𝙨𝙞𝙡𝙤𝙣𝙜 𝙖𝙩 𝙠𝙞𝙨𝙖𝙢𝙚

isa akong espongha

sa dalas kong maghugas ng pinggan,
minsan ay may sari-sari akong nabubuong mga talinghaga

at sa magulong kumpol ng mga hugasin,
napapaloob ang mga kwentong natipon,
natuyo sa dulo ng babasaging baso,
naisaboy sa kalatagan ng kurbadong mga kutsara
at kumakapit sa espasyo sa gitna ng rehas ng mga tinidor

na ako ay isang espongha
nakatakdang suyurin at pahiran ang mga maruruming sulok
isa-isang titipunin ang mga natirang butil- natirang kwento
at sa halip na paanurin sa tumatakbong tubig
ay aking igigilid, ibabalangkas

katulad ng isang manunulat
ako- isang manunulat
isang espongha

na sa aking gaan ay walang mailalabas na katas
at sa aking bigat ay may dadaloy, may bubula

ako ay mananatiling uhaw habang-buhay
sa tubig at kahit anong maaaring lunukin
upang makapaglabas ng sining sa aking mga salita
at makapagbuga ng usok na kay bigat; na nanahanan na sa kambal kong mga baga

kung hindi ako isang espongha,
tiyak na ang hindi ko paghinga
ibon sa dagat
o
isda sa himpapawid;
paglabag sa panuntunan ng buhay

isa akong espongha
sapagkat sa aking pagkakapuno't sa bawat pagtanggap ng likido,
ako ay sumasaya
at sa pagpapakawala't sa bawat pagbigay- pagbitaw ng bigat,
ako ay lumalaya

isda sa dagat
at
ibon sa himpapawid

isa akong espongha
isa akong manunulat
at ako'y may layunin

[ika-19 ng abril, 2020]