نغم في ظل الرجال

البارت الرابع 4

                           الكاتبـــــه مـــريمانهـ 📖

انا المايدري المن عايش وليش  
انه الخلصت حياته بجلمه البيش
انه المدفون خلكه ويحلم بريش
__________________*******_________
عصام:  اوكفي نغم وباوعيلي  !
التفتت واني الخوفه بكلبي "
""""""""""""""
عصام : اسمعيني زين وركزي وي كل كلمه
انتي راح تعيشين وحدج اي زله اي تصرف يبدر منج غلط
لو تلعبين بذيلج راح تلكيني فوك راسج وادفنج بمكانج
وميرفلي جفن ولا يوكف بعيني اي بشر وهسه الله وياج
بس خلي كلامي ترجيه باذنج واحسبي احسابج
...............
عـــــــلاء
لا عصام محبيته منك نغم ونعم منها واني واثق منها
واعرف سدي امين لا تهدد ولا هم يحزنون
عصـــام
ماكلت شي اني خلي اتحط كلامي كدامها
""""""""""""""
نغــــــــم
يباوعلي بخزره واني صرت بنص اهدومي  اهدومي يعني
لو غير علاء جان كال هاي شعدها واخوها هيج
يهدد ويحذر بيه مال وحدها عدها سوابق واني
كلشي ماعندي بس هاي بعد  طلعت بدون ما اسلم عليهم
اول ما خطينه خطوه خارج البيت وابتعدنا التفت عليه علاء
وكال
///////////////
عـــــلاء
نغم شبي وجهج خوما احد اذاج سوالج شي
نغم :  باوعت عليه شجاوبه اول ما طبيت اكلت كتله معدله
كتله لا محد مد ايده ولا اذاني
علاء: الحمدلله اجرت شقه كلش حلوه وراح تعجبج انشاءلله
نغم: حبيبي كلش فرحانه بس مكتلي منين راح ادبر ايجار وعيشه
علاء : ولله يا حبي اني ماعندي غير حل راح اشتغل وي اخوتج وشغل اضافي
نغم: شنو هذا الشغل الاضافي؟
علاء: راح ابيع جاي  اشتريت ترامس احضر الجاي الصبح
واهناك ابيعه
نغم: الله يفتحه بوجهك حبيبي ويرزقك وانعيش العمر كله سوه
علاء :اي ولله حبي اندعيلي
نغم: حبيبي شسويت وي اهلك محجيتلي
علاء: مسويت شي اصلا مااحجي وي احد بس رحت للبيت اخذت غراضنه وحطيتهن بالشقه وامي كامت تبجي واتكلي اتوقعتك اطلك وترجعلي يعني حتى متريدني الا اطلكج
نغم: علاء يعمي تدري هذا الموضوع كله علمود ماعون فواكه اكلته
علاء: نغومتي عوفي الموضوع وسدي راح انعيش سوه وبالنه انشاءلله يرتاح وماكو لا اهلج ولااهلي
نغم:هاي هي حبيبي الله يفرجه علينا مشينا  وركبنا للشقه
وصلت لمكان بعيد عن اهلي المنطقه جانت نزلت من السياره فورتات جنه راكبين العماره جانت جبيره ودايره مدايرها عماير بعد وكله شقق وبيها عالم طبينا بعماره وصعدنا للطابق الثالث فتح الباب بالمفتاح دافوت كال اوكفي
،،،،،،،،،
عــــــلاء
سمي باسم الله وبرجلج اليمين فوتي
نغم: ابتسمت وسميت وطبيت للشقه اول ماطبيت
جانت كلش صغيره حمام واحد وغرفه ومطبخ وصاله اصغيره كلش يعني وبالكونه من الغرفه
المطبخ حلو بي كاطع وفتحه يعني ديكور والغرفه مالتي منصوبه وكامله بس ارتب غراضي وبالمطبخ طباخ اصغير على طبله
وهاي هي لان ماعندنا غراض يعني لا ثلاجه ولا كاونتر ولا اماعين ولا اي شي من مستلزمات البيت بس اهم شي ارتاح وراسي بارد
""""""""""
عـــــلاء
ها عمري اشلون شفتي الشقه
نغم: اتخبل حبيبي كلش حلوه الحمدلله ربي المهم نرتاح بيها
