهر بالدعوة وايه اللي حصل ؟!
