نغم في ظل الرجال

بارت العشرون20

2003بغـــــــداد💔
وذاك شارع بيه قطعه وذيج دار
بيا محطه تريدني انزل واني عايفني القطار
بين طلقه وبين سيف وبين صوت الانفجار
ليش عايفني وسط هاي الخيارات المميته
بعد ماعندك خيار لا تعاتب طير
غادر بيتهم بعيد طار الي يدوس النار
يدري مو ثلج جواها نار
احنى مثل الينتظر يمته يموت
وتدري صعبه الانتظار
يا هوا بغداد بالله انطيني شمه
ليش غيري يشمك واني اغار
ياهوا بغداد دفيلي ضلوعي
ادري بي شكثر حار
ياهوا بغداد يمته تصفه من الغبار
يمته يتكاسر نفس منك بريتي
ويكتل الغربه البنت في صدري دار
ليش غيري يشمك واني اغار

الكاتبه مريمانه🕊
////////////////
بليل وسمعنا صوت التفجير والتلفزيون بده يلعن عن القصف الامريكي وصوت الغارات الجويه  تعلن عن الحرب بيوم وليله انقلب حالنا لميت ذهبي وفلوسي واوراقنا ومستمسكات  وجنطة ملابس الي ولعباس
راح عباس جاب بيداء وسماح والحجيه وهو خطيه شايل همنا
رجل سماح معصوم رايح قبلنا بيداء تبجي على جهالها
بيداء: خالو جهالي اشلون
عباس: حبيبتي هسه تلكيهم بالنجف بيت ابو رباح لتخافين كل الكرايب اهناك يرحون يله خالي امشي ومعليج اذا مو اهناك اني اجيبهم الج
سماح:خبصتينا بولدج الناس كلها شردت النفس عزيزه وانتي حايره بزر الكوا....
رجيحه : اش سماح مو وكتج اذبين سم على الفرخه وهي روحها لايبه
نغم:اني اذني وياهم وبالي شارد شراح يصير
عباس:دواج نغم لا تنسي
نغم: يابعد عمري الدنيا مكلوبه وباله يم علاجي اخذته لتخاف
اباوع الشارع مالتنا العالم كلها طالعين يمشون عباس جاب عربانه للحجيه وهي حاطه بقجتها  بحضنها بالعربانه وطلعنا نتباجه على الوضع الدبابات اتفوت ومنظرهم مرعب
الشوارع كلها عالم خايفين وهاجين بروحهم العزيزه الي شايل جهاله ونسوان وكبار بالعمر شي مثل الكابوس المخيف
عباس راح نبقه نمشي ماكو سيارات
عباس: لا اكو بس مسافه شويه
نغم:حسيته خايف ومتوتر اتقربت يمه شبيك حبيبي
عباس: اندعي نطلع سلامات الجيش الامريكي
كاعد يكتلون بالعالم بدون رحمه اخاف اصعدكم بسياره ويضربوها
وميرفلهم جفن نسوان جهال ميهتمون
صوت تفجير قوي صار والناس كامو يتراكضون عباس يصيح امي
لحد يركض وفعلاً ماركضنا علمود الحجيه بس جنه نمشي سريع
لحضات خوف موطبيعيه تخريب قتل تفجير بوك وتسليب
اتعدينا من يم سوق معروف وجبير بعد مشي حوالي ساعه
والناس اتبوك مع الاسف انكلبت بغداد خرابه
ادموعنا نزلت بقينا نمشي لحد ما لكينا منشأت لونهن حمر كبار
ركبنا وعباس كللهم للنجف دفعنا افلوس لان جانت
فرصتهم يشتغلون بفلوس رغم الي كاعد يصير  والوضع بس بذاك الوكت الاستغلال والنهب والتسليب بده يمكن حتى فقدنا شي اسمه رحمه وارواح ناس
غاليه ركبنا وايدنا على كلبنا كعدت بس الحجيه واحنه واكفين
وعباس محاوطنه داير مدايره اني وبيداء وسماح
بقينا تقريبا 3ساعات ونص تمشي السياره والعالم خايفه
لا تفوت دبابه وتضربنا راح عباس وحجه وي السايق ورجع كال راح يذبنه
قريب على بيت ابو رباح ووصلنا بمكان عباره عن مزارع مو بالنجف تقريباً
