السيرة النبوية باللهجة العامية

4

4
يلا صلوا على النبي💜

وقفنا المرة اللي فاتت عند أعظم حدث في التاريخ ألا وهو مولد النبي ﷺ.

وُلد ﷺ في بني هاشم في مكة يوم الإثنين ١٢ ربيع الأول وقيل ٩ ربيع الأول ( أيا كان المولد يوم ايه فالاحتفال بيه ملهوش اصل في الشرع ولم يفعله الصحابة ولا التابعين ولم يرضى به أحد من أئمة الإسلام بل هو بدعة من بدع الفاطميين وهم روافض مش أهل سنة)

الداية اللي هي ولِّدت أمه اسمها الشفاء بنت عمرو أم عبدالرحمن بن عوف ، ولما آمنة أمه ﷺ ولدته شافت نور خرج منها ، النور دا أضاء قصور الشام.

بعد ما اتولد ﷺ بعتت آمنه لجده عبدالمطلب تبشره فجاء وهو مبسوط مستبشر ، وشاله ودخل بيه الكعبة وحمد ربنا ودعاه ، وسماه "محمد " عشان كان بيتمنى أنه يحمده أهل الأرض وأهل السماء ، و عمله عقيقة وختنه ف يومه السابع ، وأكّل الناس زي ما كان العرب بتعمل .

أول واحدة ضمت النبي كانت أم أيمن اسمها "بركة الحبشية" دي كانت حاضنته يعني المربية بتاعته ، وكانت جارية عند والده عبدالله ولما مات فضلت تخدم أمه آمنة بنت وهب .

أول واحدة أرضعته بعد أمه ثويبة دي كانت جارية عند عمه أبو لهب ، وكانت رضعت قبله عمه حمزة بن عبد المطلب وبعده أبا سلمة عبدالأسد المخزومي ، فدول أخوات النبيﷺ من الرضاعة.
والعجيب أن أبو لهب اعتق الجارية دي من كتر فرحه بمولد النبيﷺ ، وبعد ما الإسلام جاء بقا أبو لهب من أكتر أعداء النبي ﷺ.

كان زمان من عادة العرب أنهم بيعطوا المولود لمرضعة من البادية ، عشان يتربى هناك في جو صحي بعيد عن الأمراض وعشان يتعلم الفصحى من صغره ،

وقدّر ربنا أن جاءت المرضعات من بني سعد ، فعرضوا النبي ﷺ عليهم محدش وافق ياخده لأنه يتيم ﷺ ومين هيدفعلهم!

هما كانوا عايزين حد أهله أغنياء ، فالمهم واحدة منهم اسمها -حليمة بنت أبي ذؤيب- كانت جايه متأخره لأن الدابة اللي راكبة عليها ضعيفة وبطيئة جدا ، فلما جات ملقتش قدامها غير النبيﷺ فأخدته .

ومن ساعة ما اخدتهﷺ البركات بدأت تنزل عليهم، لما كانت جايه مكة كانت أيام قحط وجفاف ، وكانت معاها أبطأ دابة ، وكانت معاها ناقة مبتجبش حتى نقطة لبن ، وعندها ابن صغير طول الليل يصرخ ويعيط جعان ومفيش لبن ، لدرجة ان محدش فيهم بينام .

وبعد ما اخدتهﷺ وراحت للمكان اللي فيه الدابة والناقة والراحلة بتاعتهم يعني ، حطته ع حجرها ورضعتهﷺ ففضل يرضع لحد ما شبع ورضع ابنها الصغير هو كمان لحد ما شبع وناموا ، وقام زوجها للناقة لقاها مليانة لبن ع اخرها فحلب منها وشربوا لحد ما شبعوا وناموا ودي كانت أحسن ليلة عدت عليهم.

وهما راجعين بقا للبادية ركبت حليمة ع الدابة وشالت النبيﷺ فجرت بيهم لدرجة انها سبقت كل اللي معاها ومدحش عرف يلحقهم ، والناس بقوا يحسدوها على الخير اللي حصلهم دا ،