اول اهتماماتي (مكتملة)

بارت ١

هذا اول بارت بالروايه اتمنى تعجبكم وتستمتعون فيها هذا البارت كبدايه ومارح ارضى تمرون مرور كرام لازم تشاركوني اقتراحاتكم وتعليقاتكم ♥️😌 اللي تسعدني وتخليني استمررر للافضل

طلع من غرفته وربط شعره اللي طال وصار يوصل قريب من كتفه رفع اكمامه
ناصر بحماس : وقتتت التنظيف
بدا يطلع ادوات التنظيف واحد وراء الثاني ابتسم بنتصار اخيرا الشقه فاضيه يقدر ينظفها شال كل شي بطريقه بدا يمسح وينظف الارضيه بعد ساعتين بالضبط انتهى من التنظيف وجلس على الكنبه بتعب
ناصر : اووف تعبت
بهذي اللحظه سمع صوت القفل بالباب وقف وركض جهت الباب ونقز على اللي داخل
فيصل طاحت منه الاغراض اللي بيده وبصدمه وتحذير مسك ناصر : كم مررره اقول لك لاتسوي هالحركات
ناصر بعد عن فيصل وطلع لسانه : اسف اخر مره
فيصل شال الاغراض من الارض وبضحكه : طيب طيب بسامحك هالمره
ناصر بدا يطلع الاغراض من الاكياس : اقول فيصل
فيصل كان سرحان : همم
ناصر برتباك : كم بيصير اجار الشقه ؟!
فيصل كان جالس يرتب الاغراض بالدرج وقف : اي صح نسيت اقول لك
ناصر التفت له بستغراب : وش ؟!
فيصل ببتسامه : خلنا نخلص واعلمك عندي لك مفاجئه
ناصر بفرح : صدددق والله
فيصل ضحك على ردت فعله : اي صدق اجل بكذب عليك
ناصر بدا يرتب الاغراض اماكنها فيصل التفت عليه : ناصر روح خذ لك دش وبدل بنتعشاء برا
ناصر بتعب : يلا بروح
راح ناصر شغل الدش الدافي ورجع لغرفته يطلع له ثياب على مايخلص البانيو ويمتلي
فيصل دخل لغرفته : ناصر اسمع بطلع شوي ١٠ دقايق بالكثير بيجي واحد يعطيني اوراقه
ناصر بعدم اهتمام : تمام لاتتاخر
فيصل وهو يطلع : مارح اتاخر
ناصر دخل بالدش الدافي ارتخت اعصابه يجنن الدش والدفى بدا يفكر وش المفاجئه اللي مسويها له فيصل بعد مرور وقت غمض عيونه وجاء قدامه صوره بشعه فتح عيونه بخوف وشهق
فيصل دق باب الحمام : ناصر ناصر فيك شي ؟!
ناصر وقف وضغط تفريغ الدش : لا مافيني شي
لبس شورت والروب فتح الباب وشاف فيصل قدامه
ناصر بخجل : شفيك هنا ؟! خلاص اطلع مافي شي
فيصل بخوف وشك : متاكد ؟!
ناصر ببتسامه كاذبه : اي اجل اكذب عليك ؟!
فيصل بعدم تصديق : تمام بنتظرك تحت
طلع فيصل من الغرفه اما ناصر اخذ البرمودا وبلوزته اللي بدون اكمام رتب شعره وطلع ربطه ربط شعره فيها وابتسم على شكله حط عطر طفى انوار الغرفه
بغرفه التلفزيون
فيصل اول ماسمع خطوات ناصر وقف وهو لسه ماشافه : هاه نروح
ناصر : يلا
فيصل بصدمه : وش هاللبس؟!
ناصر بستغراب : شفيه لبسي ؟!
فيصل : اسال نفسك
ناصر بدا يناظر نفسه بالمرايه : فيصل والله شكلي عادي
فيصل مسك يده وتوجه للغرفه طلع له ثوب : البس ذا
ناصر بحلطمه : بس تدري اني ما احب الثياب فيصل تكفى مابي البس الثوب
فيصل بعتب : الحين اقول لك عندي مفاجئه ومسوي لك هديه تقول لي كذا ؟!
