ارواح لاجئة (مكتملة)

البارت الاول

٢٠١٧
بالسيارة
واكفه بتقاطع الربيعي انتضر الاشارة تضوي اخضر
اول عرض لاغنية الذاكرة لنور الزين
جنت اصغي الها
اربكتني عبالك تحجي عليه
مقطع ورا مقطع تمزق قلبي لكلماتها
الي نبهني لروحي وحسسني هو دمعه حارة نزلت ع خدي جوتني وفززتني

صار هواي ما باجيه ولا فاتحه حسابات الماضي الي غلقته بكل تفاصيله حلوهه
ومرها
فجأة لمست خدي اصابع ترفه بارده ومدبدبه ورطبه وهو يسالني
مامه أشبيج ليش وجهج حار وساكته ما اسولفين ابتسمت وكتله
حبيبي تعبانه ومالي خلك احجي انتو استمتعو باوعو من السيارة

سديت الجامات للنص وقفلت من يمهم وخليت التحكم بس يمي خاف يمدون ايديهم و ينضربون

دارو وجهم يباعون للمحلات والاسواق والحدايق العامه تحديدآ الساعه ب ٧ بليل والجو ربيع نهاية شهر الثالث
رجعت لافكاري اسوق وافكر
مو بشي محدد
بس الشاغل بالي الوجع الي احسه بروحي وكلبي وسؤال ليش !!! 
وكفت يم مطعم بشارع الربيعي يعود لجيران قدماء والهم مكانه خاصه بالقلب

تعودت اخذ منهم من قبل ١٥ سنه ركنت السيارة وانداريت

مامي راح انزل اجيب عشى لحد ينزل من السيارة ورايه وممنوع تحجون ويه اي بشر واذا اجه عليكم اي احد يحاجيكم دكولي هورن و اخبصو الدنيا بالهورن الى ان اجيكم

اوك بس جيبيلي وياج كص وببسي

تدلل حبيبي وانت شتريد

اريد معلاك

ولك ابو المعلاك ماشايفه واحد بعمرك يحب المعلاك ومتعلق بي هالكد

لا مامه حبابه اريد معلاك ما اكل اذا جبتي غير شي
وجتف ايدي وبرطم

اجيبلك ميخالف لا تزعل بس صيرو حبابين وكعدو بهدوء بينما اروح وارجع

نزلت وقفلت السيارة واخذت السويج مشيت خطوتين ورجعت للسيارة ناسيه الفلوس رجعت اخذتهن من الجنطه واني اضحك ع روحي دائما انسى شي ولازم ارجع علموده تمشيت للمطعم اول ما دخلت ابتسم موظف الاستقبال

تفضلي ست ماريان اليوم متأخرة كلنه ماتجين

هه لا شلون ما اجي لازم نسجل دخول ما نخلى من الكص و المعلاك والكباب والطلبات مال زعاطيط

الله يحفضهم الج وتشوفيهم احسن الناس يارب

تسلم حمودي

رحت وصيت على الاشياء الاريدها و رجعت بسرعه للسيارة وهمزين وصلت بلوقت المناسب متعاركين ودايتضاربون ومن قوة حركاتهم السيارة تهتز

عوف اخوك لا اطيح حظك متعاقبين وما الكم حلويات اليوم

مامه هو يكول اخذ الريمونت من نوصل للبيت وماخليك تشوف كارتون يكول غصب عنك اديرة ع طيور الجنه   ومابقي على CN نيتوورك واني كتلته وهو هجم عليه شرمخني