Lah ku sok resep ibu-ibu mah ngerumpi tèh. Hantem wè guntreng ngobrolkeun kudung, sendal, piring, mik ap, sagala diobrolkeun. Teu anggeus-anggeus, sok aya wè poko bahasanna tèh.
Sok geura tèang, tuh ayeuna geus mulai dariuk di warung Ceu Opi. Kituna mah da kesel nungguan budak balik sakola. Deuk naon deui ari geus bèrès mah di imah. Mèh angger jam salapan nepi jam sabelas kumpul. Mun nu sakola mah minangka istirahatna.
"Kamari mah mahasiswa nu ngontrak di Ma Icih tèh nawaran bolu kukus. Ngaraosan heula, pokna tèh. Rajin budak tèh dagang bolu kukus di kampusna tèh." Ceu Titing ngamimitian.
"Kituna mah budak tèh daèkan. Bisaan deui."
"Raos?"
"Empuk puguh gè. Gulana asli. Mantaplah
sakitu mah."
"Mekel sagala sigana ngontrak tèh èta mah nya. Teu kawas mahasiswa sejenna."
"Geuslah makarep teuing nu kituna mah. Lain urusan urang."
"Enya ih sok kèpo pisan ibu-ibu mah."
"Tah, bolu kukusna nu coklat èta."
"Nunda di dieu?"
"Ti mana wè, nu penting mah aya untungna. Lumayan saeutik-saeutik gè." Tembal Ceu Opi tukang warung.
Bep. Caricing. Siga nu malikir. Salila ieu ukur galuntreng wè ngariung di warung Ceu Opi.
"Urang gè bisa nyieun bolu kukus mah."
Gorolang nerangkeun resèp jeung cara nyieunna. Jadi ramè ngobrolkeun resèp kuè-kuè basah. Terus pindah kana cistik. Raginang. Rongè-rongè. Parat nepi ka jam sabelas. Baralik.
Isukna Ceu Titing mah jam salapan tèh can jol ngariung satatangga saperti biasa. Torojol tèh jam sapuluh.
"Tah sampel." Cenah bari nunda sabungkus roñgè-rongè hareupeun ibu-ibu.
"Ceu Opi, nitiplah ieu dagangan. Sapeupeuting mikir. Naha nya teu nurutan Neng Meti, neangan saeutik gè keur nambahan jajan budak. Ngacakanlah sugan payu."
Duka gebrag baralak, duka memang da saenyana mèmang barutuh ku duit. Lah ari ku duit mah barutuh baè. Ngan ti harita, nu sok ngarariung di warung Ceu Opi jadi nyarieun dahareun. Ditaritipkeun di warung. Malah aya nu ka warung sakola sagala. Guntreng ngobrolna teh pindah tos asar. Tara lila ayeuna mah. Raripuh sigana tèh.
Neng Meti nu ngaideuan ibu-ibu, bejana tèh geus tamat kuliahna. Buka catering. Kayungyun.
KAMU SEDANG MEMBACA
SCS (Salaksa Carita Sunda)
Short StoryKumpulan cerita fiksi mini Bahasa Sunda. Gado-gado beraneka ragam. Kalau ga baca rugi ...hè maaf. Paling tidak, coba dèh baca. Bahasa Sunda itu seru. Hi hi hi....itu kata aku sih orang Sunda.
