نغم في ظل الرجال

البارت التاسع عشر19

ما أروع الرجولة
عندما تحن عليها بحنان أبيها ، عندما تحفظ سرّها كأمِها عندما تخاف على عرضها ك اخيها تحيه لكل رجل  يحترم زوجته ويرعاها ويحافظ عليها 🥀❤️

✍️الكاتبه مريمانه

نـــغم : حبيبي عبوسي
عباس: جبده لعبوسي 
نغم:اريد ادخل مدرسه وادرس
عباس: عباس انتي  امخلصه متوسطه مو
نغم: لا وين اني ابتدائيه ممخلصه
عباس: يعني ماعندج شهادة سادس ابتدائي
نغم:لا
عباس: وين جنتي بيا مدرسه
نغم:  اسمها  الف .......
عباس:ماشي عوفيها عليه
بس كليلي بيا منطقه
نغم:  المنطقه الفلانيه
عباس:بعيني بس اول شي اني مراح اخليج ادرسين ابتدائيه
لا اجيبلج شهادة سادس وادخلج مسائي
نغم:ايصير هيج
عباس:كلشي يصير عمري لا يهمج الج الصافي
بس ادرسي واخذي شهاده وسوي الي يريحج
نغم: فدوه اروحلج عبوسي الا اسويلك اطيب جاي مهيل ابو الريحه
عباس: هههههههه اي ولله  وكتها ماانحرم من هاي الفرحه بوجهج
نغم: من دخلت حياتي واني الفرحه دخلت حياتي وياك
رحت اسويله جاي  ممصدكه كلشي اطلب منه ميرفضلي طلب
وهاي اليوم الي سبع اشهر بس مصار عندي حمل مااعرف ليش
وعباس هم ما يركز على هيج امور بس اني اريد اروح دكتور
بس اول خلي اشوف سالفة المدرسه بلكت اصير  مرتاحه
كلش  صرت اخيط  واجمع وعباس ابد مياخذ مني فلس
بلعكس ينطيني ويصرف على البيت ايجار ومصرف بس اني
هم من اطلع سوك ويا بيداء اسوك  واشتري الي يعجبني
عباس اخذني مره واشترالي اسوارات واني من فلوسي اخذت
كلاده عين وهو خطيه ايكلي اريد اترسج ذهب
مامقصر ابد وياي الله دزه الي رحمه
جنت اسوي جاي واندكت الباب اكيد بيداء
عباس كام فتح الباب واني اجيت اشوفه
بيداء: بويه راح انجلط اني من وره امك واختك
عباس:شبيهن خير
نغم: يمه شبيج طابه جنج عاصفه علينا
بيداء: اي مو انتو خلصانين واني الواكعه بينهن
عباس: ولج بيده احجي شصاير
بيداء: رجيوه كل ما تنام وتكعد اصلي ماتعرف الوكت والساعه
امي كالتله هاي الصلاه ماليش اشو انتي كل نص ساعه اصلين
وردت رجيوه ولج شنو قصدج انه كبرت واخرفيت وهاي امي اتكله
سوايتج مال. وحده صدوك كبرت ورجيوه كامت تنعه وكلبتها مناحه
وتهدد بينه البس عباتي وانهزم وامشي على طلوع النجم تنعه وتبجي
واني كاضيتها كافي واتهدو ولنوب رجعو اثنينهم عليه هاي اتكلي انتي السبب
اتخلين امج تحجي عليه ما تفهميني الوكت والصلاه من اشوفيني اصلي
وهاي اتكلي انتي من وراج امي تحجي عليه جا اني هسه شسوي اكتل روحي
عباس: صلي على محمد كلشي ما فهمت منج موش السان رشاش
اكعدي بويه جيبيله مي نغم فدوه
نغم: اي صار رايحه رحت جبتله ماي وهي بس تنافخ وعصاب
بيداء: باع عبيس اني اليوم لا اروح ولا اوصل لهناك ابات اهنا
عباس:على راسي كل الهله بنيتي جا اني مو كتلج الف مره تعاي اهنا عيفيهم
بيداء:غير كلبي مينطيني اكول رجيوه مااكدر بدونها وهي تدري بيه متعلقه بيها اشد وياي من اشد امي وياها
نغم:دهاج مي يبس ريكج
