البارت الرابع عشر
وردايتي
حسن يستلم الراتب ويتداين هواية فلوس من أصدقائه.. ويروح على خواله يتوسل بيهم يريد فلوس ينطوا بس بشرط ... يكتبلهم وصل أمانة.. ويحذروا اذا ما رجع الفلوس خلال فترة يسجنوا...
حسن بالسيارة... (وقت الفجر)
الطريق طويل..التفكير دوخه لحسن..فكرة تجيبه وفكرة تودي..ودمعته بعيونه .. شخص تقريباً بعمره كاعد يمه ...
الشخص : شبيك خوية احسك مقهور وشايل هموم الدنيا على جتافك
حسن دمعته تنزل.. وارتاح لان هذا الشخص سأله..لان مخنوك ويريد يحجي وية احد...👇👇
والله يا اخوية اتمنى الموت اليوم قبل باجر
الشخص : خير خوية فضفضلي اني هم اخوك
حسن : ابوية بالمستشفى عنده السرطان .. وحالياً المرض انتشر ووصل للكلى.. والطبيب طلب مني متبرع وتعرف متبرعين ماكو..
الشخص : لعد هاي شنو حاط بالجيس ؟
حسن : رحت لدوامي أخذت راتبي ودبرت كم فلس من خوالي ومن الناس الطيبة امثالك حتى الحك على ابوية ان شاء الله الكيله واحد يريد يبيع كليته والحك اخذله جرعة الكيمياوي
الشخص : الله يساعدك ..وان شاء الله ربي يشافي للوالد..ماكو أعز من الأب
حسن : الدنيا متسوى بدونه
الشخص : شبيك عبالك نعسان
حسن : اي والله ما نمت
الشخص : نام خوية ارتاح ..الطريق طويل
ينام حسن...
فجأة يصحى يباوع على الطريق ما بقى شي ويوصل..
يشوف الشخص اللي جان كاعد يمه ما موجود نازل
يتذكر حسن هو لحد الآن ما دافع الكروة..
يمد ايده حسن بجيبه حتى يطلع محفضته..
المحفضة ماكوو..
يباوع الجيس الأسود اللي حاط بي الفلوس ماكوو
يتخبل حسن ....
ميعرف شنو يسوي
يكوم يصيح يا نااااس يا عااالم اني انباكيت..فلوسي راحن ..
العالم اللي بالسيارة...👇👇
اهدأ ان شاء الله ميروحن
حسن : الشخص اللي جان كاعد يمي وين... هو اللي باكني
السايق : نزل من زمان
اكو طفل كاعد بالسيارة ..عمو اني شفته اخذ الجيس من حضنك وطلع المحفضة مالتك بس خفت احجي لان هو شافني وأشرلي على المسدس اذا احجي يضربني
حسن ينهار ميعرف شنو يسوي ..يفكر بأبو.. يا ناس شلون ابوية راح يموت منين بعد ادبر مثل هالمبلغ منو ينطيني
واحد من اللي صاعدين بالسيارة...👇👇
خير اخوية شبي الوالد
حسن : رحت استلمت راتبي ودبرت كم فلس حتى اشوف شخص اشتري منه الكلى مالته لابوية
الرجال : شكد تدفع؟
حسن : شكد متريد ... بس ...بس شلون اني ما عندي حاليا فلوسي انباكن
الرجال : إني محتاج فلوس .. وقبل فترة ردت ابيع كليتي بس الشخص اللي دنطي الكلية توفى
حسن : ما عندي انطيك
الرجال : يعني بعد فترة متكدر اتدبر المبلغ
حسن يفكر... خلي اكله اي اكدر وعود بعدين يحلها ألف حلال
حسن : اي اكدر ..تعال وياية ويصير خير ....
يرجع حسن للمستشفى والرجال وياه..
يدخل الرجال للفحص..
حسن يروح على ابو للغرفة...
الكل كاعدين ...(ما عدا البنات بعدهن بالبيت)
ابو وردة : ها حسن لكيت متبرع؟؟
حسن : لكيت..
ابو وردة : ودبرت مبلغ ؟؟
حسن : دبرت بس....
ابو وردة : بس شنوو؟؟
حسن : انباكيت.. رحت جبت راتبي ودبرت مبلغ من اصدقائي ومن خوالي وجيت ..وباكني واحد بالسيارة ميخاف الله
ابو حسن : رحت لخوالك؟
حسن : أي يابه رحت لخوالي ونطوني مبلغ بس ...
ابو حسن : بس شنو شسوولك؟
حسن : خلوني اكتب وصل أمانة ..وذا ما ارجع المبلغ فترة يسجنوني
ابو حسن : ليش رحتلهم.. ليش هيج سويت؟
حسن : لعد شتريد اسوي تريدني أظل اتفرج عليك وانت دتموت كدام عيني..
ام وردة : حسبي الله ونعم الوكيل..زين ما خبرت الشرطة
حسن : لا خالة شمدريني بأي منطقة هذا الناقص نزل..خالة انتي ليش بعدج هناا ليش ما رجعتي يم البنات ..شلون عفتيهن يباتن وحدهن (رغم هالظروف هو يفكر بوردة وخايف عليها)
ام اسماء : مو عمك ابو وردة راح اخذ اسماء يمهن تبات.. ما عليهن شي يمه أمان ان شاء الله.. خلي اكوم اخابر اسماء اشوفهن شلونهن أني هم شو ظل بالي
تطلع ام اسماء تخابر على بنتها...👇👇
ها بنيتي شلونج ..والبنات شلونهن
اسماء : بخير ماما .. طمنيني على خالي شلون صار
ام اسماء : خالج حالته كل شوية تسوء.. وحسن هسة اجه ووياه متبرع ..ولو تدرين شصاير وياه
اسماء : حسن رجع 😍... شكو شبي خوما بي شي حسن
ام اسماء : خطية الولد رايح يجيب الراتب ومتداين فلوس من أصدقائه وخواله ..ومبيوك بالطريق
اسماء : يااا شلون لعد والمتبرع مو يريد فلوس ؟
ام اسماء : اي اكيد يريد
اسماء : يمه تعالي لبيت خالي هسة بسرعة..
ام اسماء : شكو شبيج؟؟
اسماء : تعالي وبعدين افهمج....
#زهراء_الزهيري
