جان شاب طويل لابس بدلة عسكرية ، متزين بشعر اشكر مثل لون الشمس وعيون خضراء ، ركضت لابوي كتلو "في وحيد يقول اني من الجلعة ..." طر السبحة بالكاع وكال "شنييي من الجلعة ..." كالها وطلع شبه يركض ، اني وراه امشي ، الفضول ماكلني اول مرة ادحك كرايبنة ، تقدم ابوي عليه وتسالمو قالو"تفضل ابوي مين انت..."
ابتسم "اني ابن وادي عمي انا جعفر..."
فتح ابوي عينو ع وسعهن "ابن وااااادي ..." رجع حضنو بقوة ودمعت عينو "يا هلا بريحة هلي والله تفضل بوية تفضل ..."
دخل وهو يكول "زاد فضلك عمي .." امي رحبت بيه واحنه بس صافنين ، قال "تعرف عمي عبنها العسكرية وشلاع الكلب نقلوني للموصل ابوي ضكرك(ذكرك) راسن كال حجي ابو رضا هناك مجانة(مكانه) روح عليه وبالغة سلامي وانا كصدتك واوصلك سلام ابوي وعمي قاسم .."
وكان ابوي نسى اللهجة الموصلية الي تعلمها كل هذه السنين بمجرد ان شاف جعفر وهو يكلو"قاسم والله مشتاكلهم بوية ، كلي طارشهم(خبرهم) .."
"الحمدلله زينين اذا انت زين .."
"بويه اني الحمدلله مرتاح هنا بس تعبني البعد عن ديرتي وعن اهلي ، بس بعد تعودنه ع الموصل وهلها وناسها ، والطريج(الطريق) بعيد لجعلة(القلعة) جان اجيت واعينكم"
"والله عمي احنا عفنه الجلعة وكاعنه واجينه لبغداد ..."
"جا ليش عفتو الجلعة .."
"محمد اخوي البكر اخذ بت عمي ، اخوها يونس لكه لمحمد شغل بالكهرباء بغداد ، وانت تعرف ابوي وامي ما يكدرن ع فراك محمد لمو جويلاتهم وباعر كاعهم واجوي لبغداد ..."
"وانت تعمي ما زوجت عندك بزر ..."
"زوجت عمي بس بعد الرزاق الله ..."
"واخوك محمد هيج كبر والله عمي هذاك اليوم جنتو هلكدوتكم .."
ضحك ورد "محد يبقى ع حاله عمي ..."
"اي والله صدج (صدك) .." اندار ع امي "هيري الاجل(الاكل) ام رضا..."
كامت وهي ترد "صار.."
ورد جعفر بالرفض "لا يا عمي والله انا مقري غاد منكم وكلت ادش الكم بالكن الكاك وصدج لكيتك وكلت اوصلك سلام ابوي وعمامي، وما اريدن اسوي زحمة اكثر .."
ولزمو ابوي "والعباس ابو فاضل ما تطلع منا هاليوم وغداك هينا ، وتباات هين واذا تطلع ليصيغغ(يصير) زعلي ثجيل(ثكيل).."
"عمي والله ما اريدن اسويلك زحمة.."
"اكعد بويه اكعد مجانك رحمة بوية جا انته من ريحة هلي ..."
حضرنه الاكل واني اسال امي منو هذول وهيه ترد صايره مشابك كلشي ما فهمت غير انو كرايبنه من مدينة بالعمارة اسمها قلعة صالح جانت مدينة ابوي قبل ، حجيه غريب علينا ، كلنه نجمعنه ع السفرة ، وهو يشرح الابوي "ابوي تعب جثير وكعد ، ما غبلنه(قبلنه) بعد يشتغل لجن الشغل يرادله حيل وابوي وين الحيل بيه ، وعمي قاسم اخذه الكبر هم ماكو شي يبقى ع حالة يعمي .."
"لا حول الله ، والله جان صديجي بس الوكت الاغبر بعدنه ..."
"الحمدلله..."
"وشعجب رحت للعسكرية عمي .."
"مجبور عمي .." كالها ودنك جر حسرة "حب امي لمحمد منعته من لبس البدلة .." رفع عينه وابتسم بانكسار "وانا لبستها ، رويتبي هم زوين ..."
"هاهيه عمي الحمدلله .."