بيداء:انطيني سم اموت  روحي بي واخلص
عباس:استغفري ربج شلج بهلحجي بويه
نغم: اي ولله حرام عليج تحجين هيج
بيداء:جا لعد الديصير بيه مو حرام اشو منين مااندار كفخه ماشفت يوم راحه
نغم :انقهرت عليها كعدت بصفها يمعوده بيدو تره ميلوكلج القهر مامتعوده اشوفج هيج  اضحكي بشرفج انمرد كلبي خطيه دمعتها نزلت على خده
عباس:بعد عمري بيده لا تبجين هسه لابس ورايح الهم العب بيهم لعب وداعتج
بيداء: لا خالو مااريد اصير مشاكل بسببي عوفهم
عباس:شتدرين بيه احب المشاكل اني اروح احاجيهم واشوف شبيهن هم
نغومه جيبيلي دشداشتي عمري
نغم:اي بعيني رحت جبتها اله جنت كاويتها ومعلكتها طبعاً عباس جان مهمل بس اني صرت كلش اهتم بي وهو اتعود هم وما يهمل مثل اول حتى ملابس الشغل ذب القديمات وكام يلبس احسن منهن ومن يجي اغسلهن اله  وميلبس الشي الا مغسول ونظيف  جبتها ولبسها وطلع جانت دنيا مغرب
بيداء: بسلا يتعارك وي الشفيه
نغم:قصدج رجل امج
بيداء: لعد اكو غيره
نغم:وليش يتعارك وياه قابل شعليه
بيداء:هو راس البله كله
نغم:مفهمت  شنو تقصد بس هي سكتت دائماً من تذكر رجل امها احس وراه شي وهي متحجي  ابد
بيداء/ شمالج صافنه بوجهي
نغم:مابيه شي اكوم اسوي عشه
بيداء: اكفي اكوم وياج
نغم:اكعدي مااحتاج عندي ايد ورجل
بيداء: روحي طبج طوب عود ردت اساعدج مو وجه نعمه
نغم:شبيج اليوم كابه علينه عمي كولي يالله
بيداء: هم راح يخبلوني
نغم:هسه يجي عبوس ونكعد ناكل ونتعلل همزين جيتي جنت ضايجه
بيداء: اي هم كالوها مصائب قوماً عند قوم فوائد
نغم:يبو منج اكلج ليش ما ترجعين مدرسه وياي
بيداء:شنو يمه مدرسه انوبه عاد اشلون اني ماكو هيج نار بالدراسه
خايبه ما اسكتين
نغم:كومي تعاي اكعدي يمي ونتفاهم
بيداء:اجيت
نغم: اجت كعدت على الكرسي يمي
اكلج انتي بيا صف وبطلتي
بيداء:اول متوسط
نغم: احسن مني ولج انه ابتدائيه ما مخلصه
عباس كال اجيبلج شهادة سادس وبعدها
ادخل مسائي تعاي على الواهس وياي ندرس وناخذ شهاده
بيداء: ومنو يخليني الشفيه لو اعوف رجيوه وامي بدون طبخ وتنظيف
نغم:اكلج قابل انتي العمر كله تبقين يمهم مو جنتي مزوجه
بيداء: اي بس هسه اني ما مزوجه تختلف
نغم:معليج انتي عبوسي يدبر الامور انتظري هسه يجي
بيداء:مو جنه اتاخر
نغم:لا مصارله هواي من طلع ايجوز كاعد يسولف وياهم
بيداء:اخاف اصير مشكله بسببي
نغم: لا اطمئني هسه يجي بين ما يكمل العشه
صدوك كملت عشه وهو طب ها حبيبي الله يساعدك
عباس: هله يروحي ويساعدج
بيداء:شسويت خوما اتعاركتو
عباس:لا يابه شكو واتعارك بس حجيت وياهم واخذتلج حقج منهم
امي ماترضه تنام اتكول دزها بس اني كتلهم  خلوها يمي الليله
نغم:اي زين اسوي
بيداء: تره مو بصالح ابات اهنا
عباس:ليش عود
بيداء: راح انيمك بصاله وانام يم مرتك
عباس: هههههههه كومي روحي لامي لعد خطيه الحجيه اتريدج
بيداء: اي  هاي الدنيا تمشي بالعكس شفت اشلون غيرت حجيك بس عرفت
