Mopokan balong nu bocor asa hayoh baè. Bocor deui. Bocor deui. Aya nu ngabèjaan ku injuk. Daripada lila ngala injuk, deregdeg wè ka tukang sapu nu di pèngkolan jalan ka situ. Asa sok ngagarunduk injuk di bèh dinya.
Ngahaja teu kana motor da sieun narojos mawana. Pupuntenan tèh teu jol-jol, nepi ka aya nu jol deui sarua nu butuh ka dinya. Èta mah cenah pesen sasaungan keur gazebo. Kutan?
"Kumaha pesen saung?" Teu ngarti atuda panasaran.
"Hayu mudun baè urang sauran." Ceuk bapa-bapa jeung ibu-ibu nu pesen saung. Kuring nuturkeun. Brèh tèh horèng bener aya saung-saung keur gazèbo lalucu. Luhurna makè injuk rapih. Lolobana mah sapu injuk ngagarunduk rapih, da puguh utamana mah nyieunan sapu.
"Badè peryogi naon?"
"Injuk. Kanggo mopokan balong."
"Oh, itu nu di luhur di payun tadi."
Torojol nu dagangna. Gebeg tèh bet asa wawuh. Horèng babaturan sakola baheula.
"Endah?"Nu dagang miheulaan nanya.
"Hèy...Ratna nya?"
Pagabrug-gabrug. Teu sangka nasib jalma. Ratna tèh putra nu sok buburuh nyeuseuh di lembur. Bi Katmah asana mah namina tèh. Ayeuna mabrik sapu gedèan ieu mah. Da dikirim ka mana-mana.
Lawas jarang ka lembur aya kana dua puluh dalapan taunna. Pareng ka lembur ukur nèang ema jeung bapa sabulan sakali. Ayeuna ema kari sorangan rada mindeng ka lembur tèh. Horèng rèa pisan nu robah. Lain ukur beungeut lembur. Pangeusina gè. Bener nasib jalma mah ibarat roda. Ayeuna urang keur di luhur atawa di handap, anging Alloh nu uninga.
Alhamdulillaah injuk meunang. Sapu dibahanan. Nuhun Ratna.
KAMU SEDANG MEMBACA
SCS (Salaksa Carita Sunda)
Short StoryKumpulan cerita fiksi mini Bahasa Sunda. Gado-gado beraneka ragam. Kalau ga baca rugi ...hè maaf. Paling tidak, coba dèh baca. Bahasa Sunda itu seru. Hi hi hi....itu kata aku sih orang Sunda.
