𝙨𝙞𝙡𝙤𝙣𝙜 𝙖𝙩 𝙠𝙞𝙨𝙖𝙢𝙚

kosmikong itlog ng pag-iral

patulang saliw ng "the egg" ni Andy Weir

☪

umunat ang puti't kawalan hanggang sa dulo ng iyong pananaw
          ngunit
hindi ko pa rin sasabihin kung nasaan ka
ilang beses ka mang magtanong, lagi kong
          ikukubli't
hindi isasatinig ang aking pagkatig sa iyong paglalakbay
          subalit
anak, ituloy mo lang . . .
ituloy mo ang pagmumuling-silang— ang
          pagsilid
sa san-angaw-angaw na sisidlan; o katawang tao

maging ikaw ang bawat
          isa
sa bawat segundo, oras, minuto, dekada,
          milenya
maging ikaw ang bawat nilalang na umiral at iiral— maging ikaw ang bawat
          kaluluwa

upang diligan ang pagsibol mo ng tuluyan
upang sa kalaunan ay halinhan mo ako
anihin mo ang pagsalahat ng
          dako,
kapangyarihan, lakas, pag-unawa, pag-ibig, presensya, kabutihan,
          talino . . .
hanggang matupok ang lubus-lubusan at maging ikaw
          ako

damahin mo ang simpatyang iyong ibinigay—
          na siya ring tatanggapin mo
pagdusahan ang dahas na iyong ikinumpas—
          na siya ring ikukumpas sa 'yo
ranasin mo ang kabutihang ibinato mo—
          na siya ring tatalbog pabalik

kabigin mo lahat sagutin ang sarili mong tanong,
tuklasin ang sagot sa misteryo ng kalawakan;
na meron lamang ikaw at ako;
at ang sansinukob ay isa lamang malaking itlog.

[ika-18 ng hunyo, 2020]

_____________

Tatlong pahina lang ito kaya sana mabasa niyo rin. Bigyan niyo ang pabor ang sarili niyo at basahin niyo. Ngayon na.