علاء: صح فارغه بس انشاءلله شويه شويه اشتري الي اكدر عليه
نغم: حبيبي اني اكدر اساعدك عندي فلوس
علاء: منيلج حبيبتي
نغم: كلادتي وتراجي مالت العرس ابيعهن واشتري مستلزمات البيت
علاء: لا حبيبتي اني اتمنى يصير عندي واشتريلج ذهب مو ابيعج العندج
نغم: ماكو فرق الله يرزقك واجيبلي عود اني حابه اجيب غراض لليبت يحتاج اماعين وميز احط عليه الغراض
علاء: عمتي ام نصير الله ينطيها من سمعت بينا طلعنا واجرت كالت باجر مر عليه انطيك غراض زايده عندي واماعين
نغم: الله ينطيها الصحه والعافيه هاي عمتك فعلاً ورده ونعم منها
علاء: اي ولله تعاي خلي ناكل البارحه بتت اهنا من جبت الغرفه نصبتها واشتريت جبن واخذت خبز من بيت اهلي جانت امي خابزه
نغم: ردت اكله جان مااخذت منها شي بس سكتت  لان هي ولو الدنيا حصار و هم يادوب راح انجيب الراس عالراس خلي بس استقر
علاء: اكو علاكه بالغرفه جيبيها مال اكل
نغم: صار ، رحت للغرفه جبتها فرشت جرجف عندي بالكاع وكعدنه جنه من نحجي يطلع صدى لان فارغ المطبخ ونضحك على روحنا فتح العلاكه بيها طماطه وجبن وخبز كعدنا ناكل واحس مو جبن وطماطه عبالك اول مره اكلهن كد ما فرحانه واحس صارتلي
خصوصيه وحياة ثانيه فرقت عندي اول ما طبيت للشقه
((((((((((،،،،،،،،،،،،،،،،،،،،،،،،،،،،،،،،،،،،،،،،،،،،)))))))))
ثاني يوم ()
كعدت الصبح من وكت تقريبا ب6 كمت احضر بالجاي علمود علاء
راح يبيع واخدر واحط بالترامز تقريبا اربعه سويت للسبعه ونص طلع علاء واني بعدها مرجعت نمت اكلت جبن وخبز وجاي ولكيت ماسحه وغراض شغل للبيت وبلشت انظف بالبيت صفطت غراضي على الميز تواليت وبالكنتور غسلت الحمام وبقيت اجلف وانظف فتحت البالكونه ونظفتها باوعت داير مدايري كله شقق وعماير ايطل المنظر من البالكونه  خلصت للمغرب يله اجه علاء اول مره يتاخر طب وجايب غراض سلم عليه وكال طبي للغرفه وياي ولد طبيت وسديت الباب واسمع صوتهم كل شويه يرحون ويجون بعدها طلعو اني بقيت بالغرفه صاحني علاء
،،،،،،،،
عـــــــلاء
تعاي نغومه شوفي عمتي شدزت
نغم: اجيت اركض وانصدمت بالغراض هوايه
علاء: تعاي يمي هاي بوسه من عمتي الج وتسلم عليج وكالت امرلكم من تستقرون شويه
نغم: فرحت حيل الله يسلمها ويخليها باوعت ميز وكراسي وطبلات اثنين واماعين ودرزن خواشيك اصغار وكبار وصينيه وميز خشب
واستكاين وكلاصات وحتى تحفيات زايده وزوليه ليهسه اذكرهن مثل الشريط كدامي يصير جنت حيل فرحانه بيهن واحس براحه عدلت الميز والكراسي بالمطبخ وكراسي زايده اثنين حطيتهن بالصاله وحطيت طبله وفرشت الزوليه وحطيت على الطبله تحفيه جانت على شكل سمجه كعدت الصاله صارت حلوه والمطبخ انترس غراض ابتسمت صارت مجكنمه ههههههه الشقه
سبح علاء وجان مسوك بتيته وطماطه وخبز كليت واكلنه كعد يسولفلي على الشغل
،،،،،،،،
عـــــــــــلاء
اليوم الترامز بساع خلصن تدرين يرادلي اشتري جوله واخذ قوري  وجاي وشكر وكلاصات زايده حتى اهناك كبل اسوي وابيع خوش بيها شغل لان الجاي عليه طلب هوايه واهناك كله شرابين  جاي كل دقيقه صايحيني بحيث حتى اخوتج كالو انت اليوم مااشتغلت بالمحل زين لان شغل الجاي اكثر
