زيني "قدري "

2

((2))

لمن أمي قالت لي أبوك وقع في المصنع حسيت انو حيلي ما شايلني واطرافي دي خلاص ماتت حسيت بي وجع جوة روحي يمة انتي بتقولي في شنوو ابوي قبيل مشا من هنا كويس 😭😭😭 وانا ابدااا ما ح أقعد بي وراك لازم امشي واشوفو
امي: يابت انتي جنيتي واخواتك ديل نخليهم براهم
انا : نوديهم الجيران نسوقهم معانا المهم امي ما ح أقعد مشيت لبست عبايتي وجدعت فيني طرحة وطلعت دخلت اخواتي لي جيرانا ومشينا انا وامي علي المستشفى جسمي ده يضرب كنت خايفة شديييييد حاسة روحي بتمرق مني مستعجلة بعاين في الطريق شوية بعاين في أمي دمعتهاا ما وقفت بتقرأ في قران بتدعي ليهو وصلنا المستشفى جرينا جري ساالنا منو عايزة اشوف ابوي 💔 لقينا عمو حسين مدير المصنع ومعاهو كم واحد كدة ابوي كان في غرفة العمليات مع الدكتور ما كنا فاهمين حاجة قاعدين منتظرين ما كنت قادرة أقيف علي رجولي ما كنت حاسة بي حاجة بمشي وبجي في الممر الدكتور طلع وشو ما كان شايل بشارة خير ابدااا وقفت مكاني بعاين في وشو ما كان عندي قوة كافية اني اسألو خايفة من الح يقولو بادر عمو حسين سألو رد الدكتور للأسف جاتو جلطة سريعة في الرأس ادت لي وفاتو مباشرة 😔 وفاته ؟؟؟ انا انااا سمعت صاح وفاة منو الدكتور مشى خلانا وامي وقعت بتبكي ملامح الحزن والاسف كانت ظاهرة في وش عمو حسين والزملاء معاهو بس انا الواقفة مصدومة جريت رجولي ودخلت الغرفة الطلع منها الدكتور لقيت ابوي جسمو هزيل وشو شاحب ما بتحرك ابدااا مشيت قعدت تحت مسكت يدو قعدت ابكي ليه لييه مشيت بدري كدة 😭😭😭 انا لسة ما شبعت منك ما شفتني وانا مهندسة كبيرة زي ما بتقول 💔💔 أبوي قووووم مش انت القلت لي انتي الح تسندينا وانتي الح تشيلي البيت طيب انا هسي اسند منووو واقول لي ريماس وريناد شنووو 💔💔😭😭 كنت ببكي وانا منهارة ما قادرة استوعب الحاصل لحد ما جا عمو حسين يطلعني بس ما عايزة اقوم طلعوني من الغرفة بعد كدة اليوم الاول ده كلو ما وعيت بي حاجة صحيت تاني يوم لقيت الدرب في يدي لقيت جمبي أمل صاحبتي واخواتي قاعدات حزينات استوعبتةالحاصل فكيتو وطلعت علي  الحوش لقيت الناس متلمة اهل امي علي أهل ابوي عايزين يعزوني بس انا كنت عايزة امي جريت قعدت في الارض ختيت رأسي في رجولها وكنت ببكي امي انا عايزة أبوي قولي لي انو ما مات عليك الله 💔 امي بقت تقولي استغفري وادعي ليهو فضلت قاعدة ببكي مشيت لي اخواتيى كانو ببكو قعدتهم جمبي وبقيت ابكي معاكم عارفين انو نحن ما شبعنا من حنية ابوي وحنانو علينا كانت ايام صعبة عليناا امل صاحبتي ما فارقتني الأيام دي ووقفت معاي اهلنا كل زول رجع لي حياته واشغاله عمو حسين كان دايماا بجي ويتفقدنا والبيت فضا علينا انا وامي واخواتي الما كانو فاهمين حاجة أمي قالت نرجع بيتنا هناك في البلد  انا : انتي عارفة يا أمي انو بي حيات ابوي مرتضى ود عمي سكن في ببتنا وصعب نمشي نطلعو منو وبعدين هنا البيت بي اسمنا ونحن نقدر نعيش فيهو بي راحتنا وكمان عمو حسين قال لي ح اجيب ليكم المعاش كل شهر وان شاءالله مع قروش ايجار الاراضي