فرحة ابوي خلاني افرح لفرحو ، جان يوم خميس الجمعة عطلة مدرسية ، ومرتاح اساعد ابوي اذا يريد شي مني ، وجعفر ونس ابوي جثير ، وصار حتى حجي ابوي غريب مثل عمي جعفر ، وبيوم الجمعة بليل دخلت لابوي لغرفتو ، جان جعفر بعدو بالوحدة مالتو بليل يجي يبات عدنا ، دكيت الباب ودخلت "تعال علي تعال هين ..."
اشرلي مكان بصفو ، قعدت بصفو وكتلو "بابا المعلم طلب مني اني ووحيد بالمدرسة يودينا لمتاحف الموصل علمود الخط .." ابتسم بفخر وخلا ايدو ع كتفي "عفيه عليك بطل انت اريدنك تنجح هلسنه والسنة الجاية اجيبلك ملابس زينة عليك .." لمعت عيني فرح "صدك يابه ..."
"يا يوم مجذب عليك .."
"لا حشاك .."
"روح بويه روح ودحك الاثار هناك عاين ع حياتك ..."
بست راسه "مشكور يابه مشكور.." كلتها وركضت حضرت ملابسي بفرح ، وقفني صوت رضا يصيح "زهررررررة.."
كلنه ركضنه للحوش ، صدمني شكله غريب ، ولازم شي بيده زجاج ، ابوي واكف وخال ايده وره ظهرة ويباوع ، زهرة شهكت "رضااااا....!"
ضحك وسحبها وحضنها "اني اكرهج ..." كالها وصار يهتز جتفو "بس انتي حقييييييرة...."
امي كعدت مكدرت توكف ، ودموعها تراري بهدوء ، صيح ابوي هز البيت "رضااااااااااااا..."
فز ودحك ابوي ، ضحك "ابو رضاااااا الزوووود ، الي جبت عمري كلوووو اخاف منك كلووووو ..."
تقرب ابوي وضربو راشدي ، من كد ما متزن وكع بالكاع ، اشرلو باصبع السبابة "اطلللللع براااااا ، لا دحچني وجهك الا من تنضفففف ريحتتتتك المتننننه ، بيتي محتررررم بيت الحجي سلطاااان الي كلها تحلففف بيه تالي ابني يجي سكييييير ..."
صاحت امي عليه "تعال عيني خل اكوومن ..." تقربت منها وكومتها ، راحت الابوي "ابو رضا ، ميعيدها بعد بروح امك .." دنكت تبوس ايده دفعها ، ولزم رضا من ياخه قمصية وطلعه برا ، وسد الباب ، مشى مقوس الظهر كأنه نكسر بعمله رضا ، امي كعدت بمكانها تنوح ، وزهرة غمته "عياك لا راجع ولا ادحققك ..."
صيحت عليها امي "بسسسج يزهرة شمفاوله علي شمسويلج .."
"كولي شني الي ما مسوي الي ..."
طلع عباس وطلعت وراه ، لحكه يمشي براس العوجة(الشارع) لزمه "اوكف رضا ، شبييييك اكو ويييحيد يشررررب من وين هذا الطريق ولك .."
دفعه وكعد ع تكة بانيها بالشارع واحد من البيوت باب بيتهم ، وكام يبيجي "تعبت تعبت .."
كعد بصفة "شبيك يخوي شنو المتعبك ..."
"هيه متعبتني ..."
"زهرة قصدك .." هز راسو بالنفي "لاع ، هيه هيه ..."
صفنه عليه ، دحكني عباس كال "انت شو جابك هين .."
"اجيت ادحكو ، قلبي ما حملني اعوفو .."
"روح اني يمو ..." هزيت راسي ورجعت ، بقى عباس يمو ما رجعو ، وثاني يوم رحت للمدرسة ، ركضت للصف دحكت ايوب وادريس تقربتلهم "ابووووي قبل يوووول اغوح(اروح) للاثار ..."
بانت تعابير الفرح ع ملامحهم وكال ادريس "يول الاساتذة كلها غاح(راح) تغوح(تروح) وابوي وياهم .."
"تعالوو لعد ..."
ايوب "بلي بلي ابوي غاح(راح) ياخذنا ..."
ادريس كال بهمس "ما اجا نزار ..."