عباس: لا حبيبتي ابقي العمر كله يمي بس مو يم مرتي اتنامين واطرديني بصاله
نغم:هههههه 
بيداء: مو هو كل اثنين ثالثهم الشيطان واني  اليوم بيناتكم
عباس: يا زهره احضرينا صار بيها شيطان انوبه اخاف  جايبه وياج ياجوج ومااجوج
نغم:تره اني اخاف اسم الله شبيكم
بيداء: نغم لا تباوعين بالكاع  بين رجلج  كاعدين شوف عبيس شسويت ذكرتهم وطلعولنا
نغم:طفرت من مكاني واباوع بالكاع  ماكو شي انزرل عليج حيوانه
عباس:هههههههههه ولج غضب لا تخبليلي المره انوبه
بيداء: هههههههه مرتك فطيره شعليه اني
نغم:اكوم اصب عشه انتو ناصبين عليه
صبيت عشه تعشينا وبعدها كعدنا نتعلل
صدوك عبوسي نسيت اكلك خلي بيداء ترجع للمدرسه وياي
عباس: اي خوش فكره حتى تروحون سوه وترجعون
بيداء: زين والبيت والشغل
عباس:حبيبتي هذا دوام مسائي يعني اتلحكين اتخلصين وترحين
بيداء: ومعصوم افندي اشلون اذا مقبل
عباس:ابو ممدوح عوفي عليه  معليج انتي
هليومين امشي بالسالفه والله كريم
نغم: بقينا نتعلل وانسولف وسهرنا وبعدها نمنا
ثاني يوم الصبح طلع عباس للشغل وكعدت بيداء
بيداء:صباح الخير
نغم:صباح النور حبيبتي
بيداء:طلع عبوسي
نغم :اي راح للشغل شبيج
بيداء:كلشي مابيه وجهي مجعوص من النوم حسبالج بيه شي
نغم:ههههه دكومي غسلي خلي انسوي ريوك حتى اساعديني
بالخياطه شويه اعلمج هم
بيداء: شساعدج مثلا اشو هي مكينه وحده
نغم:معليج انتي مثلا اخليج اتكصين جوه ايدي
بيداء:اي مو عندج معمل واشتغل جوه ايدج مو جنج عايشه الدور ست نغم
نغم:يبو من لسانج عوذه
بيداء:خلي اتريك واولي للبيت اشوف رجيوه
نغم:ظلي اليوم انروح للسوك
بيداء:مالي خلك اخذي ام ظامن وروحي
نغم:اي من كبر اتغارين من ام ظامن تباوعلي صفح
بيداء: اشو تاخذج وتروح للسوك وعزايم وغديات
نغم:تره هي المره  مرتين اجتي حسبتيهن عزايم وغديات
عباس ميغار بكدج
بيداء: اي مو الشحروره ويغار عليج 
نغم: ها هيجي هسه اني بشعه مو حلوه
بيداء:لا منيلج خو شعرج حسبالك صوف مال طلي  ملفلف
نغم:بيداء يزركه صجيجه كولت رجيوه
بيداء: ها علمتج رجوه واخذتي حجيها
نغم: هههههه اي طبعاً من عاشر القوم اربعين يوما صار منهم
بيداء: ديله روحيلها واكعدن سون حزب على بيداء الزركه
نغم:صايره نفسيه والله مايجرعج باعي اليوم تجين وياي وانتي ساكته
بيداء: اكلج باعي هذا عبيس طلع عينج كمتي تتامربن عليه
تره انه بيداء احشج حش انتي وهاي دشداشتج الخضره امتددي باكاع على ظهرج اصيرين ثيل
نغم:شبيج وياي اليوم ابويه ميكدر بس على امي روحي طلعي حركتج بيهم جايه عليه عبن فقيره ومااحجي
بيداء: اي بعد ابجي  وكمزيلج كمزتين مثل حسوني من يطنكر
نغم:فدوه لعينهم اشوكت اجيبهم
بيداء: انعل ابوهم لابو شكد احبهم ومشتاقتلهم الجلاب
نغم :هاي شنو حب لو مسبه
بيداء:افروخي واني حره بيهم  اسبهم احبهم بكيفي
نغم:  الله يشافيج خلي اتريك واخذ علاجي لا يصعد ضغطي  من سوالفج
كمت وسوينه ويوك وهاي انوب من اضوج اصير اخبالات اكثر