نغم: يعني راح تبطل  من يمهم
علاء: لا حبيبتي مااابطل هم ماحجو ومقدرين وضعي
نغم: الله يحننهم عليك انشاءلله
علاء: احس اليوم اشويه ارتاحيت لان اكدر اطلع ايجار الشقه اهم شي بله الاكل والشرب اي شي جان
نغم: حبيبي شنو رائيك اشتغل واساعدك
علاء: هاي شنو نغم ليش عود وشنو تشتغلين
نغم: اي شي انت شوفلي شغل واني اشتغل تدري  اني اكدر اخبز وابيع
علاء: انت تعرفين تخبزين لو هيج
نغم: اني مااعرف بس مااتوقع صعبه خلي اساعدك اتمنيت اعرف اخيط بس مع الاسف ماااعرف
علاء: حبيبتي الله ساترها والعيشه كافلها الله لاتشيلين هم منموت جوع واتحملين نفسج ملامه اني من واجبي اشتغل وانتي الج الصافي
نغم: الله يرزقك بس اني شفت جوه اكو تنور طين مااعرف المن راح اسأل المن واترخص منهم اخبز بي راح اوصي جاراتنه الي اهنا اكلهم ابيع خبز شكلت حبيبي
علاء: لا اسألين انتي اني باجر اسأل واشوف
نغم: ماشي حبيبي
"""""""""""""
كعدت الصبح كلعاده سويتله جاي واتريك واخذ الترامز وطلع
نظفت  واني كلي نشاط وحيويه فرحانه بالتغيير الي صار بحياتي
اندكت الباب الساعه ب9تقريبا باب شقتي بيها عدسه اشوف منو باوعت منها شفت مره واكفه اترددت افتح لو خاف علاء ميقبل
كلت يله خلي افتح قابل راح تاكلني فتحت الباب كالت
،،،،،،،
مرحباً شلونج خاله ؟
نغم: مريه وجها بشوش  مبتسمه جاوبتها اهلاً وسهلا خاله
اني جاريتج ام ظامن ساكنه تحت شقتج
نغم: كل الهلا تفضلي خاله زارتنه البركه
ام ظامن: فدوه لعمرج بسم الله الله يجعل رجلي عليكم حضره
نغم: خير وبركه خاله اتفضلي فاتت ومبينه خوش مره كلبي ارتاحلها
شتحبين اضيفج جاي لو نسوي ريوك ونتريك سوه
ام ظامن: لا يمه اكعدي كلشي لسوين اني جيت اتعرف عليج
وسمعت من زوجي كال امبنيه وياها رجال اجرو الفوك
حبيت اشوفج ولله
نغم: نورتينا اي  هذا رجلي
ام ظامن: يمه فدوه بس انتي كلش صغيره وطفوليه مامبين عليج مزوجه ابد
نغم:ههههههه هسه يسمعج علاء ويضوج
ام طامن: كلمة الحق تنكال شنو اغش عيوني قابل ماعبالي مزوجه ابد خلي ادك على الخشب شكد عمرج حبيبتي
نغم :  عمري 16سنه  اترخصت منها وكمت حطيت القوري على النار وحضرت جبن و الخبز استحيت ماعندي غيرهن بس شسوي نعمه هذا الموجود رجعت يمها وكلت فرصه ما طول اجتي شويه وافاتحه بموضوع التنور علمود اخبز
ام ظامن: وين رحتي حبيبتي تعاي كعدي خلي نسولف شويه قبل مااروح
نغم: اني ما متريكه داحضر جاي وريوك
ام ظامن: لا تحسبين احسابي
نغم: قابل شمسويه هو جاي وجبن لتخافين ماعندي قوزي
ام ظامن: هههههه حبيبتي عندكم الخبر والبركه انشاءلله صدكي كلبي حبج وارتاحلج شعجب ساكنه وحدج اهنا  واصغيره انتي بعدج ولله يمه شنو لكمتج زايده على اهلج زين زوجج ماعنده اهل
نغم:  اندلكت مكان كلبي لكمتي وكعدتي واني اصلا زايده عليهم جاوبتها عنده بس مشاكل وطلعت من عدهم زوجي ايصير ابن عمتي
انجبرنا اناجر ونسكن وحدنا
ام ظامن: مو وحدج انشاءلله احنه اهل واي شي تحتاجين اني موجوده صدكي مو مجامله واعذريني اجيتج ايدي فارغه بس جنت صاعده للسطح وكلت امرلج واشوف منو سكن واتعرف عليج