على الطريق نزلنا ومشينا هم يندلون لان كرايبهم  كاع ما مبلطه تراب شي صاعد شي نازل والحجيه بدون عربانه نسيناها بالمنشئه عباس شاله على ظهره ومنظرهم جان كلش يقهر مشينا دقايق بس عباس يلهث خطيه
وهي اتكله نزلني يمه انكسر ظهرك هو يكله فدوه الج يمه ضاحو ذاك البيت
بيت جبير كلش بنص الزرع صاير اجوي شباب يتراكضون علينا وسلمو
على عباس والبنات وعليه هم بس منزلين راسهم وخجلانين اباوع
على بيداء فاصله وبالها يم جهالها صدوك الام اعز شي عدها اطفالها
اول ما طبينا كراج جبير كلش وحديقه متروسه زلم بحيث دنجنه
وفتنا كلهم وكفو سره يسلمون على عباس وعلى الحجيه رجيحه
بيداء ادور بالوجوه شافت طليقها
بيداء: جهالي اهنا هذا سرمد هياته
نغم:اي الحمدلله هسه انفوت وتلكيهم
رد الدم بوجها
عباس: يله فوتو جوه يم النسوان نغم خاف مانشاوف فدوه لعينج ديري بالج على امي ودواج لا تنسي
نغم:ليش وين راح اتروح
عباس: مااروح بس احتمال التهي وي الزلم ومايصير اطب للبيت وبي نسوان
نغم:طبينا باب جبير خشب نزعنا العفو الاحذيه وطبينا
بس ماااكدر اوصف او احسب العدد الموجود بالداخل شنو جهال
شنو نسوان وكبار كردوس يا محمدي شي فوك شي
بحيث بس كلنا السلام عليكم جمهور رد علينا السلام
مو خطار راحت الحجيه واحنه وارها سلمت على حجيه هم جبيره ام رباح
واحنه هم سلمنه عليها وكعدنا وبيداء راحت تفتر ادور على جهالها
مجنت اركز وي وحده او احاجيها لان هنه صايرات مجموعات
بس الي شاغلني عصام وجهاله واحمد وجهاله وينهم هسه
ظل بالي بشكل ويحجون عن الوضع بغداد وشكد راح يطول
رجيحه : اخ يا ام رباح دخل المحتل لعراقنا وراح يلوثون كاعنه
الطاهره الله يستر من امريكا الله يلعنهم ويلعن كل عدو
ام رباح : بعون الله ما يبقون ويطلعون كلهم
رجيحه : يا خيه ماشفتي الدبابات والرتل العسكري مالهم مجرمين
ذولي وبغداد صارت فرهود الهم خوفنه لا يصير الاكثر وناس تاكل
ناس هذوله طبو وشافو خيرات العراق مراح يطلعون بسهوله
نغم:جانت تحجي وهي دمعتها بعينه وام رباح اتهون واتكول الله ينصر المظلوم شويه واجتي بيداء فرحانه وبيدها جهالها
بيداء:هياتهم الحمدلله
نغم:بعد عمري حسونات كمت ابوس ييهم احسهم مثل صوصي
كلبي طاك عليه واتمنى اعرف اخبارهم كعدتهم بيداء صار المغرب بسرعه طار الوكت واحنه ميتين جوع سوده عليه عبيس هسه طكه الجوع
اكلج بيداء هذوله شوكت يسوون عشه وهم خطيه اشلون راح يوكلونه
تره البيت يغط وينبع
بيداء:باع هاي شتحجي خايبه هذوله من زناكيين النجف من قال وبله
انتي شتحجين يوكلونه ويوكلون العراق كله
نغم:الله يزيدهم بس مامبين تره بيتهم بسيط صح جبير بس عادي
بيداء:اي هم هيج ناس عايشين على البساطه رغم خيرهم وكرمهم لغيرهم
هم مو بخلاء
نغم:بس فهميني اشو ناس تعرف ناس شنو الوجبه
بيداء:اني افهمج هذوله ايصيرون بنت عمها لبيبي رجيحه هاي ام رباح
وابو رباح ابن عمها الثاني يعني كرايب وامي من اترملت اخذها ابن اخته لابو رباح ابو ممدوح وطليقي هم كرابتهم
نغم:لعد اشو رجل امج حاله على كده
