السيرة النبوية باللهجة العامية

33

33
يلا صلوا على النبى ^_^

أسلم سيدنا عمر بن الخطاب ♡.. قبل ما نكمل الرعب اللى فيه قريش بعد إسلام عمر  ححكيلكوا موقف جميل أوى عن سيدنا عمر مرة النبي عليه الصلاة و السلام كان جالس فى مجلس يعظ النساء و كان سيدنا عمر رايح له .. فخبط على الباب فقال رسول الله ﷺ : من ، فرد وقال : " أنا عمر يا رسول الله ".. ففجأة كل النساء اللى كانوا قاعدين أختفوا و أستخبوا بسرعة .. فقال النبى ﷺ : " أدخل يا عمر "، فدخل عمر فلاقى النبي صلى الله عليه و سلم بيضحك ^_^ ..

فقال عمر : " أضحك الله سنك يا رسول الله ، لما تضحك " ( البيت فاضي ) ، فقال ﷺ :
" يا عمر أضحك على هؤلاء النسوة " ، فيبص عمر و يقول : " يا رسول الله أي نسوة ؟ " ، فيقول النبى ﷺ : " يا عمر كن عندي تسألنني عالية أصواتهن .. فلما سمعن صوتك يا عمر خفن و أبتدرن الحجاب " ( راحوا ورا أى عمود يحجبهم عن عمر و أستخبوا وراه ) فأتعصب عمر أوى ( خافوا مني .. و مش خايفين من رسول الله ) فراح عمر عند عمود من عواميد البيت وقال لهم : " أي عدوات أنفسهن أتخافن منى ولا تخافن من رسول الله " ..

فقامت واحدة شجاعة من النساء راحت قايلة : " أجل يا عمر إنك فظ .. غليظ " ، فأستحى عمر و زعل أوى ( أصل عمر شخصية عجيبة أوي الشديد الحنين القوي الرحيم الطيب الجامد ، إزاي بيجمع بين المتضادات دى ! .. محدش يقدر يجمعها غير عمر بن الخطاب رضي الله عنه ) ، فالنبي ﷺ بقى عايز يطيب خاطر عمر فراح عليه الصلاة والسلام قايل : " يا بن الخطاب و الله يا عمر ما رأيتك سلكت فجاً ( طريق ) إلا و سلك الشيطان فجاً غير فجك يا عمر " ( أنت زعلان منهم ده إبليس نفسه بيخاف منك لو لاقاك مشيت طريق بيقوم سايبه و يمشى فى طريق تانى ) .. فضحك عمر ^_^ ❤ ..

نشوف بقى دلوقتى حال قريش بعد إسلام عمر .. إسلام عمر هز قريش .. قريش وقفت تعذيب الصحابة بعد إسلام عمر عشان خايفين منه ، فبدأت قريش تدور على حل تانى تتقى بيه شر عمر .. فلجأت للتفاوض مع مين ؟ مع النبى صلى لله عليه وسلم .. طب إزاى ؟ قريش قالت لازم نفكر في حاجة نسكت بيها محمد أو نرشيه عشان يسيب الدعوة للإسلام .. بس قبل ما يعملوا ده ، بعتوا واحد اسمه " عتبة بن ربيعة " ..

فيروح عتبة يقول للنبى كلام لئيم أوي قدام كل العرب .. يقول عتبة : " يا محمد أأنت خير أم أبيك أم جدك عبد المطلب ؟ فإن كنت يا محمد تقول أن أبيك خيرآ منك و جدك خيرآ منك فلم تركت ألهتهم ، و إن كنت تقول أنك خيرآ منهما فأخبرنا حتى نقول للعرب " .. ( طب دلوقتى النبى ﷺ يرد بإيه ؟ في الحالتين الإجابة وحشة طيب ليه ؟ أصل النبى لو قال أه هما أحسن مني .. يبقى حيقولوا طيب ليه سيبت دينهم ؟ و لو النبى قال أنا أحسن منهم .. فدى حتبقى وحشة لأن العربي عيب أنه يعيب في أبوه و جده ، فدى مش أخلاق العرب ) ..

عتبة واقف مستني الإجابة عشان يجرى و يروح يسوء بيها سمعة الرسول ﷺ .. فالنبي إبتسم إبتسامته الجميلة عليه الصلاة و السلام و سكت و ماردش و مشي .. فعتبة أتجنن .. فراح مع قريش و قرروا يعرضوا علي النبى ﷺ شوية رشاوي (شوفوا بقى الحوار بينهم و إزاي حبيبك النبي بيقابل سوء الأدب بالإحسان ) .. يدخل عتبة بن الربيعة و يقول : " يا أيها الرجل " ، فيرد النبى ﷺ : " يا لبيك "، قال : " يا أيها الرجل إني عارض عليك أموراً فأنظر أيهما تقبل " ، قال النبي ﷺ : " أجل يا عتبة تكلم .. أسمعك " ..

فقال عتبة : " يا محمد إن كنت تريد المال .. قل .. فنجمع لك كل أموال العرب فتصبح أغنى أغنياء قريش و إن كنت تريد الجاه و السلطان جعلناك علينا و لكن كف عما تقول .. و إن كنت تريد النساء أخبرنا فنجمع لك أجمل جميلات قريش و نزوجك 10 من النساء ولك ما تريد يا محمد .. و لكن دعك مما تقول " ( طيب لو أنت مكان النبي ترد إزاي ؟ .. ده سوء أدب مع النبي صلى الله عليه و سلم ، أى شخص شريف لا يمكن يستحمله ) ..

فيرد رسول الله بآيات فى سورة فصلت : { حم * تَنزِيلٌ مِّنَ الرَّحْمَٰنِ الرَّحِيم *ِ كِتَابٌ فُصِّلَتْ آيَاتُهُ قُرْآنًا عَرَبِيًّا لِّقَوْمٍ يَعْلَمُون * بَشِيرًا وَنَذِيرًا فَأَعْرَضَ أَكْثَرُهُمْ فَهُمْ لَا يَسْمَعُون } ( وفضل النبى يقول الآيات لحد ما وصل للأية دى ) :َ { فَإِنْ أَعْرَضُوا فَقُلْ أَنذَرْتُكُمْ صَاعِقَةً مِّثْلَ صَاعِقَةِ عَادٍ وَثَمُودَ } .. فقام عتبة حاطط أيده على فم النبي ﷺ و قال : " ناشدتك الرحم يا أبا القاسم أن تسكت " ( عتبة خاااف و أتأثر بالقرءان ، القرءان هزه و صدق إن في صاعقة حتنزل لو النبى كمل كلام ) ، و فعلا سكت النبي صلى الله عليه و سلم ( بردوا النبي ﷺ سياسي ) ..

فرجع عتبة لقريش فقالوا له : " ما فعلت يا عتبة ؟ " .. فقال : " و الله ما فهمت من كلام محمد شئ غير أن صاعقة ستنزل علينا " ، و راح عتبة قايل : " أتركوا محمد يفعل ما يشاء " ( يعنى سيبوا محمد يعمل اللى هوه عايزه أحسن ) .. فقالوا لعتبة : " والله لن نتركه أبداً " ( مش حنسيبه ) .. طيب قريش حتعمل أيه ؟

هنعرف بكرة إن شاء الله ❤
#كن_محمديا