Saur Ustad Yahya, sholat, ngaji, wirid, hakèkatna mah keur kaperluan diri sorangan. Dongèngna tèh Nabi Musa ditaros ku Alloh, "Mana ibadah keur Kaula?", nyatana muji Alloh keur katenangan manusa. Ibadah nu dipikaresep ku Alloh, nyaeta ibadah sodakoh. Nulungan jalma nu keur susah, ngabungahkeun jalma nu keur lara.
Gusti! Ngabungahkeun nu lara, saèstuna ibadah nu dipikaresep ku Alloh.
Astagfirulloh, kamari kuring reuwas, sabab gara-gara ngaplod cilok nu ngamanfaatkeun sangu sesa supaya teu kapiceun, aya nu ngidam urang jauh nepi ka nangis-nangis kabita. Dosa milaraan batur.
Sabab kitu, poè ieu tadi isuk-isuk cilok dititipkeun kana travel keur Bu Mira nu kabita tèa. Mugi-mugi Alloh ngahampura dosa milaraan batur. Mugi- mugi ngirim cilok kaasup ibadah ngabungahkeun jalma nu susah sanajan kasusahna ukur panasaran ku cilok nu bahan dasarna sangu, aci, tarigu, dituangna ku bungbu suuk asem sareng kurupuk bantat. Emmm memang yammi.... Kudu ati-ati kahareupna mah mun ngaplod dahareun tèh.
Tos ngirim cilok mah, ngemplong asana tèh. Mugi-mugi wè kalandep.
"Mulih Bu?", Neng Sri ngahudang lamunan kuring nu keur ngacacang ka mana mendi.
"Muhun Neng, bade ka mana?"
Kuring muka pageur dianteur unggeuk Neng Sri nu ngaleos ka warung Ma Iroh.
Nepi ka lawang panto aya karung beas, di handapna aya surat sacewir. "Ngaraosan beas anyar sakedik, Een." kitu unina. Een babaturan sakola nu anyar panggih deui basa rèuni bulan kamari. Ya Alloh, rejeki ti Anjeun jolna ti mana bae, Anjeun nu Kawasa. Alhamdulillaah Gusti, Ieu beas sakarung. Karungna badag deui. Alloh nu Maha Uninga, naha ieu aya patalina jeung cilok?
Dawuhan Alloh, "Man jaa a bil hasanati falahu 'asyru amtsalihaa" (Q.S. Al An'am : 160).
Wa Allohu 'alam.
KAMU SEDANG MEMBACA
SCS (Salaksa Carita Sunda)
Short StoryKumpulan cerita fiksi mini Bahasa Sunda. Gado-gado beraneka ragam. Kalau ga baca rugi ...hè maaf. Paling tidak, coba dèh baca. Bahasa Sunda itu seru. Hi hi hi....itu kata aku sih orang Sunda.