بيداء: اذا يكعد يمهم يستعدل حاله بس هو عاف بنتهم وازوج امي
وهيج حاله بس هم ماعافو يجي عليهم وهاي شفتي يجيهم بكل مصيبه
ومايردون احد هم ناس خبره ومن اهل الله
نغم:اكلج هسه احنه فهميني راح ناكل تره خالج هسه حال الضيم حاله
بيداء:خايبه عيب لا يسمعون هسه النسوان جاي تطبخ بالمطبخ وابشرج
اكو فيلق بغد ماشفتي نص بالغرف ونص بالمطبخ
نغم:وين راح انام حبيبه
بيداء:بالتواليت
نغم:اجذبين
بيداء:باع الفطيره هههههههه شبيج تره اكو غرف جوه قيامه ماشفتيهن وهاي البيوت الداير مداير كله الهم يعني راح يوزعونه ببيوتهم
نغم: ها خوش الله يعينهم
بيداء:الله يعيني عليج
نغم:انجبي احسلج انطيني ولدج اريد احاجيهم
بس كليلي يا هو حسين يا هو حسن شو يشابهون حسبالك توأم
بيداء:لا مو توم بس هم يشابهون تعالو هذا حسن وهذا حسين
نغم:هاي ثاني مره اشوفهم لان ابوهم منع يجون لبيداء هي اتروح لبيت عمتهم
اتشوفهم وترجع انشلع كلبها وكعدت اسولف وياهم وصدوك وره نص ساعه
بدو يصبون الاكل ويابه المنظر بحياتي مااشوف مثله الكاع انترست بس اماعين واشكال الوان لا بعد ولا يحصى ما لذ وطاب
واني بالي يم عبوسي خاف مااكل بيداء صبو للزلم
بيداء:طبعاً هسه تلكيهم ديشربون جاي
نغم/خاف عباس استحى ياكل
بيداء: باع هاي شتحجي عباس يستحي ياكل خوما اكو شي تلكي هسه نسف
الاكو والماكو
نغم:ياساتر من عيونج كبر اسم الله عليه
بيداء: خليني ازقنب واسكتي
نغم:حايره بطنها وكلي الجهال
بيداء: تره عدهم ايدينات ويعرفون ياكلون وهياتهم دياكلون حيري بطنج
نغم:هم صوجي كملنا الاكل وليهسه عباس ماشفته مامتعوده هيج
شربنا جاي اني ما تقربت يم وحده بيهن وبيداء اضوج من البعض لان كرايب طليقها وهيج الحجيه نعست ورادت اتنام صاحت ام رباح على النسوان
حتى يودونا للغرفه ورحنا كلنا بغرفه اني والحجيه وبيداء وامها وجهالها
اخذتهم يمها واهلهم سكتو لان هوسه وميكدرون يحجون بيداء فرحانه بيهم
اجاني طفل اصغير —-وين نغم
ها اني نغم طب واجه يمي يشاورني عباس ايكول اخذي دواج ونامي اني راح انام يم الزلم بغير بيت كتله ماشي بس اخذله هاي الدشداشه وملابس داخليه وراح انقهرت مراح ينام يمي اليوم
بيداء:شبي شاورج
نغم:عباس اليوم ينام بغير بيت
بيداء:اي ما ينفرد وياج انسي
نغم:خطيه هسه يضوج بدوني
بيداء:يبو على روميو وجوليت نامي داده
نغم:اباوع الحجيه وسماح اشتغلو سنفونيه بس مال شخير
وبيداء نيمت جهالها ونامت واني الوب صدوك افتقده ومداكدر انام
.................
مرت اسابيع واحنه هذا حالنا الوضع ادهور بغداد
وسمعنا الامريكان مسوين قاعدات ومطوقين بغداد كلها
اني وعباس نلتقي بالبوكه بس يسالني شلونج شلون صحتج ويجي يشوف امه
ويروح يم الزلم طكت روحي عليه
بيداء:شبيج يمعوده
نغم:ادري هاي الزلم يمتى يشوفون نسوانهم
بيداء:هههههههه تره هم مو هلكثر عددهم بهاي البيوت بس غير ظرف
وهيج صارو بس اناي جنج طاك كلبي عليه
نغم:يعني صار اربع اسابيع مكاعدين ولا مسولفين وي عباس
بيداء:هسه بس يهدء الوضع ونرجع لتخافين اندعي الله
....................
