روايه سعوديه " أنا أحببتكَ أولاً "

بارت ٣

هديل: لا ابقي و سمر تنقل بدلك مساعده معاه هي تعرف تصرف
سمر: لا لا خلوني بمكاني ما ابي خلاص هذا ان كان ما دقت الباب سوى كذا اجل انا لو قلت له حبيتك اكيد راح يفصلني
ومن هنا تركي حط خط احمر بينه وبين الدكتورات و الممرضات ويتعامل برسميه جافه
. .
جاء الظهر وقت الغدأ
عند سهى واهلها
سهى كانت جالسه معاهم على الغدأ وسرحانه ومشتاقه له يومين ما شافته متعوده كل يوم تصبح وتمسي ع صورة وتابع  كل شي ينشره بالبرامج وترد وتعلق
صحت من سرحانها على نقاش اهلها و طاري اعمامها
وسمعت خواتها رافضين يروحوا
وتسألت: و ين بنروح
ابو سهى: اخوي محمد مسوي عشاء عشان تركي ولده
توظف دكتور بأحدى مستشفات بالرياض
سهى بفرحه واضحه عشان تركي مع ابتسامه شاقه الوجه وصفقه حارة : صدق والله
ثم انتبهت لنفسها ولامها الي تخزها بعد ما اكلت منها علقه الصباح بخصوص هالموضوع وقالت : واخيرآ راح نطلع مكان نغير جو ي سلاااام
نظروا لها خواتها بستغراب وقالت سهام: وين نغير جو وهم اساس ما يعطونا وجه ولا يناظروا فينا
سحر: انا مو رايحه حتى لبس زين ما عندي
سهى: ابوي عطنا قروش خل نروح نشتري فساتين وكذا
ابو سهى: ماعندي و ألبسوا من الموجود عندكم
وبكرة ساعه 5 العصر تكونوا جاهزين
تاففوا البنات من هالحال
تكلمت سهى وهي متحمسه ترسل وتبارك لتركي : طيب ماعليه امر الفساتين ان شاءالله محلول بس اعطيني جوالي احتاجه ضروري
ابو سهى ناظر ام سهى الي دنقت براسها حتى لا تفهم سهى انا امها من طلبت من ابوها ياخذ الجوال منها قال: تمام بس ما تقعدي عليه اربع و عشرين ساعه، عايشه مع ذا الجوال اكثر من عيشتك معنا
سهى وقفت بفرحه : ابشر على عيني
طلع ابو سهى مفتاح : هاك هذا مفتاح دولابي الحديد افتحيه واخذيه
ركضت سهى بفرحه لغرفة امها وابوها وفتحت الدوالاب بعجله وصربعه من لهفه وشوق واخذت الجوال وباسته وضمت جوال لصدرها كأنها تضم حبها المخفي داخله
وركضت لغرفتهم و شغلته وهي ملخبطه من وين تبدأ
تتصرف وكأنها تعيش قصة حب متبادله مع طرف الأخر
توقفت لدقائق وهي تتامل صورته وتضع يدها على قلبها
لتهدي نبضاته الشوق عظيم عظيم جدآ
.
.
.
.
عند تركي الساعه 3عصرآ
بدأ يلم اغراضه من المكتب ليغادر للمنزل فقد انتهى عمله اليوم ولقد مضى الوقت سريعآ مع مراجعين ومرضى
وطلع من مكتب وهو يبتسم ع جنب وهو يرى الممرضات يتجنبوا طريقه و النظر إليه.
شعر براحه هذا ما يريده لا يريد مضايقات ولا معجبات فقد مرت عليه هذه الامور من قبل واصبح يمل من الفتيات اللاتي يرمين نفسهم عليهم ويحاولوا جذب انتباهه .
وصل لسيارته و ركب و رمى كل شي من جوالات و محفظه و اوراق على كرسي الذي بجانبه و حرك سيارة.. لكن بعد دقائق وهو مندمج بالأستماع لاحدى الاغنيات براديوا انتبه للأشعارات المتواصله التي داهمت جواله بلا توقف حتى ظن انه سوف ينفجر جواله منها ماهذا الازعاج و الجنون الذي يمتلكه المرسل توقف عند الاشارة واخذ جواله ونظر للاشعارات انه هي النشبه ابتسم ع جنب تعب وهو يحظرها ثم تظهر بحساب جديد اخر في كل مره وينتظر متى تطفش و تتركه لكن مازلت مستمرة بدأ يفتح رسائل بشكل عشوائي دون اهتمام حتى تتوقف لانه يعلم لا تتوقف الا عندما ترا علامه تم القراءة.
.
