SCS (Salaksa Carita Sunda)

Susuk

Salaksa Carita

Susuk

Babaturan Neni biasa-biasa baè ngan bisa ngahaleuang. Kitu tèa ari nu sok ngahaleuang mah bisaan mupu duit mun keur ngumpul jeung babaturan tèh. Lalaki sor-sor baè ni siga teu lebareun.

"Boa Neni mah makè susuk nya. Da ni pèdè sakitu naon geulisna èta Neni?" Ceuk Ratna.
"Hih...tong ngaliarkeun taleus ateul."
"Lain ieu mah berbicara fakta."
"Fakta naon? Susukna baè boa ukur dongèng."
"Bener aya. Sihir mah aya ti baheulana ge."
"Mun nu percaya."
"Nu teu percaya gè, bisa baè kabobodo ku susuk. Misalna lalaki jol resep baè ka awèwè nu make susuk tèa. Pan teu apaleun èta awewe makè susuk nepi ka lalaki èta kabungbulengan."
"Tempona, mun jajan satè. Moal ngadahar langsung tina tusukna."
Kitu wè patèmbalan Ratna jeung babaturanna patèmbalan.

Kabeneran aya babaturan nu syukuran ngajak nyate di Kulur. Wah kabeneran. Teu badami deui, bet tinglalieuk wè siga nu dikomando nalingakeun Neni dahar jeung satè. Dilaanan heula. Nyaan nepi ka rèk bèak tah satè sapiring.

"Nen, teu ari ni diturun-turunkeun heula èta daging satè. Kawas nu makè susuk baè." Ceuk Tita.
Rareuwaseun. Ngagarebeg. "Tita mah teu apaleun kumaha Neni." Ratna ngaharèwos ka Yati. Ting lalieuk wè. Tita nu syukuran tèh, ngahaja jauh-jauh gè ti kota ngajugjug ka lembur da cenah meunang panggentian tanah nu kapakè ku jalan tol.

"Lalieuk ka dieu." Ceuk Neni. Durudud tèh satè digègèl dibetot. Ngan sarèrèa ngejat. Horèng aya nu bareng copot. Geuning Neni geus tawèhwoh. Makè huntu palsu mèh kabèh.

Ger wè saleuseurian.
"Yeuh. Uing mah lain teu ngadèngè tingkuciwes ngaromongkeun tèh. Tapi uing mah pèdè baè. Sok mènta sawèran pèdè baè. Rèk marènta mah pèk baè tarurutan."

Caricing baè. Ngan Tita nu wani ngomong.
"Geus Nen."
"Nyalah. Da teu nyeri hatè. Deuk naon ka gering-gering. Nu penting nyaraho yèn uing mah geus ompong. Geuslah buru ayeuna mah gancang geura mèrè ampow nu geus nèmpo huntu uing lèsot."

Bener ogè. Tong asal ari nyangka-nyangka tèh. Nu nyangka gorèng ka batur can tangtu leuwih alus ti nu disangkana.

#edisijajansatesindangkasih#