السيرة النبوية باللهجة العامية

34

34
يلا صلوا على النبى :)
هجرة المسلمين للحبشة (ج2)

الصحابة لازم يهاجروا .. قريش بتعذبهم أوى .. و يبدأ النبى ﷺ يقول للصحابة : " أذهبوا إلى الحبشة فإني أرجوا الله أن يجعل لكم فرجاً و مخرجا و إن بها ملك لا يظلم عنده أحد ".. ملك الحبشة و يقال له " النجاشى "، طيب حتخلى مين يسافر من الصحابة يا رسول الله الضعفاء اللى بيتعذبوا وبس ؟ لأ .. سيدنا " عثمان بن عفان " مسلم و من قبيلة كبيرة و مش بيتعذب و مش محتاج يسافر و رغم كده الرسول حيبعته للحبشة و "رملة بنت أبي سفيان " بنت " سيد مكة " حتهاجر ..

و " رقية بنت محمد " ( بنت رسول الله ) و " عبد الرحمن بن عوف " و " جعفر بن أبي طالب" و معاهم مجموعة من الفقراء و الضعفاء من الصحابة اللى بيتعذبوا .. و كله يقول : " لبيك ( حاضر ) يا رسول الله " ، حتى اللى شايف أنه مش بيتأذى من قريش و مش محتاج أنه يهاجر لكن أدب الصحابة و طاعتهم للنبى ﷺ خلتهم يوافقوا و بدون أى جدال :) ❤ ..

طيب ليه يا رسول الله حتخلى ناس تهاجر رغم أنها مش بتتأذى ؟ عشان يوصل 3 رسايل :
1) لقريش : عشان قريش تشوف أن اللى بيسلم مش الضعفاء و الفقراء بس .. لأ .. كبراء القوم كمان و مش بس كده .. ده رسول الله بيقول أنا أمرتهم يهاجروا رغم أن فى منهم ناس مش بيتعذيوا لكن سمعوا كلامى كمان و حيسيبوا أهلهم و حيهاجروا و ده طبعآ هز قريش جداً  لأنهم حسوا بإن الإيمان بيقوى المسلمين و أن محمد بيتسمع كلامه بالحرف الواحد ..
2) رسالة لضعفاء المسلمين : النبى عليه الصلاة و السلام عايز يقولهم إن أنا باعت ناس مهمة معاكم مش حغربكم برة مكة لوحدكم .. ده أنا حبعت بنتى رقية معاكم كمان ♡.. يا جمال سيدنا النبى ..
3) رسالة للنجاشى ملك الحبشة : النبى ﷺ عايز يفهمه أن أنا مش باعت لك الفقراء و الضعفاء عشان تعطف عليهم .. لأ .. دول فيهم كبار القوم ، فحافظ عليهم و أكرمهم ..

طيب دلوقتى الهجرة الأولى للحبشة كانت 18 فرد فقط ، و الهجرة الثانية حتبقى 82 فرد فالمجموع كله 100 صحابي و الصحابة الوقت ده كانوا 300 ، يعني 1/3 المجتمع المسلم هيهاجر للحبشة على رحلتين ( هجرتين ) و 1/3 ده كتييير .. طيب حتروح معاهم يا رسول الله ؟ لأ .. النبي مش حيسافر .. طيب ليه ؟ .. عشان النبى مش حيرضى يمشى و يروح للأمان فى الحبشة و يسيب باقى المسلمين فى مكة لوحدهم .. صلى الله على سيدنا محمد ❤ .. حتى بعد كده في الهجرة من مكة للمدينة زي ما حنشوف حيبقى النبى عليه الصلاة و السلام آخر واحد هيهاجر من مكة بعد ما يطمن على كل الصحابة الأول أنهم هاجروا للمدينة ..

طيب دلوقتى حيهاجر عدد من المسلمين لأراضى الحبشة و قبل ما يمشوا نزلت سورة " الكهف " و سورة " مريم " ، طيب ليه ؟ أصل الكهف كلها بتحكي عن أصحاب الكهف اللي هاجروا قال تعالى : { وَإِذِ اعْتَزَلْتُمُوهُمْ وَمَا يَعْبُدُونَ إِلَّا اللَّهَ فَأْوُوا إِلَى الْكَهْفِ يَنشُرْ لَكُمْ رَبُّكُم مِّن رَّحْمَتِهِ وَيُهَيِّئْ لَكُم مِّنْ أَمْرِكُم مِّرْفَقًا } .. كأن ربنا بيطمن الصحابة ♡ إن مش أنتم اللي حتهاجروا بس ..لأ متقلقوش .. أصحاب الكهف كمان هاجروا من قبلكم .. أصل في تاريخ العرب أول قبيلة عربية تهاجر هي المسلمين ففكرة الهجرة مش سهلة أبدآ عند العربي ، و بكده يطمنوا بقصة أصحاب الكهف .. أما تاني سورة كانت سورة مريم .. طيب أشمعنا ؟

حنعرف سوا بكرة إن شاء الله ❤
#كن_محمديا