بيداء: يله اروح اني
نغم: لا متروحين بعد
بيداء: خايبه سجن ابو غريب  هو
نغم:اي شبيج بعد وكت
بيداء: مبيت وبتت ريوك واتريكت شمالج وياي بعد خليني اروح اشوف ضيم الله 
نغم:انتظرج الظهر مو متجين
بيداء: امري لله وعبيس كتيله
نغم:طبعاً لعد اروح بدون علمه
بيداء:يله  باي
نغم:الله وياج .. رجعت اخيط  وافكر بيداء خطيه متعذبه
بحياتها ورجل امها مبين مدمرها صح هي ليهسه ماتحجي واني
هم مااحرجها بس هذا الي مبين  وواضح  كملت شغلي
واجتي ورحنا للسوك طبعاً اني الله زادني جمال
من ازوجت عباس والراحه النفسيه الها تاثير
بيت عصام  اروح بس مو دائماً وصوصي واسيا
هذوله معلكين بروحي وكل مااروح متلهفه عليهم
صادق ماينساني لحضه واحس تعبي مغزر بي
وكل مااروح خطيه ينشلع كلبه ويتالم من اعوفه كمت اقلل روحاتي حتى مااذي الجاهل من يتعلق بشخص يعاني واني مااريده يعاني عصام كال من تجين وتروحين يكوم يبجي ويتمرض مره متخربط ايزوع من البجي
ومره مصخن اما شيلان فمن اروح اتخليني انظف لان عباس يعوفني على راحتي ويروح ويحيني بالليل  هيج خلتني انظف وانكسر ظهري 
واني مو مثل اول اتاذه من الشغل الزايد المرض اله دور
الله يبعدكم انشاءلله بس  من يصير جهد اتاذه 
نتمشه اني وبيداء بسوك واني دايخه بموضوع الحمل
اكول بيداء اريد اروح دكتوره نسائيه
بيداء:هااا ليش شبيج
نغم:مابيه شي بس اريد اشوف ليش مصار ليهسه حمل
بيداء:يمعوده توج اربع اشهر شعندج مستعجله
نغم:اريد طفل  عباس مشلوع كلبه على ابنه
بيداء:يمعوده اتعود بدونه وبعدين هي اجيبه كل فتره احسن من حالي
شالعين باب كلبي اهلهم الجلاب وابوهم
نغم:الله يعينج بس اني اليوم احاجي عباس وانتي اسأليلي على طبيبه زينه
بيداء: ليش اسألج احنه كلنه انروح على هاي الدكتوره اكو وره السوك اخذج عليها
نغم:ها خوش لعد اليوم ابلغ عباس  كملت مشترياتي ورجعنا
واجه عباس بليل
الله يساعدك
عباس:يساعدج الله حبيبتي
نغم: هاي شنو الاوراق
عباس: اوراقج مال مدرسه بس بعدهي مو كامله باجر انروح اطكين صور
للمعامله وهاي اني دامشي بيها ليظل بالج
نغم:غير اتفهمني شسويت
عباس:ياكلبي شلج علاقه الج الصافي اجي واكلج اتحضري للدوام
نغم:الله يخليك الي اكعد خلي اصبلك اكل وبعدين اسبح
عباس:لا اطب اسبح واكل احسن
نغم:طب واني انتظره حتى اكله اروح طبيبه
بين ما حضرت اكل هو اجه جبت الصينيه وكعدنا
يسولفلي عن الشغل ويومه بالشغل كالعاده
عباس: شبيج جبيبتي
نغم:مابيه بس ردت اكلك اريد اراجع طبيبه نسائيه  ذب الخاشوكه من ايده ولزم ايدي
عباس:  نغم كاعد تتحربطين من اطلع تنسين دواج مو اني كلبي حاس بيه ويظل بالي خرب شلون ابطل واكعد
نغم:هههههه بس على كيفك عبوسي شبيك تره كلت دكتوره نسائيه مالها علاقه بالضغط واني مااشكي من ضغطي ابد مايصعد لا ملح ولا تاركه حبوبي
عباس:وكعتي كلبي حسبالي ضغطج يصعد
نغم:ادري اشلون يصعد واني ملتزمه وانت  كل شويه اذكرني بدوايه ماالحك انسى