ناصر بياس : طيب اطلع ببدل
فيصل بشك : ناصر ترا احنا شباب عادي مارح يصير شي لو فكيت التيشيرت
ناصر ابتسم : لا معليش اطلع
فيصل : طيب يلا اذا خلصت قول لي بجي اعدل شعرك
ناصر باهمال رمى ملابسه على السرير لبس الثوب وبعثر شعره فتح الباب فيصل شاف ان شكله كويس كذا مسك يده ومشو لخارج الشقه
ناصر بفضول : وش المفاجئه ووين بنروح !!
فيصل ببتسامه جذابه : سرر
ناصر التفت للنافذه : ياكثر اسرارك اللي ماتخلص
فيصل مارد عليه وشغل اغنيه سمعوها بالطريق وصلو لمطعم فخم
ناصر بصدمه : مو من جدددك
فيصل ببتسامه : ليه مو من جدي
ناصر بتفاجئ وتردد : فيصل ليه جايبني هنا ؟!
فيصل مسك يده : لاتخاف مو انت معي ؟!
ناصر عض شفايفه : فيصل
فيصل ماسمع لناصر وسحبه معه
النادل ابتسم لدخول فيصل : اهلين استاذ فيصل
فيصل : هلا
النادل مشى قدامهم : اسمح لي اوصلك لطاولتك
ناصر سحب يده من يد فيصل وهو للحين يعض شفايفه
وصلو للطاوله فيصل فتح الكرسي لناصر ناصر تجاهله وراح للكرسي الثاني جلس وكانت النافذه تطل على البحر فيصل بدا يتكلم مع النادل بعيد عن ناصر شوي بعد ماخلص جلس ومسك يد ناصر ناصر ظل يناظر فه فتره طويله وبعدها سحب يده
فيصل : شفييك انت مو قلت لك عندي مفاجئه ليه تسوي هالحركات تحسسني اني خاطفك
ناصر عيونه صارت تلمع وبنظره كلها عتب : فيصل انت تعرف هالمطعم له ذكريات سيئه عندي
فيصل ابتسم : وعلشان كذا تعمدت اجيبك هنا علشان تتغلب على ذكرياتك لمتى بتعيش على ذكريات عمك واللي كان يسويه فيك ؟!
ناصر ماعطاه بال ورجع نظره على البحر بعد دقايق جات الكيكه ومعاها اطباق الاكل استغرب ناصر
فيصل وقف وشغل الشمعه التفت للنادل : شكرا تقدر تروح
ناصر بصدمه : وش له هذا ؟!
فيصل : كل عام وانت بخير
ناصر فتح عيونه على وسعها : اليوم ميلادي ؟!
فيصل ضحك : اي ميلادك ليه مو مستوعب ؟!
ناصر ابتسم بالم : لا لانه هذي اول مره بعد ماكنت احتفل مع امي وابوي
فيصل لعب بشعره : قوم قوم يلا انفخ الشموع وخلني اعطيك هديتك
طلع الهديه المغلفه ومعاها اوراق استغرب ناصر من الاوراق
ناصر بفضول : ايش ذي
فيصل : افتح هديتك والاوراق هذي هدية عامك ال ٢٤
ناصر ابتسم وفتح الهديه وبصدمه : الساعه اللي كنت ابيها
فيصل ابتسم بحنيه : اي تركي قال لي عنها وانك تجمع مصروفك من الدوام لها
ناصر ابتسم وقام يبي يضمه بس استحي ورجع لمكانه لانهم بمكان عام
فيصل مد الاوراق : اقراها
ناصر بدا يقراء وعلامات الصدمه والفرح بوجهه تزيد : لا مو جدد تمزح صح
رفع راسه يشوف ردت فعل فيصل بس شافه جدي ناصر بشهقه : يعني الشقه صارت لنا لنا رسمي
فيصل ضحك :تقصد لك
ناصر عقد حواجبه : ليه وين بتروح انت ؟!
