ارواح لاجئة (مكتملة)

الجزء الثاني والثلاثون

ارواح لاجئة
بقلم // الفهدة السوداء
البارت الثاني والثلاثون

سديت باب الغرفه
صفنت على حيطانها
راح تنورهه ميري
وتحليها بوجودها
فكرت اسوي الحيطان ورق جدران
بلون غامق مثلا اسود
والغرفه اخذها بيضه او اوف وايت
فكرت بالثريات والكرستاليات الي راح ينحطن هنا
حته بلون الفرشه مال عرس ولون البردات
امتلئ صدري امنيات
جانت ميته قبل هالايام
مددت ولزمت موبايلي
لكيتها دازتلي

رساله

غركتني حب ومشاعر
فاقدها
حسيت بشغلات غريبه عجيبه
اماكن بكلبي اول مرة تنبض بهالشكل
غمضت عيوني ..
اريد اسيطر على نبضي
اريد اسيطر على انفاسي
ذوبتني
بكلمات بسيطه

ماريان :: حته لو ماتقبل اكولك حبيبي
تبقى حبيبي
ويبقى كلبي بس الك ينبض

مارسيل :: لا تكولين حبيبي .

دزيتلها هالرد اريد اشوف لوين طاقه تحملها
ولو اني ادري بيها من تحط هدف كبالها توصله يعني توصله

راحت ماردت يمكن نامت
او يمكن ضاجت
تمنيت لو ما راد عليها هيج
ابالي اسولف وياهه شويه
ادردش على امور حلوة تخصنا
انتظرتها ساعه
ماكو رد
تركت الموبايل ونمت

***************************************
شكد دمه ثكيل صاير
معقوله تواجده بأوربا هالكد اثر بي
وخلا يصير ثكيل هيج
ذبيت الموبايل
بالله اني شجابني على هالدرب
ناقصه اني
وهيج جازفت هالمجازفه
انوب هذا الزواج الثاني
يعني مامنه مفكه

..
رحت لغرفه اجوان
صارلها فترة مكتأبه حيل
اريد اشوفها شلونها
وشسوت
دكيت الباب

اجوان :: منوو

ماريان :: اني

اجوان :: فوتي
دخلت لكيتها نايمه على بطنها
ومنزله ايدها من الجربايه
وتلعب بخيوط الزوليه
وعيسى نايم على القنفه
ويلعب بتليفونها

ماريان :: ها شلونكم
موسى وين

اجوان :: يريد علج وماعندي
دزيته لأمي

ماريان :: وانتي شلونج

اجوان :: هذا لوني

ماريان :: كومي كعدي عدل خلاحجي وياج

كامت عدلت نفسها وحطت المخدة على راس الجربايه
وانتجت

اجوان :: تعبانه
مالي خلك احجي شي

ماريان :: حجيتي ويا محمد 
بالي كلت الج عليه

عقجت وجهه ودارته على جهة الكنتور
حركه تسويها دائما من ماتريد تحجي
اجوان :: كلشي ماسويت

ماريان :: عيسى تعال نروح لبيتنه
وانتي شوكت ماتحسين نفسج تريدين تسولفين
تعالي