الحياة بتمشي امي اقتنعت بي كلامي وفعلاا نحن هنا لقينا حياتنا نزلت مدرسة غيرت هدفي من دكتورة لي إني احقق رغبة أبوي وابقى المهندسة اللي هو كان بتمناها في عز وجعي ده كنت بحاول اخفف علي اخواتي واعوضهم برسم عشان أبوي بحبني ارسم لحد مافي يوم قلت لي أمي رأيك شنو نبيع الاراضي بتاعت ابوي ونبني الجزء التاني من البيت نعمرو ونأجرو ح ينفعنا الإيجار هنا حلووو  وح يكون بالنسبة لينا مصدر دخل ثابت امي وافقت واتصلت علي عمي كلمتو وهنا كانت الكارثة انو عمي انكر انو الاراضي مسجلة بي اسم ابوي وللأسف الاوراق كانت هناك معاهم وقال ليها دي ورثة من ابونا نحن وبما انو نحن ما عندنا اخو ولد فما ح يطلع لينا حاجة انا النار اكلتني رافضة اصدق الكلام ده الاراضي دي نصيب ابوي صح ورثة بس بي اسمو بقت وانا متأكدة من كدة طيب يا أمي اسأليهو من الجنينة دي حقت أبوي ما ورثة يا بتي واضحة عمك عايز يستولى علي القروش وما ح يدينا لا جنينة ولا غيرو
أنا:: يعني شنوو يا أمي يعني نحن عشان بنات ح يأكلونا ح يستضعفونا ونحن كل مشكلتنا في الدنيا انو ما عندنا اخ يجيب حقناا
امي: نعمل شنوو يا بتي قسمتنا ح نقيف معاهو في المحاكم يعني
انا: لا نشوف حل نحن ما ح نقعد كدة دي الحاجة الوحيدة الباقية لينا دي مصدر دخلنا ما ح نسكت
امي: لا ما ح نعاديهم طالما هو قال كدة معناها ما ح يدينا حاجة ونحن ما ح نستفيد شي من عداوتو
انا: يا أمي لييه الاستسلام ده طيب نعمل شنووو ح يجي يوم نموت من الجوع لو قعدنا كدة
امي: خليهاا علي الله وانا ح اشوف لي شغلة ان شاءالله
انا: تشتغلي؟؟ وح تشتغلي شنوو انا ابداا ما ح اسمح بي حاجة زي دي تحصل ابدااا ما ح أخليك تتهاني بعد وفاة ابوي ابوي عمرو كلو عاش عشان يسعدك انتي يا أمي ولو في شغل انا الح أشتغل مشيت منهااا قعدت في الغرفة أبكي ما نمت كنت بفكر قمت من بدري لبست وطلعت مع اخواتي ركبتهم الترحيل وقلت ليهم انا بلحقكم واتوجهت للمصنع مشيت لي عمو حسين دخلت ليهو في المكتب سلمت عليهو وقعدت معليش يا عمو حسين انا هاجمتك من الصباح كدة بس عندي طلب بسيط انا عايزة اتنقل انا واخواتي من المدرسة بتاعتي لي مدرسة حكومية وده يحتاج يعني اني اجيب ولي امري فأنا ما عايزة أمي تعرف لو ممكن تمشي معاي
عمو حسين : ليه يا بتي المشكلة شنوو المدرسة لو ما سمحة انا ممكن انقلك في مدرسة تانية اسمح
انا: لا لا المدرسة كويسة بس انا عايزة اوفر مصارفها دي لي حاجة تانية
عمو حسين : سبق وقلت ليك انا متكفل بي دراستكم دي انتي واخواتك
انا : معليش خلينا نعيش علي قدرناا وقدر العندنا وانا مصرة اني اتنقل من المدرسة دي وامشي مدرسة حكومية
عمو حسين : اسمعيني كويس انا ما عندي اولاد وربنا ما كتب لي وانا حاسة اني مسؤول منكم انتي رفضتي اني اديكم اي قرش غير المعاش او اجيب ليكم حاجة وانا وافقت بس لحد قرايتكم دي انا ما ح اسمح ليك انتي بقيتي كبيرة وواعية انا عارف انو انتي شالوك في مدرسة نموذجية ممتازة ح أنقلك فيها راجعة بس اخواتك ح يواصلو قرايتهم هناك وانا مسؤول عن قرايتهم وبس