فيصل : مارح اروح مكان بس انها باسمك الحين يعني لك
ناصر بدت عيونه تدمع: والله مدري ايش اقول لك يافيصل
فيصل بمقاطعه : لاتقول شي ولاتسوي شي انبسط اليوم يومك
خلصو من الاكل وبطريقهم للرجعه دق جوال فيصل
فيصل بجديه : هلا والله اي فاضي ليه الحين ؟! طيب طيب جاي
تنهد ورجع راسه لوراء وهو يسوق
ناصر بقلق : شفيك فيصل !؟
فيصل ابتسم ويحاول يلطف الجو  : مستدعيني لاتخاف مافي شي اكيد عندهم شي يحتاجون خبرتي
ناصر تضايق بس ماوضح هالشي فيصل حس انه متضايق قرص خده
فيصل : لاتتضايق ماحب اشوفك كذا
ناصر عطاه نظره : انت كيف تحس
فيصل ضحك : ربيتك من كنت بالثانوي ماتبيني اعرفك ؟!
ناصر نفخ خده : طيب طيب
وصله للشقه وودعه تركه وراح طلع جواله واتصل رنه رنتين
تركي : يا اهلييين
فيصل : اسمع بلا اهلين بلا سهلين روح للشقه عند ناصر انا بتاخر اليوم
تركي يناظر اخته : ماقدر اروح
فيصل : ليه ؟! وش عندك
تركي : اختي واعدها اني اطلعها
فيصل تنهد: طيب خلاص اخليك الحين
تركي هداء صوته : فيصل ناصر مايتقبل احد يكون معه علشان كذا فا لاتتعب نفسك تخلي احد يروح له
فيصل برتباك : مافهمت ؟!
تركي : يعني ناصر اذا بتتصل على احد علشان يجلس معه يدري اكثر من مره اروح له يقول انك متصل علي يعني كاشفك
فيصل تنهد وابتسم * يعني مو بس انا اللي حفظتك حتى انت حفظتني * : تمام تركي اخليك الحين
كمل طريقه عادي مر الوقت سريع فيصل رجع بالكرسي بتعب دق جواله
فيصل بصوت مليان تعب : هلااا
متعب بضحكه : هلابك وينك انت
فيصل : بالدوام
متعب : اها علشان كذا ادق جرس الشقه محد يرد
فيصل عدل جلسته : ايش وش تقول ؟!
متعب استغرب : شفيك اقول لك دقيت الجرس مافي رد
فيصل : بس ناصر بالشقه
متعب : لا اخذت المفتاح من المكان المعتاد مافي احد بالشقه فاضيه
فيصل بخوف وتوتر : متعب ارجع لغرفته شوفها تكفى بسرعه
متعب بمحاوله لتهدئة فيصل : فيصل اهداء اكيد يمكن اذا موب موجود طالع يدور
فيصل : تمام
متعب : جد غرفته مافيها احد

متعب سمع صوت الباب : هذا هو جاء بسكر الحين
ناصر دخل ومعاه كيس وكان شكله مبهذل وتعبان مشى بتجاه غرفته وانصدم باللي واقف قدامه : متعب ؟!
