رحلة وجع ( مكتملة )

❤❤الفصل الثاني ❤❤

فقالت ولاء بصوت شبه مسموع:: لو شفتوا مناظركوا بتضحك هوا أنا بخوف للدرجه ديه؟؟
فأجابتها رنا وهي تضع يداها الاثنتين علي خصرها و تهز قدمها اليسرى في حركه مسرحيه وهي تقول:: بت إيه ياختي دانتي كان فاضلك شنب و قرنان والدخان كدا كدا كان طالع من ودانك وكنا نقول بدل البت ولاء( الواد علاء )....
* صدمة أخري وقعت علي ولاء من كلمات أختها، فنظرت لها ولاء بغضب مع نظرات متسائلة ؟؟؟
إنتي يا بت مين علاء ده؟
ففتحت رنا أعينها ثم قالت:: ورحمة أمك، يعني انتي سبتي الشنب و الدخان و القرون ومسكتي في الكلمه ديه !!!!
* ثم مسكت قلبها وقالت:: آه ياني ياما ،خلفتي بت هبلة ، ومش بتفهم،  والتانيه أهبل منها و مش  سيبتي غير أنا العقله اللي فيهم اللي أعلمهم الغلط من الصح مشيلاني مسؤولية كبيرة قوي وأنا لسه في عز شبابي آه ياني ياما
ندي::  رنا إنتي قد الكلام اللي انتي قولتيه من شوية ده؟
* فأجابتها رنا في ثقة:: طبعا يا بنتي وهو أنا من  إمتي بقول كلمة ومش ببقي واثقة فيها ..
* ولاء وهي ترفع كم قميصها:: يبقي استعانا عالشقا بالله...
   فتراجعت رنا بحركة تلقائية للخلف وعلامات الخوف بادية علي علي وجهها :: إوعوا تكونوا صدقتوا حاجة من اللي لساني قالها
ورحمة نفسي بلاش أمي دي اللي بحلف بيها كدب الواد لساني اللي مش بيفهم حاجة هوا اللي إتكلم مش أنا وإنتوا شفتوا بنفسكوا مش محتاجين إثبات...
ثم خرجت مسرعة من الباب حتي تتجنب غضبهم ولأنها تأخرت علي جامعتها
* فضحكت ولاء و ندى،  ثم إستأذنت ندي للذهاب لعملها ،كما توجهت ولاء للمستشفى...
❄❄❄❄❄❄❄❄❄❄❄❄❄  
وصلت ولاء للمستشفى..
ودخلت بكل ثقة وغرور بل لنقل كبرياء، فوقف كل من بالمستشفى لتحيتها ،فهم يهابونها بشدة ،لأنها حقا صارمة في عملها، كما تكره الكذب ،لذلك يتم تغيير أطقم الأطباء كل سبعة أيام  ...
فمن لا يعرفها هي ( ولاء أحمد المحمدي )
نافست أكبر الأطباء في مجالها، كما حققت شهرة لنفسها في عام واحد لم يحققها طبيب في حياته بأكملها.....
هزت لهم ولاء رأسها علامة الإيجاب، ثم توجهت إلي مكتبها
أخذت ولاء تراجع بعض الأوراق الخاصه باستيراد الاجهزه الطبيه وأخرى للحسابات، وأثناء عملها شردت ولاء في حياتها، وكيف أنها كانت تبتسم دائما مع شقيقاتها أوغيرهم، كانت لا تكف عن الضحك والمزاح أبدأ ،تذكرت لقبها وهي صغيرة( الشقية المرحة ) ولكن كأن القدر   يستمتع باللعب معها ،فحولها من طفلة بريئة لا تعرف غدرا ولا غشا ولا حتي خداعا تمر بهما 
( فيا لسخرية قدرها )
* أفاقت ولاء من شرودها علي دقات سريعة على الباب، فأذنت للطارق بالدخول ،وكانت إحدى الممرضات..
الممرضة:: دكتورة ولاء محتاجين حضرتك في العمليات دلوقتي إنتي والدكتورة لمياء . ولاء:: طيب روحي إنتي للدكتورة لمياء وخليها تلحقني  ..
ثم خرجت مسرعة من الغرفة ....... ولحقتها الممرضة ..