ضحك ايوب باستهزاء "يولو الباغحة(البارحة) ابوه مرزلو وقايل للاستاذ بهجت ما يجي نزار للمتحف .."
صدمني "شو صدك ليش معقولة بسببي ...!"
ايوب "يول انت ما دحقت الي سوا بيك ..!؟"
ادريس "اصلاً يستاهل اكثغغغ(اكثر) كون يبطلو ..."
فتحت عيني ع وسعهن "شو شو لاااا اني ما اقدر اتحمل هذا الذنب ..."
واجاني صوتها من وراي "انت ما الك ذنب ، هو لازم يتعاقب ..."
انداريت وابتسمت بوجودها ، همست "اقدر اقعد .."
جنت قاعد ع طرف الرحلة ومندار ع ايوب وادريس ، دخلت ليم الحايط وقعدت ، عيني عليها وعلى هدوئها.
همس الها ايوب "صفية استاذ غازي يغوح(يروح).."
"بلي يغوح..."
جنت منتظر تقول اني هم ، بس سكتت وطلعت كتبها ، كأن ايوب قراني وسألها "وانتي تغحين(ترحين)...!"
"بلي اغوح(اروح).."
بدون وعي كتلها "عليج اللــه ...!" ابتسمت وهزت راسها ، فرحت واحس دكات كلبي تركص ، دحكت ايوب وادريس يبتسمون ، يمكن قرو فرحي ، بالدرس الثالث طلبونه ، ونزلنه جنت متحمس ، واسترق نظر لصفية ، وتبادلني النظرة بس تخجل ما تبين ودير وجها ، صعدت بسيارة استاذ بهجت ، واستاذ غازي ويا وكعدنه اني وصفية وره ، وايوب وادريس بسيارة ابوهم .
واتجهنه للمتحف ، وقبل لا ندخل شرح النه استاذ بهجت "هذا المتحف هو ثاني اهم المتاحف بالعراق .." وقاطعته بفضول "ليش ثاني مو الاول ..."
ابتسم وهو يمشي ، خال ايدو وره ظهرو "الاول هو متحف العراقي في بغداد .." وكمل وعينه ع المكان "تاسس متحف الموصل بعام 1952 ..."
وكلو استاذ غازي "غاح(راح) يسالوك هواي استاذ بهجت.." كالها وضحك ، ابتسم بهدوء ورفع عينه ع كتابة فوك باب المتحف مكتوب(متحف الحضارة في الموصل ).
"اني احسهم كبار استاذ ، خاصة جيل الموصل ، جيل الموصل من اذكياء الطلاب بالعراق ، هذا الشي غاح(راح) يمتد لسنوات .."
وسال استاذ غازي وهمه يدخلون للمتحف "شنو الاسباب هذا الشي قي ادحقو حتى بغداد من تغوح(تروح) هونيك مدح بالجيل الموصلي ..."
ومشى وهو خال ايدو وره ظهرو وكال "لان الموصل متنوعة الفئات متنوعة الاجناس واللغات ، حيث تتنوع من العربي والسرياني والاشوري والكردي والسوري واليهودي وغيرها من الفئات ، من تجي وتدمج هذهِ الفئات غاح(راح) تكون حيمن وبيضة مختلفة الاجناس بالمختصر (مو اقرباء) فالانتاج الوراثي راح يكون مختلف وكلما كانت الصفات الوراثية مختلفة اكثر كل ما كان الانتاج الوراثي جيد ، لهذا السبب اجيال الموصل مختلفة ودحق الاذكياء بيها لان الاكثرية ياخذون غرب يعني مو اقرباء ، من دحق اثنين اقرباء مزوجين في بعض الاحيان دحق امراض الولادة كالقلب وغيرها وهذا سبب تقارب الصفات الوراثية عند الابوين .."
اجت عيني ع صفية راحت وحدها تتمشى داخل المتحف ، اخذتني رجلي الها ، عينها بارجاء المتحف همست "المتحف حلو ..."
"كويس..." كالتها ودنكت ابتسمت ، اريد كلام ماكو نمحى ، صاح استاذ بهجت "حدر علي ..."
جمعنا كلنا ويشرح عن الاثار" تم نقل القطع من الاثار نمرود الى متحف الموصل..."
وسالتو "شو اثار نمرود ...!"
