شتات آلروح .. 💓

البارت 13

شتّات الرُّوح💜🌬
*هبه بابکر*
*13*
مؤتمن صحى على صوت المنبه الساعة 4ونص قام واستغرب انو صحبو حسام م معاهو ف الغرفة مشى صلى ولبس  واتصل عليهو
مؤتمن:وين انت مش مفروض تكون قاعد معاي ف الفندق حسب اتفاقنا
حسام:قول صباح الخير  وبعدين ياخ زول مسافر بعد ساعتين مش مفروض يكون مع اهلو وبودعهم ،انا من امبارح بليل طلعت بعد انت نمت
مؤتمن:بتستفز فيني؟
حسام:وين الاستفزاز ف الموضوع كل الحکايه الماعندو خير ف اهلو م عندو خير في الناس
مؤتمن سكت والجملة دي وجعتو عشان حقيقتها وعشان القالها صحبو شدييد💔
مؤتمن:خير يا زوول
بدأ يجهز ف اوراقوا وحاجاتو لغايت م المواعيد تقرب عشان يفتش زول يوصلوا المطار

*عند ناس سوسن*
وقاعده ف السِّجاده وبتدعي ودموعها جاريه :ربنا يهديك ويليِّن قلبك  ويوصلك سالم وترجع مؤتمن ولدي البعرفو

ريم كانت صحت ونزلت تشوف امها ولقتها خلصت من الصلاة

ريم:ربنا يتقبل
سوسن:امييين يارب
ريم:يلا يجميل اشربي العصير وابلعي الحبه عشان تبقي فل الفل
سوسن:انا كويسة الحمد لله
ريم:برضو لازم تبلعيها عشان م تنتكسي تاني والسكري داير ليهو متابعه
سوسن بلعت حبوبها وقالت:غريبة المصحيك بدري شنو
ريم:انا كنت نايمة معاك من بليل لما قمتي تصلي انا كان طلعت فوق
سوسن:الحمد لله عليك
ريم:الا الناس تمرض حتى تقول كلام يفتح النفس
سوسن ضحكت:ابوك وعمك صحوا
ريم:قاعدين بنِقُّوا من الصباح م عارفة المواضيع دي بجيبوها من وين
سوسن:بقيتي قليلة ادب
ريم وواقفه جمب الباب:تربيييتك

مشت المطبخ عملت ل ناس ابوها الشاي واتصلت على ميامن
ميامن:ريييم ف شنو
ريم:النايمه ليها شنو انتي
ميامن:يخ ضاربه لي الساعة6معقولة بس
ريم:عايني م تمشي الجامعة انا جاياك ف البيت
ميامن:والله الجامعة كان حقت ابوك م بتعملي كدا
ريم:ي زوله كلمتك بس جهزي الاكل والحاجات الظابطه
ميامن:ااتخارجي خليني اتم نومي
انتهت المكالمه
ريم مشت ودّت الشاي
وليد:تسلم الايادي
ريم:والله انا م عارفه كان مشيتوا مننا الحيونسني منو
محمد:اها شفتي عمك بكرة قال ماشين خلاص
ريم:لالالا انا عندي معاهو مواضيع والله
وليد:احكي اليوم دا كلو انا قاعد
محمد:انا اقوم ارُش النجيله واجيكم مواضيعكم دي بتوجع راسي والله
وليد:اهااا
ريم:موضوع مصطفى والله مرق من بالي وم لقيت فرصة اتكلم معاك فيهو
وليد:كلي آذان صاغيه
ريم:طبعا يوم اللمه الفي البيت لاحظت انو مصطفى متغير وبشوش وبتكلم م على عادتو
وليد:ااي والله بسطني شديييد
ريم:يلا مصطفى عندو مرض اسمو *الغضب المرضي*
وليد نطط عيونو:دا كلام شنو ي بت
ريم:مصطفى بهيج ف حاجات م بتستحق انو يكسر حاجة ولا يتصرف بطريقة غريبة ودا بكون لما يتنقاش معاك مثلا والنقاش يِِحتَدَّ ولا تكون ف حالة نقد دايما انت م عملت وما بتفهم بقوم بتصرف بأسلوب حاد ما طبيعي ودا لو م لحقناهو الدنيا بتجوط
وليد:ويتصرفوا معاهو كيف لكن
ريم:زي م قلت ليك هو بحب الاجواء الهادئه وبكون فيها طبيعي جدا وانت تحاول كلو م تتكلم معاهو نفسك يكون باارد وما تنفعل ولو م قدرت خلي النقاش بعد ما تروق والجو الهادىء والتعامل الكويس حيجيب نتيجة كويسة شديد
وليد:والله دي حاجات غريبة خلاص دايرة تجننيني ي ريم
ريم ضحكت:والله نحنا بنستهتر بالحاجات دي ساي
وليد:فعلا كلامك صح

محمد جاء داخل عليهم
محمد:لو بتحرروا ف القدس م بتقعدوا زمن زي دا
ريم:جيت ف وقتك
وليد:ابوك دايما واقف لي ف حلقي

ريم طلعت تشوف دعاء صحت ولالا
يتبع..