وبعد مرور شهرين وشويه بدو العالم تخف بهذا البيت نص راحو ونص اجرو بالنجف بيوت بعد ميرجعون لبغداد
كمنا نكعد ناكل سوه  ومره كاعدين على الاكل كلنا بس لابسين ربطات ودشاديش طويله هيج هم عيب عدهم  بس مو على سفره وحده لا معزولين النسوان وحد والزلم وحد بس بنفس الصاله يعني  وجان عشه
والزلم اسولف وعباس ميدري بروحه نسه المكان
اندار عليه وبصوت عالي يابعد جبدي نغومه
اخذي دواج لا تنسي
وهذوله طكو ضحك
بيداء: عزه هذا الزلمه  شخط من وره علاجج
نغم:سوده عليه غير باله يمي ويخاف عليه
وكامو الشباب يداهرون عباس كل شويه ويصيحون علاجج
وهو يضحك وياهم  جانو ناس طيبين كلش  بس بعدها  طولنا
وعباس كال راح انأجر بس اني صفنت منيله افلوس وبالكوه بالف ياعلي يله وافق انطي مبلغ من العندي بمحاوله مني ومن بيداء وقنعناه واجرنه بيت غرفتين وصاله غرفه الي ولعباس وغرفه لسماح والحجيه وبيداء بصاله البيت فارغ فقط دواشك وميز وطباخ وهم جابو ثلاجه النه اسوكنه وكعدنا مؤقت لان اتبهذلنه وهم مخلونه نرجع لبغداد
جهال بيداء بقو عد ابوهم بيت ابو رباح وعباس نفسيته تعبت
لان بدون شغل شبيك عبوسي ليش بس صافن
عباس:مليت وبدون شغل واشلون راح اندبر الوضع تعبان والازمه جنها امطوله
نغم:حبيبي الله كريم بلكت يشوفولك شغل وصيهم
عباس:هم فكرت اكللهم واشوف
نغم:شنو الاوضاع بغداد
عباس:تعبان الوضع نغم
نغم:بنفسي اعرف اخبار اخوتي
عباس:نغومه انشاءلله مابيهم شي لتخافين موكتلج انتظريني
اني اجيبلج اخبارهم
نغم:عباس بعدها اشتغل بالمزرعه وي الشباب وجانو ينطو يوميه زينه
وبقينا ست اشهر بهذا البيت جان اصغير  وخنكه واحنه هوايه وفعلاً
معصوم رجل سماح ماينجرع وي بيداء يلج وياها بعد ما يطلع عباس للشغل
وهو سايق مخده وسماح متحججه بانو هم مو صلح وياه فميخلو يشتغل حتى من يحجي عباس وياه اجه عباس 
عباس:الوضع بغداد ماشي وهدء خلي نرجع
واني ارجع لشغلي اهنا تعبت والشغل قليل 
نغم:اي عباس واني ارجع اخيط وانعيش 
عباس: مااعرف خلي نرجع وانشوف الوضع
بيداء:واني هم اشتغل  ماراح ابقه كاعده
نغم:بعد حوارات وكل واحد ينطي رائي
ثاني يوم عباس بلغهم بخبر رجوعنه
سلمنا البيت واحنه مااشترينا اي غراض شغل عباس على كد الاكل والشرب
ايجار ميطلع وهم  ساعدونا بالايجار خطيه وعباس يأكل بروحه
عاد  مخلونه نرجع الا سوو عزيمه وبيداء كيفت لان جهالها رجع ابوهم ورجعو لبغداد وطلعنا ساعه خمسه الفجر وصلنا ب8ونص تقريبا
ماانسى منظر الشوارع والخراب  كل شويه يجي رتل امريكي
ودبابات  ونزلونا بالشارع وفتشونا واحنه نتراجف منهم