"اثار نمرود ، هذهِ الاثار موجودة بكالج وهذه موجودة باشوريا(مدينة بالموصل) تضم بيها هذهِ الاثار ، كالجو بقديم الزمان تقريباً قبل الميلاد عاصمة للاشورين ، وبهذهِ المدينة بقديم الزمان سو الها عمليات تنقيبية طبعاً باشراف البرطانين ، وكشفو اثار جثير ، قصر اثري ضخم وتحصينات ومنها منحوتات كحجارة الألبستر،وبعدها بسنين كشفو ع نحونات مسمارية .."
وكفنه يم تماثيل ضخمة ، وكالت صفية"هذني يخوفن استاذ.."
ابتسم وهو يدحك عليهن ، همست "راسن انسان واجنحة وجسم حيوان ...!!!!"
دحكني بدهشة "انت عبقري علي ..."
ابتسمت "شو هذا استاذ...؟!!!!!!"
"هذهِ تماثيل اشورية لثيران المجنحة ، جمع بين رأس انسان واجنحة نسر وجسم ثور ..."
وسألت صفية "عود ليش مسوي بهذهِ الطريقة ..."
ابتسم وعينه تجول عليهن "الي يعرف السبب انطي بالاحياء 100 ..."
كتلو وهو يمشي "اعتقد لان الانسان قوي وذكي والنسر شرس والثور هم شرس ، فبهذهِ الحالة جمعوهن سوه بتمثال رمز ع اقوى مخلوقات ..."
كمل وهو صافن عليه "اقوى مخلوقات شرسة..."
ضحك استاذ غازي وكلو "كبالك جيل الموصل القوي علي يختصرهم ..."
هز راسو مثل الي ممصدك "علي اكيد قاري عليهن .."
"لا استاذ والله مقاري بس هيج خمنت ..."
غازي "لازم تنطي 100.."
"اصلاً الي مثلو ما يحتاج يدرس حتى ياخذ 100..."
خجلت من كلامو ، وكمل وهو يشرح "متحف متخصص بالاشوريات وغني بالاثار التي تحكي فترة تاريخية في غاية الاهمية ، بيه قطع اثرية من حقبة الهلينة لهذا اني اليوم حدرتكم هين ..."
يشرح النه ع كل القطع اثرية ، كلها مندمجة وصفية بصفي ، طخت ايدي بأيدها جمدت ، عيني مثبتها ع استاذ بهجت وهو يشرح لكن كلام اخرس كأني صرت اطرش ، تلمست اصابعها بهدوء وهيه مستسلمة ، امشي ايدي ببطيء اتلمس جلدها الدافيء ، دكات كلبي ازيد وعندي رغبة احتضن دفو جسمها ، من مشه استاذ بهجت ابتعدت عني ، ايوب كال "تعبت وجعت.."
وايده ادريس "اني هم يول ما تعبو من المشي.."
ضحك استاذ بهجت واندار عليهم "نغوح(نروح) ناكل بس اهم شي ولد استاذ محمود ما يجوعون.."
ضحك المدير ، ومشنه لمطعم قريب ، واحس الدفو بعده موجود بايدي ، كعدت يم ابوها واستاذ بهجت اني مقابيلها صرت ، رفعت عينها التقت نظراتنه ابتسمت ، دنكت ما ردت ابتسامتي ، طلبو اكل ، جنت اريد اغمض عيني والزم اديها كأنها انطتني جرعة من المسكرات بمجرد ان كضبت اديها، كلها تحجي الا اني عيني عليها.
ضربني بخفة ايوب همس "يول وين صافن لا استاذ غازي ينتبه..." راسن دنكت كأنه نبهني ، كمت اتجهت للمغاسل ، فتحت دكم قميصي وغسلت وجهي ، رفعت راسي دحكت ايوب من المرية ، تقرب وخلا ايدو ع كتفي"شو بيك علي..."
"ما اعغف(اعرف) ..." رفعت ايدي ترجف ، لزم ايدي "يول شبيك ...!"
"ما بيه شي ايوب .." كلتها وسحبت ايدي همس "الموضوع بيه صفية..." ما رديت كال "لا تحكي بس كف دحق بيها ما اغيد(اريد) ويحد من الاساتذة ينتبهون ..." هزيت راسي واني اجر نفس ، واتسائل شنو الي صار ، حاولت اهديء نفسي ، رجعت وما دحقت بعد بيها ، استاذ بهجت كال"شو علي ما تاكل..."