عند سهى
شعرت بالفرح اخيرآ اشعبت شوقي له
اه لو يرد عليه بكلمة بس لو فيس عادي مقبول
لمتى ما يحس متى يلين قلبه
لكن ما عليه لابد في يوم تصير لي
اخواتي دايم يضحكوا على تفكيري
برائيهم تركي مستحيل يتربط فيني بيوم
مافيه اي توافق بينا لا اجتماعي
ولا اقتصادي ولا تعليمي حتى!
لكن انا مقتنعه ان الحب اجمل وارقى واسمى
من كل هالخرابيط والفوارق
ولو قدرت اوصل لقلبه واعلقه فيني راح
يتزوجني واكون اسعد انسانه بالدنيا
المهم فرحانه اني بحضر عزيمه تخصه
هاذي اول مرة من سنين يكون موجود
رجع السنه الي فاتت من الخارج بعد ما كمل دراسه
علموا اهله له حفل بمناسبة تخرجه و رجوعه بالسلامه
واحنا ما رحنا لأن ابوي كان تعبان
لكن هالمره لابد بنروح و راح اشوفه ع طبيعه
ابتسمت لا شعوري ع خيالي
تكلمت سهام بتريقه: سكنهم مساكنهم
تكلمت بفرح: ما تدري شكثر فرحانه اخيرآ باكون بنفس المكان الي هو فيه
سهام: احس ان انتي عايشه اكبر مقلب بحياتك
رديت بضجر: روحي زين
سهام: يكفيك اخته والمسخرة الي تجينا منها ولا امه وشوفة نفسها ولا جدتهم المتسلطه
جد كل اما تذكر اهله احس مستحيل اخذ تركي لكن عمي محمد ابو تركي طيب و يحبنا واحسه فيه أمل: تعرفي هذولاء كلهم ما يهموني المهم هو تركي
سهام: طيب ي مجنونة تركي وش ناويه تلبسين
سهى وتذكرت شي ونطيت مع السرير ودنقت لتحت
وطلعت صندوق بني و فتحته وبديت اعد الفلوس الي فيه والي جمعتها من تدريس عيال الحارة وكانت500
سهام جات لي لعندي: ماشاءالله كم معاك
رفعت يدي وانا العب بقروش500
سهام بخيبة امل : هذا بس الي طلع معك
سهى : لا تتكبرين ع نعمه والبركه في القليل ترا ذي الفلوس جمعتها ع اساس اكمل عليها وابيع الجوالي المنتهي و اشتري جوال جديد
سهام: هذا الي فالحه فيه تدرسي العيال و تجمعي فلوس عشان تشتري جوالات.. وبعدين ما قلت شي بس جد 500 وش تجيب
سهى: مستقبلآ راح اترقى عن جوالات و اشتري لابتوب عشان اتعلم التصميم المهم بروح اكلم ابوي يودينا السوق وهناك نشوف وش تجيب ال500
سهام رجعت لسريرها: ما لنا غير اسواق التخفيضات
سهى ما عبرتها اهم شي تلبس شي جديد ما يهمها
كم سعره ولا من اي سوق وطلعت تكلم ابوها يوديهم
.
.
وفي وسط العاصمه
حل المساء و اجتمعت عائلة تركي وهي ترتب امر العشى الذي سوف يقام بالغد
تركي يشرب قهوتة بهدؤ ويسمع لحوار ابيه و امه و جدته
لينتبه لأنفعال جدته : وش بلاك ما تفهم انت! ما ابي اشوفه هالوجيهه الودره لا منصور و لا زوجته ولا بناته
ابو تركي: يمه منصور بالاول والاخير اخونا مايجوز تمنعينا عنه!! كافي عليه ابوي الله يرحمه والي سواه فيه
الجده بأنفعال: ابوك ما سوى شي ماغير ولد سلوى راعي العلوم الشينه هو الي بافعاله ما خلا له تقدير
ابو تركي: بس ما يجوز يمه ابوي حرمه من الورث وانتي بتحرميه منا وهو ماله غيرنا
الجده: الورث انا مالي رائي فيه ابوك بعد ما هربت سلوى بولدها منصور انحرق قلبه ويوم كبر الولد وقلنا يصلح الي سوته امه راح وتزوج من قبيلة الناصر وهو يعرف انه ابوك على خلاف معهم ولا اخذ بشور ولا رضى ابوك! سلوى و ولدها قهروا ابوك وقهر الرجال يستعاذ منه حتى حلف يحرمهم من الورث و و زوع قروشه والارضي قبل موته عليكم، و انا من بعده حلفت مالهم مكان بينا، وانت تجي و تعزمه في كل مره حتى يشاركنا المكان واللقمه
ابو تركي: ي يمه هذا ماضي و راح ومنصور والله حالته حاله ومتبهذل بحياته لكن صابر وراضي ولا عمره جاء وطلب احد منا شي لا تخلينا نصير احنا وزمن عليه
الجده بحزم: قلت لا تعزمهم ولا انا موب رايحه معكم
تدخل تركي: جدتي انتي الاهم وشلون بفرح بدون وجودك ي الغاليه والتفت لابوه: ابوي اذا كنت منحرج منه تكلمه وتعتذر خلاص انا اكلمه و اصرفه واقوله اجلنا العزيمه ليوم ثاني وبعدين هو باطراف رياض ولا راح يدري وش صار وش ماصار عندنا
ريهام بدلع: اي والله بابا ما نبيهم مو من مستوانا و يفشلوووون ما يعرفوا بالكشخه شي وبصراحه صرنا نخاف على اغراضنا منهم لا يسرقونها
ابو تركي بعصبيه: بنننننت
بلعت ريهام ريقها بخوف وطلعت لغرفتها
ام تركي بمحاوله للاقناع: ي ابو تركي اساسآ وجودهم ماله لزمه وعلاقتهم سطحيه بالكل
سكتهم ابو تركي بحزم : اقطعوا الكلام وانا عزمتهم و خلاصفي اليوم الثاني
.
