البارت السادس عشر
وردايتي
ام اسماء تفرح هواية لان حسن وافق يخطب بنتها.. وتكلهم راح ارجع لبيت ابو وردة حتى اكول لأسماء هذا الخبر الحلو
تطلع ام اسماء...
ابو حسن :(دموعه تنزل)...
حسن : اضحي بحياتي كلها لخاطرك.. مو بس اضحي بكلبي وحبي..لتبجي يابه فدوة لعينك
ابو حسن : لك ليش هيج سوووويت... ليش تضحي بسعادتك على مودي ... شلون تاخذ اسماء وانت كلبك يم وردة... زين و وردة ما فكرت بيها...؟؟ ما فكرت شنو راح يصير بالبنية
حسن : دمعته تنزل.. يابه كافي لخاطري تره احس اختنكت ما كاعد اكدر اتنفس
ابو حسن : اتصل بعمتك كوللها عمه اني ما موافق.. بابا اني ما باقيلي أيام واموت ويجوز ساعات ما اطول.. لتضحي بروحك على مودي وتخليني اموت مقهور واشيل خطيتك طول عمرك راح تعيش تعيس وية اسماء واني ادري... خابرها ابني لو أني اخابرها
حسن : يابه أني رايح على المتبرع اتفاهم وياه على المبلغ اشوفه شكد يريد ..
ابو حسن : ابني لتأذيني تعااال
حسن يطلع ويسد الباب...
يمشي بالمستشفى مثل المجنون ودموعه تنزل...
شلووون راح اشوف وردة من ارجع للبيت ؟؟ شنو راح اكوللها هيج بليلة ويوم خطبت اسماء...؟؟!!!
هسة اكيد عمتي وصلت للبيت وكالتلهم أني راح اخطب اسماء ... لج وردة حبيبتي هسة شصار بحالج من سمعتي الخبر ..والله يا بعد عمري غصب عني
ولج والله ماحبيت غيرج وردايتي 😭😭😭😭
يدوخ حسن ويفقد الوعي...
يشيلوا العالم ويدخلوا للطوارئ...
ام اسماء ترجع لبيت ابو وردة...👇👇
وينج يمه سماء ووووينج... الف مبروك بنيتي... الف مبروك يا احلى عروسة 😍
اسماء ما مصدكه اللي دتسمعه ومن الفرحة ما كدرت تنطق ولا كلمة.... 😳😳😳😍
نور : خير عمة شنو الموضوع... انتي جنتي بالمستشفى شنو اسماء خطبها الدكتور ههههه
ام اسماء : لا يا دكتور ... حسن هو اللي خطبها... وابو حسن وحسن هسة كالولي روحي كولي للعروسة
وردة بالمطبخ سمعت الكلام وما مصدكه اللي دتسمعه...تضحك وضحكتها تعلى... حسن ههههه اسماء هههههههه تظل تضحك ودموعها لا إرادي تنزل ...
متسيطر توكف بعد.. تدوخ ..حيلها يروح ..وتوكع بالكاع تفقد الوعي
ام اسماء تظل تحجي بالموضوع تقريباً ربع ساعة...👇
ام اسماء : بنيتي نور جيبيلي كلاص مي عطشت
نور تروح للمطبخ....👇👇👇
ماماااااااا... ماما تعالي وردة مغمى عليها
ابو وردة : يروح يجيب تكسي بسرعة وياخذ وردة للمستشفى...
يدخلوها للطوارئ...
نور واسماء كاعدات بالاستراحة بالطوارئ..يسمعن العالم يحجون خطية هذا الولد والله.. حرارته مرتفعة وبس يهلوس...
واحد من العالم يكول : يمكن هذا نفسه اللي جابوا ابو متخربط ويريدون يزرعوله كلية..
واحد ثاني يكول : هذا مبين عليه عاشك هههه بس يهلوس ويصيح وردايتي احبج.... 😥
نور واسماء يرحون ركض للغرفة...
يدخلن يشوفن حسن نايم ويهلوس بإسم وردة..😥
تتقرب عليه اسماء حسن اكعد اريدك تشاركني فرحتنا..
حسن مغمض عيونه ويصيح وردايتي سامحيني..
نور تكول بداخلها (شكي جان بمحله وردة وحسن واحد يحبون بعض... بس ليييش حسن لييش هيج سويت.. ليش خطبت اسماء...اكيد اللي صار بوردة بسببك لان سمعت عمتي كالت حسن خطب اسماء)..
نور تنقهر وتطلع من الغرفة...
تبقى اسماء وحدها يم حسن...
اسماء...👇👇
منو وردايتي هاي شبي حسن؟؟ ... معقولة ؟؟؟؟ معقولة يقصد وردة؟؟ معقولة يحبها؟؟؟ زين وهي؟ ... اكيد فقدت الوعي لان سمعت حسن خطبني...
يله اااووووي شسويلها المهم اخذته.. المهم خطبني إلي ... وإلا اخلي ينساها وينسى اسمها ... ويجوز أني غلطانة بتفكيري يجوز يقصد غير وحدة لان اللي ادري بي وردة وحسن بس يتعاركون...
اسماء تلزم حسن من ايده.. حسن اكعد اريد احجي وياك ..لو تدري شكد فرحانة.. اكعد حبيبي..😥
اسماء تجي عينها على إيد حسن وتشوف الساعة اللي جابتها وردة لابسها...
تكول بداخلها(هاااا اسماء بعدج تفكرين هي اللي يحبها لولا ... اي يجوز عجبته الساعة ولبسها.. هو ميحبها لوردة... حسن يحبني... اي يحبني إلي)..
بهالأثناء حسن يفتح عيونه...👇
وردايتي وين وردايتي ...😥
يلكي اسماء كاعدة يمه لازمه إيده..
حسن بسرعة يجر إيده من إيدها...
انتي شجابج هنااا
اسماء : مو .... مو...
حسن : احجي مو شنو..؟
اسماء : جيت على مود وردة ... اقصد وية وردة ...
حسن : وردة 😳
اسماء : اي وردة شبيك فزيت
حسن : شبيها وليش جتي للمستشفى..جتي حتى تشوفني ... روحي اسماء طمنيها كوليلها ما بيه شي
اسماء : المن اطمن شبيك.. وردة نقلناها للمستشفى لان فقدت الوعي...
حسن : شنوو شبيهاااا لج احجي وردة شبيها ووين هي هسة احجي بسرعة
اسماء : اهدأ حسن شبيك انت لحد الآن ما كتلي كلمة حلوة ولا كتلي مبروك
حسن : مبروووك على شنو شكد بطرانه انتي ؟؟؟ لج وردة وين احجي
اسماء تنصدم من كلامه...👇👇
وردة بالغرفة الثانية اللي يم غرفتك
حسن يكوم بسرعة بدون وعي يشلع المغذي من الكانيولا وإيده تظل تنزف...
اسماء : حسن ايدك دتنزف وين رايح ارجع لمكانك..
حسن : هو كلبي كام ينزف ظلت على إيدي......
#زهراء_الزهيري
