البارت العشرون
وردايتي
حفلة المهر...👇👇
ام اسماء وام وردة يجهزن الغرفة للحفلة... تجي نور تساعدهن بس مو من كل كلبها..
وردة متطلع من غرفتها ااابد...
وحسن كاعد وحده.. العالم بوادي وهو بوادي.. الكل مثبورين ويجهزون للحفلة مال المهر مالته وهو ولا يم الموضوع اصلاً.. يفكر بوردة هسة بشنو حاسة.. شلون راح تتحمل تشوفني كاعد يم اسماء والبسها الحلقة.. اكيد هسة دتبجي.. اكيد كارهتني.. بس حقهاااا.. اني ما شرحتلها الموضوع وما فهمتها هذا اللي ديصير شلون صار.. والله غصب عني يا بعد روحي ونظر عيني .. لج وردايتي والله احبج وما اتمنى غيرج..
ترجع اسماء من الصالون .. لابسة فستان كولش حلو وحاطة ميك آب يجنن .. وتسريحة شعرها كولش حلوة
ام اسماء : ما شاء الله بنيتي الحلوة.. محروسة من كل شر ..طالعة تجننين والله الكمر يغار من حلاتج
ام وردة : بسم الله ما شاء الله 😍 فدوة لعروستنا الحلوة.. الف مبروك حبيبتي شايفة كل الخير
تروح اسماء لغرفة الضيوف ..👇👇
حسن يشوفها...
يكول بداخله (ما شاء الله طالعة كولش حلوة.. بس والله ما احبج .. وحرامات هذا جمالج راح يصير إلي لان أني ما احبج ولا بيوم راح احبج.. والله يا بنت الناس تستاهلين واحد احسن مني.. واحد يصونج ويحبج ويقدرج بس اني لاااااا)
ام اسماء : يله العرسان الحلوين كعدوا واحد يم الثاني..
اسماء متصدك امها كالت هيج تكوم بسرعة تكعد يم حسن..
ابو وردة : صدوك ابو حسن انتوا ما اتفقتوا على الحاضر والغايب مال العرسان
اسماء : خمسين بمية (تقصد خمسين مليون حاضر - مية مليون غايب)...!!
الكل ينصدمون من المبلغ اللي كالته اسماء .. لان يعرفون وضع حسن .. بما فيهم امها هم تنصدم
حسن : مستحيييييل.. كل عقلج ؟؟!
اسماء : طبعاً .. شنو قليل بحقي هذا الشي.. لو ما اسوى
ابو حسن : بنيتي تسوين الدنيا وما بيها بس مو لهالحد تطلبين هالمبالغ العالية..😒
حسن : اني مستحيل اقبل على هيج شي ..منين أجيب هالمبلغ متفهميني..؟!
حسن بتعصب ويحاول يكوم يطلع من الغرفة..
ابو وردة : اكعد ابني
حسن : عمو مدتسمعها..؟
ابو وردة : اكعد كتلك..
حسن إحتراماً لعمه يرجع يكعد...👇👇
عمي منين اجيب شنو أملك كنوز قارون..
(قارون هو أحد أغنياء قوم النبي موسى ..كان يملك ثروة طائلة.. ويعمل وزير لدى فرعون (فرعون ملك جائر وظالم وكان عدو للنبي موسى (ع)..)
ابو وردة : بنيتي اسماء قللي من المبلغ لخاطري
اسماء : خالو شبيك ترى هو مجرد حبر على ورق.. اني قابل رايدة من حسن هذا المبلغ
حسن : لعد شكو حاطته..؟
اسماء : هيج فد شي كتقدير إلي هذا المبلغ.. وحتى من احد يسألني اكون فخورة من اذكر هيج مبلغ..وحتى العالم كلها يعرفون اني غالية عندك
