Umuupo lang siya sa kasalukuyan
Binabalutan ng huni ng mga kinulong
Hinahanap ang mga salitang 'di tapos
Binabalikan ang noo'y hindi hinubog
Tumayo siya at sinimulan ang ekspedisyon
Nakikilala niya pa ang nakakasalubong
Ang mga naging parte at naging leksiyon
Ang mga tuluyan nang binaon sa limot
Napagod siya sa kanyang paglakbay
Huminto at nagmuni-muni
Napaluha siya nang umiyak ang langit
Hinihintay pa ring marinig
Malayo na ang nararating
Humarap sa lumang salamin
Hindi siya makaimik
Nakilala na niya ang sarili
Matayog na ang kanyang paglayag
Naramdaman niya ang kalapati sa hilaga
Naputol man ang pisi ng kanyang alamat
Kaluluwa niya'y patuloy pa ring lilipad