❄❄❄❄❄❄❄❄❄❄❄
في مكان آخر( داخل باريس عاصمة فرنسا  )
في مكان أقل ما يقال عنه أنه قصرا
* مجهول ١:: هوا إنت مش واحشينك، مش واحشك تاخدهم في حضنك؟ كرهتهم فيك بس إنت قادر تنساهم ؟
مجهول ٢ ::  أظن أنا قولتلك قبل كدا انوا دي حاجة تخصني أنا ،و أنا اللي أقرر أعمل إيه وما أعملش إيه ،ومحدش له انوا يتدخل ،وأنا كلامي مفهوم..
مجهول ١:: يا صاحبي أنا مش قصدي أتدخل والله بس انا بقول يعني إنه حرام كدا بقالك سنين ما متعرفش عنهم حاجة ولا فكرت تسأل عنهم ،ولا حتي تروحلهم تعرفهم الحقيقة ،وتتكلم معاهم ...
مجهول ٢ :: معلش يا صاحبي بس روح شوف وراك ايه الله يخليك  ،أنا ماشي ...ثم تركه ورحل .
مجهول ١ :: ربنا يهديك ويقف معاك يارب!!!!
❄❄❄❄❄❄❄❄❄❄❄❄ 
في جامعة القاهرة وخاصة في قسم إدارة أعمال..
رنا :: صباح الموز والعنب والمانجة والتفاح وأي فاكهة بس من النوع الرخيص والبايظ عليك!!
ميس وهي الصديقة المقربة لرنا:: صباح كل حاجة مليان عليها دبان ومش تنشاف!!
ضحكت رنا ثم قالت:: لولا إنك صاحبتي كنت وريتك، والا أقولك بلاش أحسن تزعلي وتبوزي و بصراحة لا تطاقي وإنت مادة البوز  .
* ميس وهي تدعي الحزن:: أنا دا أنا حتي وربنا موزه في نفسي، ولما ببوز بحلو أكتر حتي إسألي ماما؟
*
رنا وهي تبتسم بسخرية :: أسأل ماما؟ طبعا يا بنتي لازم أسألها ( أصل القرد في عين أمه غزال ) ،والا إنتي رأيك إيه ؟؟
* شهقت ميس ثم قالت:: ماشي، ماشي  طيب يا رنية هعديهالك بس علشان إتأخرنا علي المحاضرة، وبعد كدا قسما بالله لهوريك مين هي ( المياسة) ..
ضحكت رنا عليها بشدة لأنها تعلم أن صديقتها وببساطة شديدة لا تفعل شئ تتحدث فقط ،وبعد إنتهاء المحاضرة ستكون نسيت ما قالته حتي ...
رأتها ميس هكذا فسألتها:: بتضحكي علي إيه يا مجنونة؟
رنا :: ولا حاجة يلا بينا أحسن نتأخر أكتر من كدا والأستاذ حنفي يعملنا مهزلة المحاضرة  النهارده  ،أنا مش عارفه ياختي ما بيغيروش الراجل ده ليه ويجيبوا واحد تاني ينشاف ..ثم توجهوا لمحاضرتهم .......
❄❄❄❄❄❄❄❄❄❄❄❄
  أمام صرح رائع غاية في الجمال والروعة، بل لنقل كل كلمات الغزل والجمال لا تكفي لوصفه بل لا تكفي للتحدث عنه بأي كلمة  ...
تنزل فتاة من سيارتها الفخمه أقل ما يقال عنها أن الجمال يركع لها  !!!!
( في شركة المحمدي للهندسة )
نعم يا سادة إنها ندي أحمد المحمدي .
دخلت ندي الشركة وسط تحيات موظفينها وهي لا تبالي بهم  ،كيف تبالي بهم وهي كتلة برود وغرور متحركة، عذرا بل هي البرود و الغرور بنفسهم..... ،( هي تعلم أنها لم تكن كذلك من قبل ولكن كانت للظروف رأي آخر تجاه حياتها )
دخلت مكتبها الفخم الذي لو رأيته لحلفت أنه مكانا أثريا تاريخيا صنع لأميره فقط، ليس باتساعه، بل بتصميمه، بالاهتمام بأدق التفاصيل به ،بالواجهة الزجاجية التي تطل علي البحر.... فقد كان مكتبها لا يقل جمالا عن شركتها..