وجان مره رجال اي شي  يفحصون بالسره وعباس على اعصابه
من وصل يمنا اني وبيداء وامه وسماح وكام الامريكي يفحص بينا ويلزم حتى الصدر واني لزمت عباس  واباوعله بتوسل حتى يسكت وصعدونا يحجون وياهم مترجم عراقي وصعدنا ومشت السياره بالف ياعلي يله وصلنا المنطقه
مالتنا ونزلنا  راحو لبيتهم واحنه البيتنه اجه عباس يفتح بالباب وطلعو
جهال من بيتنا
عباس:هاي شنو انتو منو
انت منو عمو وليش فتحت الباب مالتنه
نغم:عزه هاي شنو هذوله شعدهم بيتنا
عباس:طبي شوفي خاف نسوان بالبيت صيحي احد
نغم:طبيت واني اكول منو اهنا طلعتلي مره اتفضلي عيني منو انتي
انتي منو وطابه لبيتي
هذا بيتنا واحنه اجرنا صارلنه اربع اشهر
نغم: اشلون اجرلكم وغراضنا وين لعد
عباس:شنو نغم 
نغم:عباس هذا ابو البيت مااجرلهم البيت
عباس:وين الغراض مالتنه وين هذا بيا حق هيجي يسوي
المره  خويه احنه اجرنا جان فارغ مابي غراض
عباس: اني اله بسيطه امشي نغم
نغم/طلعنا ورحنا لبيت اهله  ميتين قهر غراضنا وين
وصلنا وجان نلكه غراض مشموره كلها بطرمت بيت بيداء
عباس: هذا العار اني اله  اشلون هيج يسوي بالغراض
نغم:اباوع ملابسي وملابس عباس وغراضه  والغرفه والمطبخ كلها مطشره بالكاع
ركض عباس لبيت الرجال واني وبيداء وابو ممدوح وراه نركض
بيداء:خالي امانه انتظر لا تركض بس اكف خلي نفهم منه اول
نغم:عباس يركض وصلنا لبيت الرجال الي جان ماااجرلنه دك الباب
وطلع وهو بس طلع عباس كام يضرب بي
عباس:لك عار حيوان اشلون هيج اسوي واطشر غراضنا بشوارع
نغم:والرجال يجاوبه انتو  رحتو  صارلكم اشهر واني ردت اجر البيت
يعني شسوي محتاج  وصياح وعياط اخر شي اعتذر من عباس ويكله اني
اجرلكم عليه بس عباس  مقبل وكله مااسامحك على السويته واني غراضي جدد ومشمرهن كلهن وملابس الحرمه كلها صارت فرجه
رجعنا بيها اعصاب وتعبانين اتبهذلنه وبقينا بيت بيداء
وثاني يوم بده عباس يدور بيت والشغل جداً تعبان جان
واجره بيت  ايصير قريب على السوك يعني بينا وبين بيداء فرع جبير
جان غرفه وصاله حمام اصغير ومطبخ وبي حولي 
بس كلش تعبان عكس ذاك جان جديد ونظيف
غراضي فكدت هوايه  من ملابسي وشغلاتنا بس جنت
مااحجي لعباس حتى ماينقهر ورجع يشتغل حداد مكدرت ارجع ادرس
لان بلشت اخيط  وكدرنه انعيش بس مو مثل اول الحال اتغيير بسبب الاوضاع
رحت لبيت عصام والحمدلله جانو بالبيت محد بيهم طالع بس احمد رايحين للجنوب وراجعين وره شهر وحياة مشت بس بخوف وعدم الامان
الامريكان يفترون بشوارعنا وعلى غفله يجفتون للبيوت
تفتيش ومدري ايش  نسمع بالتلفزيون الاغتيال والقتل من قبل الامريكان
.........................