عباس: كليلي شسوين بالطبيبه وليش اتراجعينها
نغم:علمود الحباله اشو كلشي ماكو
عباس:نغم اني مااريد طفل
نغم:انقهرت ليش عباس متريد مني طفل
عباس:لا مااريد
نغم: كمت ارجف ليش حبيبي
عباس: نغومه اكعدي  خلي احاجيج
باعي حبيبه اني تدرين بيه انتي اعز من روحي واني مارايد طفل
اهم شي عندي  صحتج وعافيتج  تسوه ابو الطفل
نغم:ها فهمت يعني انت متريد لان عندي ضغط واتخاف لا يصعد واموت
مو
عباس:لا اسم الله بس  اخاف ليش اجذب واكلج مااخايف مامستعد اخسرج علمود طفل ابد لا اخسر عشر جهال ولا اخسرج  نغم انه ليل ونهار ادعي الله
من يريد يفرقنا ياخذني قبلها وحتى بالموت اني قبلج
نغم:اسم الله عليك الله يخليك الي يا نور عيوني انت
عباس: فالخاطري لا ترحين ولا توصلين نغم يريد يصير خلي يصير
واذا ماانسوي تريحيني وصدكي وامني ابقى العمر كله مااكولج على طفل
ولا افكر بي ابد كملي دراستج واقري وخيطي واي شي يعجبج اسوينه
اني وياج وتلكيني سند الج وبظهرج العمر كله
نغم: اني اسعد مره بالكون كله خليتني صدوك ملكه
عباس:هو انتي ملكه واميره  وسلطانه  بيتي وحياتي 
نغم:كلماته وصفاته ورجولته صارلي اب واخ وام وصديق ودنيا بحاله
عباس كلشي  جنت افتقده لكيته بي عوضني عن كل الالم الي عشته
..............
بعد اسبوع ///::
عباس:: نغومه اكلاص جاي  حتى  ابلغج بخبر تنتظري
نغم ::شنوه حبيبي
عباس:مراح اسويلي اكلاص جاي مهيل
نغم:طلقه واجيك ركضت وسويت جاي واجيته
هاك حبيبي الف عافيه بس احجيلي شنو الخبر
عباس:هاي شهادتج مال السادس
واول ما يبلش الدوام بعد شهر راح اداومين مدرسه
نغم:صرت اكمز مثل الجهال واركص طايره فرح وابوس بي
الله يخليك الي يا عمري ابو بسومي
عباس: هاي اول مره اتكولين ابو بسومي
نغم:لا عبالك اصوج منه هذا ابنك يعني فطعه منك احطه على راسي لو امه
تقبل واجيبه يمي ولله اداري واصيرله ام
عباس:واثق من هذا الشي واتمنى بس  هاي بعد
نغم:يعني حبيبي راح اداوم وبيداء
عباس:بيداء سهله بس اروح للتربيه وانقله للمسائي بس انتي شغلتج جانت صعبه بس بالفلوس كلشي يصير
نغم:لعد جان كلتلي انطيك يعني عباس ليش اتخلي بيني وبينك حتجز بالفلوس
عباس:نغم حبيبتي افرحي ومعليج بهاي الامور عندج رجال  حطي حملج عليه
ونامي رغد
نغم:ونعم منك حبيبي مقصرت وياي الله يوفقك ويرزقك من واسع ابوابه
حبيبي حجيت ويا ابو ممدوح علمود بيداء خطيه
عباس:شداحجي صارلي ساعه ياعيني مو كلت  عوفوها عليه
وعتبريها اداوم وياج  هاي السنه وانتهى
نغم:فرحانه واحس روحي طايره  نسيت شي اسمه قهر هموم الم
خدامه تعب مرتاحه وفوق الراحه راسي بارد وانام ليلي نسيت شي اسمه حمزه مناظل علاء هذوله اصلاً مو زلم ولا جانو بحياتي
كمت احس روحي مجنت عايشه وي رجال غير عباس
جنت اعزل بغراضي واهدومي واصفط وطلعتلي كلادة حمزه
لزمته واول مره احس نفسي ضايجه منها ولعبانه روحي
شلتها بشمئزاز وشمرتها بالزباله تكرمون ورجعت اكمل شغلي