( فهي تصميم أجمل وأصغر وأبرع مهندسة معمارية عرفها العالم، تصاميمها التي أبهرت كل  رآها ،والتي تسببت في غيرة كل مهندس رآها أو عرف بها ) .
قامت ندي باستدعاء سكرتيرتها هنا التي استطاعت أن تكسب ثقة ندي وهذا في حد ذاته أمرا عظيما فأصبحت ندي لا تثق بأي شخص بعد الذي حدث معها هي وشقيقاتها، كما أن ندي تحبها وتعتبرها أختا لها !!!!
هنا :: نعم حضرتك
ندي:: حضرتك تاني ،يا بنتي هوا أنا مش قولتلك قبل كدا إنتي بالذات ممنوع تقوليلي غير ندي  .
هنا :: حاضر  .ندي :: ابعتيلي ورق مشروع ****وخلي البشمهندسه كارما  تجيبي علي المكتب... أومأت هنا رأسها علامة الإيجاب:: أي أوامر تانية يا فند***
ثم توقفت عندما رأت نظرات ندي الغاضبة فراجعت حديثها ثم قالت أي أوامر تانية يا ندي ؟؟
تبسمت ندى وقالت :: آه لو سمحتي أبقي قولي لعم علي يبعتلي القهوة بتاعتي بسرعة عشان حاسة إنو راسي هتنفجر من الصداع..
هنا :: ألف سلامه تؤمري بحاجة أعملهالك ؟؟ ندي :: تسلميلي يا قمر ،خدي بس الباب في إيدك وإنتي طالعة ،هنا:: حاضر  .ثم خرجت وتركت ندي تعمل ،وبعد قليل آتتها القهوة  والأوراق الخاصة بالمشروع....
❄❄❄❄❄❄❄❄❄❄❄❄       
عندما توجهت ولاء إلي غرفة العمليات
وعندما رأت فتاتان صغيرتان تبكيان في حضن إمرأة تبدوا عليها أنها أمهم ،تذكرت عندما كانت تبلغ من العمر أربعة عشر عاما
Flash back::
كانت هي وشقيقاتها وأباها ينتظرون أمام باب غرفة العمليات التي تقطن بها أمهم مريضة القلب بالإضافة إلي ذلك المرض الخبيث الذي احتل رأسها  ( السرطان )
كلمة يقفون أمام باب الغرفة في حالة لا يتمني أحدا أن يجربها في وضع أبكي معظم بل جميع من بالمستشفى  ..
فقد مر أكثر من ست ساعات وأمهم بالداخل،أشخاص يدخلوا وآخرين يخرجوا ،وهم لا يعلمون شئ عن ما يحدث بالداخل ...
Back
أغلقت ولاء من شرودها علي صوت صديقتها لمياء ،فلمياء ليست زميلة عمل فقط ،بل إنها صديقتها أيضا ..
لمياء :: ولاء يلا بينا عشان نشوف الحالة اللي في العمليات ومحتاجنا فيها .
فقالت ولاء بصوت شبه مسموع وبنبرة مخطلتة بالشهقات الخفيفة والدموع ،ولكنها قامت  بحبسها ورسمت ملامح الجمود علي وجهها مرة أخري  ( فقد قطعت وعدا علي نفسها أمام ربنا أنها لن تظهر ضعفها لأي مخلوق ما ) ..
ثم قالت :: يلا بينا وألقوا سويا الغرفة العمليات  ..❄❄❄❄❄❄❄  
الثقة بالنفس والقوة يعتبران عنوان شخصياتنا، وحياتنا، وحتي أفعالنا وأقوالنا .
يقولون أن البكاء ضعفا ،وعجزا ،ولا يمتلك من يبكي شخصية قوية ..
ولكن في الحقيقة هو من يجعلك تبني لنفسك قوة وشخصية وحتي مستقبلا .
هو من يقويك بعد السقوط ،وهو من يجعلك تخرج سلبياتك لتعيش حياتك 😊😊😊
❄❄❄❄❄❄❄   
انتهي الفصل الثاني من روايتي رحلة وجع  .
توقعاتكوا إيه اللي هيحصل في الفصل الجاي
ومين هوا المجهول ده وإيه هيا الحقيقة .
❤❤ بقلمي يارا عصام❤❤