طرف تالت

الفصل الرابع

الحلقة الرابعة :

في صباح اليوم التالي ..
استيقظت رغد ببعض الخمول من نومها وهي لا تزال مشغولة البال بقرارها الذي تعلم تمام العلم أنه لن يمضي على خير .
أخذت شهيقًا عميقًا أخرجته ببطء ومن ثم تحركت إلى دورة المياه منهية طقوسها الصباحية ومن ثم هاتفت زوجها الذي أيقظها باكرًا عن العادة مخبرًا إياها أنه وُجب عليه الذهاب للشركة لأجل أمر طارئ .

اطمأنت عليه وعلى عدم عودته باكرًا ثم ارتدت ثيابها سريعًا وأخذت حقيبتها وهاتفها وغادرت إلى وجهتها التي ظنت أنها ستكون حلًا لمشكلات واهية بحياتها .. لم تكن تعلم أنها بداية المشكلات الحقيقة .

-----*-----*-----

أعلن هاتفها عن اتصال لتجيب سريعًا حينما علمت بهوية المتصل :
رغوووده ازيك يا جميل؟
رغد :
صباح الخير يا فوفا .. ازيك يا حبيبتي وازي ماما وطنط دلوقتي؟

رهف :
الحمد لله .. كلنا بخير .. انتي عامله اي ... ومال صوتك كده؟

رغد :
مفيش يا قمر أنا بس لسه مخلصه شغل البيت وكده .. بقولك البت مي بتصل بيها مبتردش .. في حاجه ولا هي نايمة ولا اي؟

رهف :
مش عارفة والله يا رغد .. انا في الطريق لسه مروحه اهو .. بس هتلاقيها زي عادتها عملاه صامت .

رغد :
طب ماشي مفيش مشكلة .. المهم كلميها إني عيزاها ضروري .. واجهزي كده عشان طالعين رحلة اخر الأسبوع .

رهف بعدم تصديق :
احلفي!!

ضحكت رغد عليها وهي تتابع :
اه والله .. كلنا محتاجين نغير جو .. مي بعد اللي حصل ده .. وانا من شغل البيت .. واحمد من ضغط الشغل .. وأنتى وهاجر من ضغط المذاكرة ..
تنهدت وهي تتابع بمكر :
ومحمد من التعب اللي هو فيه .

رهف بتساؤل قلق :
مـ محمد مين؟

رغد بخبث :
محمد أخو أحمد .. بقالوا فترة كده بيسرح كتير اوي .. وساكت كده مش مرح زي الاول .. زي ما يكون فيه تغيير في حياته باين .. المهم متنسيش بقا تقولي لمى إني عيزاها ضروري .. وانا لو أحمد جه بدري شوية النهاردة هنيجي .

رهف بفرحة ولكن بقلق في نفس الوقت :
ماشي حاضر .. يلا سلام .

أنهت الاتصال وهي في غاية الفرحة لأنه سيشاركهم هذه الرحلة وستتمكن من رؤيته مرة أخرى وأخيرًا .. ولكن ماذا تقصد رغد بجملتها " زي ما يكون فيه تغيير في حياته"؟؟ 

نفضت الأفكار سريعًا عن رأسها وهي تأخذ شهيقًا طويلًا أخرجته على مهل وهي تهدئ من نفسها بخبر الرحلة .

وأخيرًا وصلت إلى منزلها لتفتح لها مي الباب .. وقبل أي شئ انفجرت رهف بها :
يا شيخه بطلي أم العادة الزفت اللي فيكي دي وافتحي أم صامت فونك يا شيخه .

مي :
ايييه يا بت قطر ملوش سواق اتهدي في اي ماله الزفت ما تتصلي بماما يوه .

رهف :
رغد عيزاكي ضروري يا ختي .. في رحلة في آخر الأسبوع .. والنبي يا مي تخلي ماما مترفضش .. عايزه اروح معاهم .