SCS (Salaksa Carita Sunda)

Kamerdekaan

Sakapeung Dana sok ngarahuh, mun kahayangna teu kacumponan. Nungtut pamajikan nu dipilihna kudu saluyu jeung kahayangna.

Naha atuh balik gawè tèh imah masih balatak? Barudak tèh teu eureun-eureun ngabalatakkeun naon ku hanteu. Naha atuh pamajikan tèh kucel? Babakuna mah hirup geus ngarasa jeneng, luak lieuk rèa nu leuwih alus. Geus poho naon sababna baheula nyaah ka jikan.

Aya èta gè sawaktu-waktu imah rapih beresih, barudak balageur teu paciweuh teuing sagala diobrolkeun.

Deuh...remenna mah barudak tèh ni pahibut baè, nu PR, nu tugas, nu can bisa maca, nu curhat di sakola tadi dipanggil guru BK da gelut.

"Duh ni rupa-rupa baè lieur. Pamajikan tèh teu bisa pisan ngurus anak,"  kitu ceuk pikirna.

Dana ngaheruk tungkul sanggeus pamajikanna  tisorodot ngageledag di cai tos nyeuseuh. Kacapèan ceuk dokter mah. Dana lila teu balik da pusing ku sagala rupa masalah ngurus budak di imah. Mèh tara mikiran baju budak, bayaran sakola budak, jajan budak, pangabutuh budak, cukup jlo gajih, makarep kumaha jikan kudu cukup, kudu mahi. Kumaha deui da sakitu beubeunangan?

Mun meunang duit lembur atawa tambahan mah keur pangabutuh sejen di luar imah....Keur kahayang sèjèn...pikeun ngaleungitkeun kapusing. Refreshing jeung nu mikanyaah di luar. Nu teu pusing mikiran tètèk bengèk urusan imah. Ah, tungtungna mah makarep teuing anak jikan mah, sina neangan bekel keur hirupna da pusing. Merdeka!

Sugan tèh kamerdèkaan tèh kitu. Ayeuna jikan nu remen ditunjuk-tunjuk irung teu bener, geus taya dikieuna.

"Anak tèh titipan Alloh, titipan ti nu masihan hirup jeung kahirupan." Asa ngajelengèng kènèh sasauran kiai nu tadi jadi imam sholat basa nyolatkeun jikanna di masjid.

Dana geus ngalalaworakeun barudakna.  Nurutkeun hawa nafsuna milih ngurus anak awèwè nu ceuk pikirna nengtremkeun batinna. Cul dog dog tinggal igel.

Barudakna lima ngajajar ngariung layon indungna. Nu bungsu mah boa inget boa henteu kumaha rupa Dana nu jadi bapana. Siga teu ngalieuk-lieuk acan. Geus sawawa. Komo tilu budakna nu geus rumah tangga mah geus narungtun budakna. Incu-incuna mah geus jelas teu apal mana akina.

Kersaning Alloh barudakna katingal soleh balageur akur tur bagja. Dana mèh teu apal kumaha barudak ngerjakeun PR, kumaha barudak diajar ngaji, kumaha mangkak rumajana. Kumaha deui da ripuh baè nèangan awèwè nu luyu jeung kahayangna. Ripuh baè mikiran kakurangan pamajikan. Ngudag kamerdekaan diri. Ngudag kasenangan diri. Barudak mah ke ge ideng sorangan. Kitu ceuk pikirna.

Barudak SD kènèh, indungna geus dipres ku rupa-rupa kalakuan Dana nu jadi bapana nu ngudag kamerdekaan diri. Leuwih sapuluh taun cukup keur barudakna  ngilo kahirupan ku kapeurihan hatè nu jadi indung.

Rèngsè ngurebkeun indungna, barudak nu can rumah tangga nuturkeun lanceuk-lanceukna. Mèh teu inget ka Dana nu jadi bapana. Kitu deui incu-incuna. Kutan? Persis saperti Dana hilaf teu inget kasusah barudakna, teu paduli pangabutuhna.

Dana geus tawèhwoh, leumpang rumanggieung, sakapeung kudu aya keur muntang. Awèwè nu diandelkeun bisa nyumponan kamerdèkaan geus ninggalkeun Dana milih hirup jeung lalaki nu leuwih beunghar. Anak-anak sampeuran nu diurusna geus teu ngalieuk kana kaayaan Dana.

Hirup merdeka nu diudagna ibarat kalangkang nu teu kaudag.

"Pa, dupi ieu Pa Dana rama abdi?", gebeg Dana ngagebeg tembus nepi ka hatè nu pangjerona. Si bungsu nu balik deui tina mobil lanceukna dituturkeun ku opat lanceukna.

Clak cimata Dana nu baheula remen ngarahuh ngurus barudak nu ngabalatakeun baè imah. Nu remen careurik, pahibut parebut kaulinan. Nu ceuk indungna mah, mangsa-mangsa èndah ngurus budak. Nu galedè ku kayakinan indungna ka Alloh nu ngaping ngajaring makhluk-Na.

Nyel seueul angenna. Kaduhung teu manggih tungtung. Horèng sajatining asih aya dina diri nu ngalir getihna, teu bisa dipaling asih.

Barudakna munjungan, teu sangka, barudak nu baheula ceuk Dana hèsè diatur, kiwari jaradi jalma nu sarolèh.

Lima poè ti harita, Dana asup rumah sakit. Struk. Barudakna ngariung. Tapi Dana teu kuat.

Kitu kahirupan di dunya. Katungkul ku pati. Di akherat, bakal metik pepelakan ayeuna di dunya. Melak boled panen boled. Melak buah panen buah.

Cag!