اندكت الباب جنت لابسه سيت نوم نزعته ولبست دشداشه  بين ما بدلت والباب انهجم رحت فتحت الباب 
بيداء: ساعه ادك  عبالي ميته
نغم:الله يلعن ابليسج متكليلي شبيج الواحد يدك مره اثنين ينتظر
بيداء: شنو وين جنتي وانتظر هلكد
نغم:يعني شمعرفني حضرت جنابج جان مبدلت جنت لابسه دشداشة نوم
بيداء: ها عروس  ارجو السموحه  مره ثانيه من اجي ادك واكف ساعه انتظرج تنزعين البدله  ست الحسن
نغم:لو اعرف بس ليش تناكرين وتتعاركين وي ذبان وجهج ارتاح
بيداء: الله هيجي خالقني  عندج اعتراض
نغم: لا هذا امر الله ومنه الصبر
بيداء: اكوم اروح ست نغم خاف موطايقتني
نغم:اهفج بالمكتاله هسه  اجتي بس تتعارك كولي اشلونج اخبارج
بيداء: مو على اساس عايفتج صارلي شهر اشو يوميه سوه
وكلساع شايفتج شكو بعد لو هي بس لكلكه  كل شويه شلونج شخبارج
نغم: امداج شكد عديمه احساس عود اني اريد اكلج مابقى شي وراح اندارم
بيداء:كولي ولله يعني عباس حجه ويه الشفيه
نغم:اي كال معليكم وانتو الكم الصافي واني هسه راح اداوم وكملت اوراقي بس يبلش دوام وانتي هم وياي
بيداء:عندج هيج خبر وضامته عليه ومتحجين
نغم:يا باعو فوكاها هي تحجي ولج انتي انطيتيني مجال احجي انطيتني نفسج فرصه تسكتين تسمعين اسو لبك لبك اخذتيني حاصل فاصل
بيداء: هسه مكتيلي يمتى الدوام
نغم:بعد شهر
بيداء: دخيل الله مامصدكه راح اصير شغله براسه حظ بحياتي
نغم: ههههههه اني الحمدلله عباس وهسه راح اداوم مدرسه يعني شغلتين
بيداء: عبوسي كل الخير اوف لو كل الدنيا مثله جان احنه بخير
نغم:اي ولله تدرين اول ما شفته محبيته وجنت اكول هذا اشلون راح اعيش وياه بس هسه الف الحمدلله من صار بحياتي
بيداء:من هاي جان وجهج وجه الجينكو كاشه اتكول حسبالك عجوز
وواكعه ضروسها
نغم:عاد اني كل مااذكر يوم الخطوبه اتعيديلي نفس الموضوع فتهمت وجنت
وجه الموته والعب النفس
بيداء: همزين تعرفين نفسج
نغم: اووف تدرين اخوي عصام كلي خوش رجال وطيب
اول مره ايسويلي شغله براسها حظ
بيداء: يبولا اذكريني بعصام اخوج
نغم:ليش عود
بيداء:فلك صابه مو جمال طركاعه طول وضخامه اوووف يموت
نغم:يااااا لو اسمعج شيلان الا تنكلب مصاص دماء عليج واشوفج انجوم الظهر
بيداء: ايباه. افه اني بيداء اكو وحده اقوه مني وداعتج اسحلها روحه رجعه
امسح بيها بغداد كلها وكل ضواحيها اسو بيها مثل هاي الكوله بالاعراس يكولوها
(كمش مكناسته الغيره ،،وغبش بيها وحالف عالزباله اليوم يكضيها
وكنس بغداد كلها وكل ضواحيها )
هيج اكنس بشيلان كنس
نغم: اني فانحه حلكي عليها وهي تهز وتركص واصفك
عجيب هاي حولي مو بنيه
بيداء: اكوم اروح الكعده وياج ما تنراد
نغم: ويايه متنراد دشوفي عبوسي خطيه يتمنى بالنهار يكعد وياي بس الشغل
بيداء ::: خايبه استوب ،، ماعندج ابريك اشو جايبتني على عبوسج
هذا رجلج وعنده شغيلات وياج وكعدات وتتسامرون وحضن وبوس
نغم: هههههههه اي ولله. صدوك
..............