نغم: رحت جبت الصينبه ورجعت وكعدنا ناكل اني وياها مقبلت بس اني لحيت عليها وبديت اسألها خاله كم جاهل عندج
ام ظامن: يا خاله اني عندي زلم ماعندي جهال عندي ظامن وناظم
ناظم مزوج وساكن العماره وظامن اعزب يدرس بكربلاء بنبه الله ما رزقني
نغم: مامبين عليج شكد عمرج خاله
ام ظامن: اني عمري 48 سنه ازوجت ابو ظامن عمري 11سنه وخلفت والحمدلله
نغم: ماشاءلله الله يحفظهم الج
ام ظامن : الله يسلمج ماعندج غراض بالبيت اذا محتاجه شي كولي اني مثل امج
نغم: تسلمين خاله ولله زوجي على كد حاله واحنه مصارلنه اهواي من ازوجنه تعرفين الوضع هم حصار وتعبان فكلي شويه شويه اشتري غراض
ام ظامن: الله يرزقكم اكول حبيبتي زوجج شنو يشتغل ؟
نغم:زوجي فيتر ويبيع جاي شغل ثاني علمود العيشه والايجار والحمدلله اكلج خاله ارد اسألج يس خجلانه منج
ام ظامن: كولي حبيبه صار بينه زاد وملح صرنه اهل بالخدمه اني
نغم: اني اريد اخبز وابيع اساعد رجلي فردت اسأل عن التنور الجوه المن علمود اخبز بي
ام ظامن: هذا التنور للعماره كلها صح اني سويته بس ماامنع الي يريد يخبز بي كدامج واذا تردين اساعدج بالخبز ماعندي شي
نغم: اشكرج خاله بس ياريت اتكولين للجيران علمود يشترون مني الخبز بس كليلي اول هم يشترون اذا خبزت تمشي هاي الشغله اهنا
ام ظامن: اي ياخذون تعرفين اكو يجون عليه يجيبون عجينهم واني اخبز بدون افلوس جنت اساعد جاراتي بس بعد راح اكللهم عليج
حتى يجون يشترون منج واني اعلمج خياطه اذا تردين هاي الشغله هم ماشيه وبيها خوش رزقه
نغم:ولله خاله ياريت اسوين فضل عليه ماانسالجياه
ام ظامن: تدللين بطن عيني ماسألتج اهلج موجودين
نغم: امي وابوي ماتو من اني صغيره وعندي ٣اخوان واخت وحده
اثنين مزوجين وعايشين بيت اهلي اخ واحد مسافر واخت مزوجه وعايشه بالخالص واني عشت وي اخوتي المزوجين لحد ما ازوجت
ام ظامن: اي امبينه متعوبه يخاله الله يسعدج ويعوضج
نغم: صفنت على كلامها يمكن قرت الكتاب من عنوانه بقت يمي اتسولف وتسال واني فرحت انو راح يصيرلي باب رزق راحت واني طايره من الفرحه طبخت جدريه تمن اصغيره على كدي اني وعلاء ومركه اتغديت لان علاء من اشتغل بجاي كام يتاخر
كاعده بالغرفه مالتي ساعه تقريبا ب2ونص واجاني صوت اغاني
اني بالعاده مااسمع اغاني لان لا راديو عندي ولا تلفزيون كمت اتبع الصوت منين ديجي لكيته من الغرفه مالتي حاطه برده على شباك البالكونه وشباك الثاني فتحت البرده لكيت عماره كبالنه وشقه بمستواه الشقه مالتنه يعني مقابيلي ضبط مفتوحه البالكونه وظهر ولد شاب عليه كاعد يلعب حديد ومشغل اغاني بصوت عالي لابس فانيله بيضه شايل حديده وبيها اثقال شعره بي طول اسود مكلوب ليوره ويي لمعه الشمس عاكسه على شعره اني هذا بس ظهره شفت وبقيت اسمع بالاغنيه جانت (لجورج وسوف كلام الناس اسمه) صار عندي فضول انتظره يندار بقيت اباوع بس هو مااندار ابد اخر شي مشه طفه الاغنيه وطلع من الغرفه لان جانت واضحه الغرفه كدامي انتبهت على روحي سديت البرده رجعت للمطبخ افتر ماعندي شي اسوي
اندكت الباب كلت منو؟؟؟