متعب بجديه : اي متعب . وين كنت
ناصر بتوتر : هاه ماكنت بمكان طلعت العب كوره
متعب وقف قدامه وكتف يدينه : ناصر قول الصدق وين كنت
ناصر  كان يناظر متعب ولما قرب منه بعد عينه عنه : مايخصك بعد بروح غرفتي
متعب مال عليه : ناصر انا اكثر واحد فاهمك وين كنت قول لي مارح يوصل الكلام لفيصل
ناصر بعد متعب من طريقه: قلت لك مو شغلك
متعب ضحك : ياحرام فيصل يربي وياخذ واحد مثلك
ناصر التفت بصدمه : وش تقصد بهالكلام
متعب ببتسامه خبث يبي يطلع اللي داخله  : تطلع وقت مايكون موجود ومشغول بالدوام ومسوي انا الشاب المطيع
ناصر عض شفايفه بقوه من كلام متعب بهاللحظه دخل فيصل
فيصل بصدمه : شفيك شصاير
متعب بسخريه : الاخ المصون مو اول مره اشوفه يطلع كذا ترا يافيصل بس كل مره اقول يمكن يعقل
فيصل قاطعه بجديه : متعبب
متعب : وش قلت ما اقول الا الصدق
فيصل : ماتتكلم ؟! شفيك وش صاير لك قالب حالتك كذا
ناصر : مافيني شي
متعب : قلت لك
فيصل حس بالصداع من كلام متعب وناصر مايدافع عن نفسه ابد : ناصر روح غرفتك ولاتطلع منها
ناصر : انا مو صغير تعاملني كذا ترا
فيصل بعصبيه : قلت لك روح غرفتك ولاتطلع منها الا لما اقول لك
ناصر شال الكيس اللي طاح منه وشفايفه بدت تتجرح من عضه لهم دخل للغرفه ونزل ثيابه شغل الدش ودخل فيه
برا بالصاله
متعب بتدارك للوضع  : انا اسف على اللي سويته بس لما دخل كانت حالته حاله ولما سالته قال انه طلع يلعب كوره
فيصل رفع راسه وعيونه مليانه عتب لمتعب : متعب ماكان لازم تسوي اللي سويته ناصر انا اعرفه مستحيل يسوي شي يضره او يضرني كنت ادري انه طلع اذا رحت الليل للدوام ولا ادري وين يروح صح بس ماعمري وقفته هالوقفه اساله
متعب حط يده على كتف صديقه : لاتحاتي انت مااخذته عندك وتحملت مسؤوليته الا علشان تتحمل تصرفاته وتصلحها وبعدين ترا ماعدت صغير
فيصل عطاه نظره : توني بال٣٧
متعب : يلا انا بطلع ولاتقسى عليه بكرا انا بجي اراضيه
فيصل فتح الباب  : دقيقه بجي اوصلك للسياره
متعب : مايحتاج اجلس عنده
فيصل : اقول امش اصلا يبي لي تفكير كيف اراضيه الحين
وصلو عند سياره متعب
فيصل : يلا مع السلامه
متعب حرك السياره اما فيصل جاء بيدخل وقفه شخص كان هيئته نفس شكل ناصر من شوي
خالد بتردد: لو سمحت
فيصل التفت : هلا
خالد : فيه احد بالعماره هنا اسمه ناصر ؟!
فيصل عقد حواجبه : اي نعم من يبيه
خالد : انا اسف بس نسى جواله عندنا بالورشه
فيصل بستفسار : ورشه ؟!
خالد استغرب اهتمام فيصل بناصر : شكلك فيصل
فيصل انصدم من خالد لانه يعرف اسمه : اي وانت مين
خالد : انا صديق ناصر بالشغل الورشه دايم نلتقي هناك وطبعا ناصر يضطر انه يجي اوقات معينه علشانك واذا كنت مشغول بالدوام يداوم معاي
فيصل : طيب ووين الورشه هذي ؟!
خالد : باخر الشارع اعذرني جيتك بشكلي كذا بس الشقه حقتي بعيده عن الورشه وبما انه ناصر اقرب قلت اوصل له الجوال وتشرفت فيك يافيصل لنا لقى ثاني
فيصل : ان شاء الله
خالد : ياحظكم ببعض انتبه لنفسك
فيصل : شتقصد
خالد : ناصر دايم يتكلم لي عنك وعن اهتمامك فيه وهذا اللي عاجبني اتمنى ماتكسر بخاطره بيوم علشان هالشغله اللي توظف فيها
فيصل : لا لا لاتحاتي
خالد ودع فيصل وفيصل وقف مصدوم من الموقف ناصر يشتغل بورشه سيارات وانا ما ادري طيب ليه ماتكلم مادافع عن نفسه يمكن متعب قايل له شي خلاه يسكت اعرفه مايبلع لسانه لازم ينثر سمه