وبعد شهر داومنه اني وبيداء ولا انسى اول يوم الي بالمدرسه
جان احله يوم بعمري من لبست صدريه وقميص ابيض
وشلت جنطه بيها دفاتري واقلامي وفرحانه وعباس اجه ويانه
طبينا للاداره واخذو الفايلات مالاتنا وودونا للشعبه جانت باء
المدرسه جبيره وكلها صفوف وطلبات اكبار وصغار وحتى
واني وبيداء بس انباوع ومرسومه الضحكه بوجهنا
جانو مداومين صارلهم ثلاث ايام طبينا للصف وجانت مدرسه جبيره سمينه
لابسه مناظر وكاعده على الرحله طبينا بعد ما راح عباس لشغله
سلمنا وهي كعدتنا اني وبيداء برحله اصير بالوسط وبصفنه ابنيه
وجانو يتعارفون المدرسه والطالبات واتعرفت عليها اسمها انعام
وطلبات من عدنا نلتزم بالدوام بدون غياب ومنحط مكياج ولا نخالف بالملابس
هاي مسائي اكو بيها هواي مشاكل وخلص الدرس مثل الشاغر
بيداء: اكول نغم انتي راح ادبريها
نغم:انشاءلله ليش لعد
بيداء: مو انتي ما دارسه ابتدائيه بله اني دارسه وحتى اول متوسط جنت
هم دارسته يعني عندي اولويات
نغم:درسيني
بيداء: بطرانه اكلج مار عليه بس مو ضابطه الدراسه يعني احتمال افتهم
نغم:بعدنا ما بلشنه تره صبرج عليه
بيداء: ماشي ست معجونه
نغم: معجونه شنو انوبه
بيداء: مال جدر
نغم:. مااعكر مزاجي وياج اريد استمتع
بيداء: اي مو طابين للمصيف تره صف ودراسه اي استمتاع ماكو ولا استجمام
نغم:الحجي وياج ضايع كومي خلي نفتر بالمدرسه
بيداء:امشينا
نغم:كمنا واباوع على البنات مجموعات صارو بس اني وبيداء وحدنا
بيهن المحجبات والمفرعات والي ما ملتزمات بالبس والعلج والمكياج
نزلنا وصرت اباوع على كل شي صفوف ثلاث طوابق وباول طابق حديقه وبيها حانوت وهي كلها عباره عن صفوف جنت امشي وابتسم واحس روحي
صار بحياتي انجاز رغم انو اني بعدني لا قاريه ولا دارسه ولا مسويه انجاز
بس متفائله بقينا نمشي وبيداء تحجي
بيداء:لج باعي هذني شلابسات خرب حظي واني معصوم افندي
كاتم على انفاسي
نغم:مالنا علاقه بلبسهن ومكياجهن احنه اهنا حتى ننجح وناخذ شهاده اني اللبس والمكياج بغرفة نومي ويم رجلي لس اهنا اقره وادرس واريد الزم شهاده
بيداء: الله عليج يا سيبويه  الله يا نازك الملائكه
نغم: منو هذوله
بيداء:ههههههههه لا ربحنا راح تاخذين شهاده
سيبويه عالم من العلماء ونازك الملائكه شاعره عراقيه
نغم:شجابني عليهم خلي اخذ شهاده اول هسه
بيداء: اي مو داكلج
نغم:نمشي اني وبيداء وصارت عركه
بيداء:هاي شكو امشي انشوف شصاير
نغم:ركضنا بره والبنات هم وجان انشوف رجال ساحل ابنيه من شعرها
وتبحي واصيح بابا الله يخليك
بيداء:عزه هاي شبيها
نغم: البنات كلهن وحده تسال الخ هاي شكو هاي شبيها
