𝙨𝙞𝙡𝙤𝙣𝙜 𝙖𝙩 𝙠𝙞𝙨𝙖𝙢𝙚

taludturan

hindi tayo nagiging abo kapag tayo ay namamatay
ang katawan ng tao, maari, oo
pero ang malulunok mo sa isang baso ng tubig ay ang mismong likido— hindi ang sisidlan
naniniwala akong sa ating pagpanaw, ang kaluluwa ng tao ay nabubuong tula
na ang mga berso ay dinampot mula sa pinakapaborito nating mga alaala
inihatid ng hangin,
ibinalangkas
gamit ang letra na ating inipon
sa habang-buhay
at mula sa sining na ating nasaksihan,
makakabuo ng taludtod na tutugma
kalaunan ito'y
isasawika ng Panginoon kasama ang isang mahiwagang musika

dahil ang buhay ay isang balagtasan
na hindi natatapos habang may paghinga,
tinatanong kita ng maibabahagi mong mga kataga

ano

ang

magiging

taludtod

mo?

[ika-12 ng oktubre, 2020]