ارواح لاجئة (مكتملة)

الجزء الرابع عشر

ارواح لاجئه
بقلم // الفهدة السوداء
البارت الرابع عشر

ارسلان ::اني اعلمه هالمخنث
شافجن بس بنات كعد يوزع رقمه

اجوان ::دكعد ياعيني اكعد
احنه بمستشفى وعيب صوتنه يعلى
هو ادبسز احنه نتصرف باخلاقنه
ونحترم المكان الاحنه بي

ارسلان ::هسه هو اختفى مدري وين راح
اخخ لو الزمه الا انعل والديه

ماريان ::اكولك قبل لاتتخربط امي
جانت امك متصله بيها
ورا المكالمه تخربطت
ماعرفت شكو بيناتهن

ارسلان ::لا ماعندي اي فكرة عن الموضوع
جنت طالع بالشغل من اتصلتو بيه بس وديت جهالج واجيتكم

ماريان ::هاا خطيه الله يكويك

شويه واجه محمد
كامت اجوان سلمت عليه
واجه سلم علينه وعلى ارسلان
طبعآ ارسلان يعرف بموضوعهم
لان اكثر من مرة اجه خطبها
واخر مرة امي دزت على ارسلان وابو
حته يحضرون وياهه

دائما اتسائل
ليش امي ماعندهه خوال او عمام
يحظرون مناسباتها او مشياتنه واعراسنه
من اسألها على اخوة او اخوات
تكول اني وحيدة لاهلي و امي وابوي وجدي وبيبيتي
توفو قبل ما تنولدون
زين خوالها وخالاتها وين ليش محد يزورها
دائما تكول انو تهجرو لان مسيحين

ماكو جواب عن كل هالاساله

محمد ::شلونج ام عيسى

ماريان ::هلا بيك محمد شلونك انت

محمد ::الحمد الله ان شاء الله تكوم امكم بسلامه وماتشوفون شر ابد

ماريان ::رحم الله والديك
اهلك شلونهم

محمد ::بخير الحمد الله
محتاجين شي

ماريان :: تسلم حمودي ماتقصر
بس ارسلان موجود
اذا احتاجينه شي اكيد نتصل بيك

محمد :: خوش راح اخلي الموبايل يمي وان شاء الله صحة وعافيه لخالتي
مع السلامه

ماريان ::الله وياك

طلعت اجوان ويا وظلينه بالغرفه يم امي اني وريتا وارسلان

دقايق وبدت امي تستعيد وعيها
كعدت باوعت النا

ناديه ::شصار

ماريان ::شلونج يمه
شجاج حبيبتي
ليش هيج تخوفينه عليج

ناديه :: اسم الله عليجن يوم حبيباتي
لاتخافون مابيه شي
بس كلولي شصار اني وين

ماريان ::تخربطتي وجبناج مستشفى
والطبيب كال للعصر وتكدرين تطلعين
بس تستعيدين عافيتج ويتعدل ضغطج

ناديه :: مابيه شي بنتي خلنطلع هسه
اريد ارجع لبيتي

ماريان :: لا يمه حبابه ضلي الى ان الطبيب يكول مابيج شي خاف لليل وتتخربطين من جديد