الاخوات السته

تكمله

الاخوات  السته

ايهاب _ والحجي طلع جذب ابوج ماعافيج مزوج انتي شنوو لج عندج عقل شلون كدرتي تخطين هاي الخطوه نوب الحلو ذاب مشكله براس ابوها....

جنه _ ايهاب

عاط بيه _ صخام مو ايهاب

جنه ههه صدك ع كولت روى احته ماعدنه حظ حجيت وياه بكل هدوء _ ليش هيج تعصبت
ايهاب _ و الج عين تسألين ليش ،تعرفين انتي شمسويه ،تعرفين شنو معني بنيه مهزومه من اهلها
تدرين نظرت المجتمع شنو مثل أمثالج ،مهما كانت الأسباب بيت ابوج سترج وغطاج وبطلعتج منه نزعتي هذا الستر وكشفتي هذا الغطه
أنتي بنيه شلون كدرتي تسردين وتنهزمين ،عندج عقل برأسج لو لا تعرفين شنو بنيه بمجتمع ذكوري ،ماخفتي ع نفسج ع خواتج وأنتن بنات شابات وألعيون عليجن
بس الصوج مو بيجن الصوج بأبوجن ،اني لو منه أخلص عليجن بمكانجن ولا اخليجن لحظه عايشات ، جبتن العار لابوجن ماوراجن بس العار الله ياخذجن

جنه _ خليت عيني بعينه وابتسمت بكل هدوء بس داخلي بركان يغلي ع ساعه ينفجر بداخلي ويموتني
_مقبوله منك يا أستاذ يا معلم الأجيال، المحترم، المعلم والمثقف وهاي اني كلت راح يتفهمني ويحس بيه ههه بس المفروض ما احلم هواي واعيش بعالم الاحلام
لازم اعرف انتم كلكم نفس الشي انتم كلكم نفس الطينه كلكم مجرمين ،وحوش ،ظلام .. ماكووو فرق بينكم من خليل ، لحامد ل عزيز الله لايرحمه و اخووو النذل الثاني وهسه فاجأتني انته ،مثل مگلت مجتمعنه ذكوري ولا يوم حسب حساب للمرأه والبنت والأم دائماً تستقوون علينه وتشوفونه عارات بينما الله سبحانه وتعاله خله منزلت المراءه اعلا من الرجل
ومن كال بكتابه الرجال قوامون ع النساء معناهه المراه كائن حساس ورقيق تعيش بضل وظهر الرجل يكون إلها سند وعون مو فرعون وعذاب
بس انتو مع الأسف المعلم والدكتور والجاهل نفس التفكير ماتختلفون عن بعض بأي شىء ،وبما هسه عرفتني اني موخوش بنيه رجاءن عوفني لا أجيبلك العار
درت وجهي جيت أنزل وكوه كاتمه دمعتي لا تخذلني وتضعف وتنزل ،كاريد يشوف ضعفي وأنكساري
فتحت الباب ماانفتح ، جان مقفول

_ايهاب أفتح الباب رجاءن ،شكوو مركب وياك بنت مو خوش وجيبلك الشبهات،ليش مركب وياك وحده موزينه وانته الرجال الشريف
ايهاب _ جنه احترمي نفسج لا تخوطين صفح وعرفي أنتي منوو

جنه _ أعرف نفسي كلش زين ماله داعي تذكرني
اني وحده أنهزمت من ابوي وأكدر العب بكيفي وأسوي اليحلالي ،انهزمت وأكدر أسلك الطريق الأعوج وأعيش بنعيم
بس لااا ،ضليت محافظه ع سمعتي وشرفي وقبلت أشتغل خدامه بعز شبابي وأختي تخبز في سبيل الشرف والاحترام
قبلت أعيش الفقر والبرد والحر والجوع والحرمان في سبيل شرفي وسمعتي
صح ماعندي ابو يعلمني بس اعرف الصح من الغلط والحرام من الحلال وخوفي مو من البشر أنما خوفي من الله بالدرجه الأولى كان بامكاني العب بكيفي لا حسيب ولا رقيب ،بس خوفي من الله منعني وشرفي و سمعتي عندي اعز من نفسي وروحي
أعرف نفسي كلش زين وحده خدامه واستاذ عطف عليها و لأن اني وحده مشوهه ومگطوعه ،كال اخلص وياها وكت و اشمرها محد إلها