طلعو المدرسات من الصف وسحبو البنيه للاداره واحنه ننتظر
بيداء: هاي رجلينا سكد خضره اول يوم عركه
نغم:اش خلي نفتهم شكو طلعو المدرسات وطردونا من يم الاداره
واحنه كاتلنه الفضول انريد نعرف شكو معرفنا بيومها ورجعت للبيت
وجان ماكو دراسه بس وزعو كتب وقرطاسيه واني عندي عباس جابلي
مقصر خطيه. واجه عباس وسولفتله كلشي صار وطبعاً هو يوصيني
عباس:حبيبتي بنات المسائي مو راحه بيهن انتي وبيداء خليكم منعزلات منهن
راح اشوفين اشكال انواع ابتعدي عنهن وصيري حريصه على دروسج
واني مستعد اخليلج مدرسين المهم تنجحين وتحققين حلمج
.................
بده الدوام واني بين المدرسه والبيت وعباس مساعدني هوايه
واكف بظهري بكلشي بعدها عرفنا سالفة هاي البنيه مجذبه على اهلها
على اساس الدوام بادي صارله شهرين وهي تطلع وي واحد ومكتشف وجاي عليها للمدرسه يحقق وي المدرسات وكتلها كدامنا فعلاً صعبت عليه المواد لان مادارسه ابتدائيه بيداء شويه احسن مني وبديت ادرس وعباس حطلي مدرسين وبالاول طلعت بدرسين وامتحنت ونجحت بعد تعب وجهد وسهر مو بسهوله ابد حتى عباس قصرت وياه بحقوقه لان صرت اتعب وهو يخاف عليه ومقبل اراجع دكتوره نهائياً حط عليه ميت يمين واني هم انشغلت بسالفه الدراسه ازور ام ظامن كل فتره وهي هم وبيت عصام اروح ساعه وارجع بس اشوف الجهال واسلم عليهم وهكذا مشت ايامي وسنيني
...................
(بعد مررور اربع سنوات)
صرت بصف الثالث متوسط رسبت سنه ونجحت سنه الثانيه واخذت شهادة الثالث وبيداء رابع اعدادي صارت درسنا سوه وتعبنا سوه وفعلاً جنا فخورات بالصار واتفقنا سنة التجي هي اتكمل لحد الكليه اني قررت اكمل معهد بعد الثالث لان مستوايه مو شي عباس احسن رجال بحياتي واطيب واحن نسيت شنو مشاكل يمكن اتكولون ماكو بيت ما يخله من المشاكل بيتي وحياتي وي عباس خاليه تماماً من اي مشكله انسان مسالم جداً / احبه ويحبني
صوصي بالمدرسه واسيا كبرت ماعرف شي عن حياتهم بس اروح علمود اشوف الجهال احمد اصلاً مشايفته بس اسال عصام يكول زين وبناته مدارس صابرين ولا اعرف اخبارها
ايوب هذا اختفى نهائياً ومحد يعرف اخباره

حياتنا حلوه وسعيده لحد ما اجه اليوم التعيس
عليه وعلى العراقيين كله هو يوم سقوط النظام في بغداد
اجه عباس وكال يله نغم لمي كلشي خلي نطلع للنجف الامريكان طبو العراق
نغم:شنو ليش شصار
عباس:بغداد سقطت والعالم كاعد يطلعون مو وكتها يله نغم
نغم:عباس اخوتي وجهالم حباب
عباس:نغم مو مال انخاطر بحياتنا امشينا نطلع وبعدها بس يعدء الوضع اوعدج اجي واشوفهم واطمنج يله تره اني شايل هم اريع نسوان

للحكايه بقيه........

تصويتكم حبايبي وتفاعلكم مهم جداً