2004
اني اشتغل وبيداء تشتغل هم بمحل مال مواد غذائيه وتصرف على البيت رجل امها شغله قل مو مثل اول نتمنى انكمل دراسه بس منكدر
عباس تعب  من قهر الحروب والاوضاع اثرت على نفسيته زادها الشغل الي
جان يوم اكو ويوم ماكو   اخوتي جانو نفس شغلهم بس هم اعتمدو على المزرعه العدهم لان الشغل تعب  
واجت نهاية 2005
وبده الضيم والهضم والاغتيال والقتل ويوميه نسمع حاله شكل
وطب للعراق الصحن والستلايت واشترالنه عباس وجان هذا الاختراع
جديد علينا وكلشي يطلع وكل القنوات عالميه واخبار وصرنا نتفرج
وبعدها اجت التلفونات طبعاً احنه جان هذا الشي جديد علينا
اجتي بيداء وبيدها  فدشي
بيداء:لج  معجونه تعاي شوفي  شنو اشتريت
نغم: فدشي اسود شويه اكبر من الاصابع  بيدها
شنو هذا ولج وبي دكم بيها احرف وارقام
بيداء:هههههههه هذا موبايل
نغم:ينأكل ينشرب شنو يعني
بيداء/يولي هذا يسمو موبايل تكدرين اتخابرين بي
بس اتعبين كارت وهذا تشترين سيم كارت وتفعلي
وتخابرين احسن من الارضي وين متريدين اتخابرين
شوفي بي حتى رسائل ادزين هم
نغم:الله يعني  مدى العمر اخابر بالكارت
بيداء:لا ولج يخلص حسب الاستخدام بس اي شخص عنده موبايل اتخابرينه
هسه الناس كلها مشتريه منه ويخابرون بي احسن من التلفونات الارضيه الفضيحه
نغم:جنت اباوع للتلفون وهو عبالك كوكب ثاني
بيداء:اشترو انتي وعباس حتى تخابرينه من يروح للشغل
نغم:اي وج عيني يظل بالي عليه هسه اكله وياخذلي واحد
بيداء:شوفي هذا الثاني
نغم:علج المخبل ترس حلكه شبيج حاطتلج منه اثنين ادري شنو فلمج
بيداء:يا وكبر شمالج هذا يدرون بي وهذا لا اخابر بي حبيبي
نغم:انزول عليج يمتى لحكتي تتعلميله هسه اذا اجيبيلي واحد يرادلي  شهر تلعميني حتى استوعب اني وعبوسي
بيداء:ههههههه اشترو ومعليج باعي هذا موديل وهذا موديل ثاني
نغم:اي داده عمليني وكعدت بيداء اتعلمني واجه عباس
وكتله كال  بس يصير عندي اشتري جان غالي بذاك الوكت
وصدوك وراها جابلي واتعلمتله ورحت لكيت عصام عنده اخذت رقمه
وبيداء الوضع كلش عاجبها اتخابر  اربع وعشرين ساعه
وتحجي وتعبي ارصده ومتلحك —اكلج ست بيداء هذا رصيدج ميخلص لخاطر الله اشو اني وعباس نحجي كلمتين ونسده انخاف لا يخلص
بيداء/ اني مااهتم لان يدزولي
نغم:دعلميني اشلون يدزولج ومنو
بيداء: ولد شعلمج اتخونين خالي
نغم:ياااااا امداج حسبالي الشركه بدزولج انتي صدوك طلعت عينج
اسوفلتي حيل
بيداء:هههههههه مايخصج هذوله  اصدقائي اكلج صدوك تعاي احجيلج على هذا الامريكي الحكني يبو خيه مو جمال عيون خضر مدري زرك مدري رصاصي ميت لون تخبط ويكلي اي لاف يووو وايشرلي بيده
نغم:هههههههه عزه بعينج بيداء انوبه هذوله المحتلين النكسين
بيداء:لج لا ايع بس اني شنو اريد اشلع كلبه  والعب عليه اخذ منه معلومات وانطيها للجيش العراقي  الباسل
نغم:خاف مصدكه روحج انتي وعايشه اللحضه ايكتلج وينطيج  طعم للجلاب العدهم حسبالها رافت الهجان وتلعب عليهم كبر ولحد  اي ولله
بيداء: اهوووو انتي مو صوجج صوج اليسولفلج ظلي بعالم الخياطه والبكر والابر ودوه الضغط لا يعلك عندج واصيرين مثل جده رجيحه نص استاو 
يمتى ما تكعد  اصلي 
نغم:  على طاري جده رجيحه  يزركه من صجيجه بماي بارد

اجه عباس وضايج ومخنوك مااعرف شبي
نغم:الله يساعدك عمري
عباس:ويساعدك حبيبه
نغم:شبيك عباس اكو شي
عباس:لا عمري لا يظل بالج عليه  بس شويه تعبان من الشغل
نغم:ارتاح وراح احضرلك الاكل
ركصت حميت الاكل وهاي اول مره اشوفه هيج
وبقى حال عباس ايام وهو بس يصفن ويذبل
وفديوم جنت بالبيت كاعده واندكت الباب كمت ولكيت بيداء

نغم وين عباس
طالع شكووو
بيداء: بيبيتي اتخربطت لا ايد ولا رجل
نغم: ركضت بيداء واني هم وراها وندك على عباس مايجاوب جان ظهر
اخر شي رد علينا الحك امك اتخربطت وهو سده وكال جاي
اجه بسرعه واخذناها مستشفى وجانت فاقده
بقينا ننتظر  لحد ما طلع الدكتور وكال
البقيه بحياتكم ...

للحكايه بقيه ........