Pa Jumad can lila ditinggalkeun ku pamajikanna. Biasana teu apal kitu kieu tetek bengek urusan dapur jeung budak. Estu sagala gè urusan imah jeung budak mah urusan Siti.
Isuk-isuk sarapan geus siap ti jam genep kurang saparapat. Hampir angger kitu. Terus sarapan ngariung. Jam genep teh geus siap-siap marake sapatu. Nyiapkeun kantong. Tara mertelakeun kumaha Siti bisa memeh jam genep siap. Ayeuna sataker kebek ngurus budak tilu kelas genep , kelas tilu jeung TK. Pa Jumad asa ripuh lain dikieuna.
Keur aya Siti, tampi beresih wè urusan dapur jeung budak mah teu apal kumaha carana Siti bisa kaburu ka ditu ka dieu jeung budak kaurus. Cacakan sarua deuih. Siti guru SD, Pa Jumad di SMA. Dilenyepan mah ripuh kènèh di SD. Teu aya kosong-kosong acan. Unggal poè kangaranan ngajar di SD mah teu aya perèna. Rada ngarènghap tèh mun bagèan pelajaran agama atawa olah raga.
Ayeuna Pa Jumad keur ngahuleng, tadi tèh ditelepon ku guru TK cenah nu sèjèn geus dipapageun kari Gilang wè can aya nu mapageun. Deregdeg wè ngahonjèwat heula ka TK. Ari geus nepi ka TK, Gilang geus nyèngclè na motorna, bet konci motor tinggaleun. Untung wè aya kènèh Ibu guru TK nu tadi nungguan Gilang. Rumpa-rampa kana saku, horèng handphone gè teu kabawa.
Katohyan siga nu bingung, penjaga TK Mang Didi nyampeurkeun.
"Kunaon Pa?"
"Numawi konci motor kakantun."
Tah geuning aya untungna motor heubeul mah kudu nogèl baè koncina. Ari ieu? Koncina tadi tèh dikana saku jakètkeun. Sabab hareudang, lumpat deui ka kantor jèkèt disampaykeun na korsi. Puguh wè handphone gè na saku jèkèt. Rēk nelepon babaturan gè teu bisa.
"Teu tiasa dihirupan atuh." Ceuk Mang Didi.
Tungtungna Gilang dititipkeun heula, ka sakola deui kana motor Mang Didi heula. Rusuh tèh kitu.
KAMU SEDANG MEMBACA
SCS (Salaksa Carita Sunda)
Short StoryKumpulan cerita fiksi mini Bahasa Sunda. Gado-gado beraneka ragam. Kalau ga baca rugi ...hè maaf. Paling tidak, coba dèh baca. Bahasa Sunda itu seru. Hi hi hi....itu kata aku sih orang Sunda.