"شبعت استاذ ..."
رجعنه للبيت بوكتها جنت صاعد بنفس السيارة ويه استاذ بهجت وغازي وصفية بصفي، واستاذ محمود اخذ ولدو بسيارتو ، وصلني بيومها استاذ بهجت لحد باب بيتنه ، وراح ، دخلت للبيت امي كاعدة بالحوش اول ما دخلت كامت وصيحت بوجهي "ويييينك انته...!!"
"شكو ابوي تعصب ..."
"بوك شني ولك الدنيا ظهر وحلو الطلاب من شوكت وانت ماكو .."
"يوم اني قوتلكم غاح(راح) اغوح(اروح) لمتحف ويه استاذ بهجت ..."
ضربت خدها بخفة "يا يمه نسيت ..."
"ابوي تعصب .."
"لاع ابوك ما يغدري(يدري) ما قتلو من دحقتو هاديء وما سال كلت شعجب طلع هو مذكر ، بس انه عبني كبرت وصغت(صرت) انسى ييمه وكلبي وجر نار وحك العباس خفت علية صايغلك(صايرلك) شي ودزيت جواد وصالح يدورون عليك .."
تقربت وبست راسها "يمه اني هم انسى دحقي السبب مو الكبر بس مغات(مرات) الانسان ينسى ، هساع اطلع ادورهم واجي ..."
"اي عفية وتعال تغدى عبنه مسويتلك دولمة تستاهل لحلكك .."
"ماكل اني يوم ، هناك دخلنه استاذ غازي وبهجت مطعم .."
"ياع وشون منيلك فلوس انت ..."
"لا يوم مو مني منهم .."
"شني علي ، تخليهم يصرفون عليك .."
"يوم هنا عيب اني ادفع همه كبار وعازمينة ، ما ادري هيج كلي ادريس ..."
"دروح دش ع اخوانك ودحكهم وين ..."
"صار ..." كلتها وطلعت ، ودحكتهم براس العوجة(الدربونة) يتمشون ، دحكوني وركضو ، صيح صالح "وينك عمممي .."
"جنت بالمتحف بس بيبتك ناسيه .."
جواد"يا متحف ليش ما خذتني وياك .."
"اخذك وياي ، دغوح(روح) ادخل غوح(روح) .."
لزمني صالح "عمي ابوي شوكت يرجع مين اقولو محد يجاوب .."
جريت حسرة "يرجع صالح يرجع بس عندو شغل.."
"ليش جدي ضربو لعد ..."
ما رديت ، عجزت ، رجعنه للبيت ، وجعفر مستمر جايتو النه ، صار كل ما يصعد يجي النه يبات ، وبيوم نزلتو صدمنه بشيوخ العمارة وجيتهم للموصل ، خلا ابوي لازم الباب وصافن عليهم .
وادي "شونك ابو رضاااا ، بعد سنين يخوي وعاينك .."
صيح ابوي "واااادي..." تحاضنو بقوة ، نزلت دمعوو الابوي ع جيتهم كأنه ممصدك ، دخلناهم للاستقبال ، سوينه جاي ، اريد اوزعه ، صيح واحد"لحظة بوية الجاي ما يتوزع الا ابوك يقبل بالجي جاي عليه ..."
ابوي ردو "عيب ابو محمد انت ع راسي والتريده صايغغ(صاير) باذن الله .."
اندار عليه وكال "وزع يابه.." وزعتلهم الجايات ، بس رفض يشرب وهو يكلو "جايك بطلب وكاصدك من العاصمة لهني ، وما اريدنك ترجعني وتفشلني ..."
ابو رضا "افااااا الي يخجلك ابو محمد ..."
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
#منار_العجيـــــــــــــــل
أنت تقرأ
النظر الى الأسفل
Ficción históricaهو حبر ينتمي الى ارض الواقع ، هذهِ رواية مستوحاة من قصة حقيقة ، وما زالت شخصياتها تتردد انفاسها ع الارض ، نطير مع اجيال يرسمون احلامهم حتى يتعثرون في خطوات عقرب الساعة الوهن ، ترسم شخصياتها بفرشاة رسمت من ايادي متجعدة ، يتوسطها ذلك الذي كبل عليه الا...
