طرف تالت

الفصل التاسع

الفصل التاسع :

تحركت رهف إلى غرفتها من جديد بعدما أخبرت محمد أنها لا تمتلك أي أسئلة تود سؤاله عنها وأنها ستخبره بقرارها قريبًا ..

جلست إلى فراشها لا تدري ما بها .. كانت تتحرك في الغرفة ذهابا وإيابا ..إلى أن طرقت والدتها غرفتها ..

حنان :
رهف يا بنتي مالك دي سابع مرة أدخل ألاقيكي كده .. رايحة جاية رايحة جاية .

رهف :
أبدًا يا ماما أنا كويسة بس قلقانة شوية .

حنان :
عشان محمد صح .

رهف بخجل :
ها لا أبدًا .

حنان:
بصي يا رهف خدي وقتك .. وقرارك ده اللي هتحدديه ..ومحدش هيعترض على قرارك .. ومحمد شخص كويس ومحترم وأخلاقه عالية .. والدليل إنه لما كان بيشوفك مكنش منفتح أوي في الكلام معاكي .. وانتي عارفة .. والرسول صلى الله عليه وسلم ترك لبناته رأيهم ..وقرارهم ..وأنا مش بقول كده عشان عرفاه .. لا عشان أنا شايفه إنه كويس وأخلاقه كويسة ... والرسول صلى الله عليه وسلم قال " إن أتاكم من ترضونه دينًا وخلقًا فزوجوه "

تابعت بهدوء وهي تتمتم :
صلي يا حبيبتي إستخارة وقربي من ربنا عشان ينور بصيرتك .
واتمنى تكوني فهمتي يا رهف إن قرارك ده هو مصيرك  ومستقبلك .. ومتقلقيش إن شاء الله خير .

أرادت أن تقلل من حدة توتر ابنتها فتابعت :
بطلي بقا ترزعي روحة وجية .. مش كده يا ماما البيت هيقع .

ضحكت رهف بخفة قبل أن تبتسم بحب لوالدتها وهي تتمتم :
ماما انا بجد بحبك أوي .. أنا فخورة إن عندي أم زيك .. أنا مش عارفة أقولك إيه بجد أنا هعيط .. أنا هصلي صلاة استخارة وأقولك قراري إن شاء الله .. وبجد شكرا أوي يا أحلى أم في الدنيا .. ومش هروح واجي .. هقعد في مكاني أي خدمة .

حنان بابتسامة :
شكرا إيه يا هبلة .. بتقولي شكرا على إيه .

رهف :
ربنا يديمك ليا يا أحلى أم في الدنيا .. بجد أنا مبسوطة عشان أنا مكنتش عارفة أفكر .

تنهدت براحة ومن ثم نظرت لوالدتها وهي تتابع :
ما تيجي نعمل أي حاجة ناكلها بعد الكلام الحلو ده .

حنان بضحكة :
أكل ماشي هعملك أكلتك المفضلة .. يلا .

رهف :
يا جامد أيوه بقا يا حنون .

حنان :
يا جامد !! .. يارب ارحمني .

-----*-----*----------*-----*-----

دلفت إلى غرفتها بعدما ودعت ضيوفها ، كانت تظن أنها ستبقى سعيدة عندما تراه أمامها ، لكن خُيِّب ظنها عندما رأت كم الحب الذي أظهره جليًا لرغد في هذه المقابلة التي لم تتعدى الساعتين ، فهو يظهر حُبه لها أمام أي شخص كان ... عينيه دائمًا تضخ حُبـًا لها ... تُرى ما السبب ؟! هل رغد تفعل معه أشياء يجعله يُحِبُّها بهذا الشكل ؟! أم أن هذه شخصيته ! ورغد مجرد زوجة لا أكثر .. ولكن كيف وهي تراه يغازلها بين الفنية والأخرى كلما جلست معهما في مكان واحد .. كما أنه دائمًا يمسك بيدها ولا يتركها وإلى الآن لا تعلم ما السر وراء ذلك ؟!