سهى
الأستعداد كان على قدم وساق
و حضروا ناس كثير  و من وصلنا وانا مذهوله من التنظيم والمكان كيف يجنن وتنسيق مرررره كان فوق الوصف
يستحق حبيبي هذا كله تمنيت تلعب الصدف اليوم دورها و نلتقي لو بالغلط
ناظرت شكلي بمراية عند المدخل كنت حلوه بشعري الاسود الناعم الطويل و بالفستان الموف الفاتح الهادي و كان الجزء العلوي من دانتيل الماسك على الجسم بطريقه مرتبه وبدون اكمام و من عند الخصر يبدأ بالاتساع لنصف الساق واخترت معه كعب عالي ابيض اما المكياج مو متكلفه بس بمسكارا و بلاشر و روج وردي هادي
يمكن اكون بسيطه جدآ لكن انا من داخلي احس بثقه بنفسي رغم نظرات الاستحقار من بنات اعمامنا
كنا واقفين في الحديقه حتى جات وحدة من العاملات
تقول لنا ندخل لداخل لان الرجال راح ينقلوا بعض الاغراض لجوه دخلنا كلنا لكن لحظه انا نسيت جوالي على الطاولة
ورجعت مسرعه اخذه قبل دخولهم لكن صار الي حرق قلبببي وطير عقلي!! شفت تركي و ياريتني ما شفته تمنيت الصدف تجمعه فيني بس صار العكس جمعته بغيري
تركي كان بيخرج مسرع من البوابه لكن طلعت في وجهه بنت
و صدم فيها بقوه حتى البنت كان بتطيح و ياريتها طاحت وتكسرت عظامها لكن مجرد ما مالت مسكها الاخ بسرعه!! لا كذا كثير حسيت بنار في صدري وانفاسي تتسارع وخاصه البنت كاشفه لوجهها واجمل مني والادهى من ذا ان تركي يعرفها لانه يناديها بأسمها وانا ما اظن ان بعمره خطر اسمي على باله
خرج تركي بعد ما تأكد انها بخير وانا احس بأني يمكن احرق المكان بلي فيه و راحت البنت لاحدى الطاولات ترتب نفسها.
انتفضت وقت حسيت بيد تربت على كتفي لااااا مووو وقتك ي وجه النحس ي ريهام
حتى اسمعها تقول وهي تحط يدها ع كتفي : لا تروحي بأحلامك فووووووق.. وترفع يدها الثانيه لسماء :لأنك لو توصلي لسماء ما راح يصير الي تفكري فيه
دفيت يدها عن كتفي: شقصدك
ريهام بوضوح ما توقعته: اجيبها لك من الأخر
تركي مستحيل يفكر بوحده مثلك
وعطتني نظرة من فوق لتحت: انتي شايفه نفسك؟ عمرك قيمتي نفسك لا شكل لا لبس لا شهادة
و برغم معرفتي اني حتى اجمل منها و لكن فكرت فعلآ تركي شاف اشكال وألوان بالخارج ومو اي بنت راح تعجبه لكن هالبنت الي صدم فيها مو راضيه تخرج من بالي وكيف يعرفها تركي طنشت كلام ريهام
ورحت اسألها: تعرفي البنت الي قبل شوي
ريهام كان متوقعه مني رد على كلامها و انصدمت من سؤالي الي دخل عرض
و ردت ريهام و قهرتني: هاذي تاج راسك وحب تركي الاول والاخير والي ان شاءالله الي بتكون من نصيب تركي
مو وقتك ي ريهام لكلامك ذا ما ادري شلون فلت اعصابي وضربتها كف وقلت بدون تفكير بتحدي و همس : تركي ..

.
.
.
.
.
.
.
.
.
.
.
.
▪️قراءه ممتعه▪️
ولطفاً دعم الروايه
بلايك وتفاعل 📮
   ودمتم بخير